ملګري ملتونه: پر ښځو د کار بندیز افغانستان کې له نیمايي ډېر خلک له مرستو محروموي

ژوندی پوښښ

1. ۶ مرغومی ۱۴۰۱ - ۲۷ ډیسمبر ۲۰۲۲د سعودي عرب او پاکستان بهرنیو چارو وزیران: د افغان مېرمنو ټول حقونه باید خوندي شي

   د سعودي عرب او پاکستان بهرنیو چارو وزیرانو وايي، چې د "افغان مېرمنو ټول حقونه باید خوندي شي."

   بلاول بوټو زرداري او د سعودي د بهرنیو چارو وزیر شهزاده فیصل بن السعود دغه څرګندونې په ټیلیفون خبرو کې کړې دي.

   د پاکستان بهرنیو چارو وزارت په وینا پاڼه کې راغلي چې دواړو لورو یو ځل بیا د افغان مېرمنو د ټولو حقونو په خوندیتابه او د ژوند په ټولو برخو کې د هغوی د بشپړ او مساوي ګډون پر ارزښت ټینګار کړی.

   د دواړو هېوادو د بهرنیو چارو وزیران داسې مهال دا څرګندونې کوي چې په افغانستان د طالبانو حکومت پر ښځو او نجونو کمساري بندیزونه لګولي دي.

   په وینا پاڼه کې راغلي چې پاکستان او سعودي عرب په افغانستان کې د امن ، سولې او ټیکاو څخه ملاتړ کوي او تمه لري چې د افغانانو لپاره د یوې باثباته راتلونکې د جوړولو په برخه نړیوال هلته فعالانه ښکېل و اوسي.

2. ۶ مرغومی ۱۴۰۱ - ۲۷ ډیسمبر ۲۰۲۲وروستی, متحده عربي امارات:‌ افغانستان کې د ښځو د کار بندلو بشري کړاو لا پسې ډېروي

   متحده عربي اماراتو هم په افغانستان کې د طالبانو له لوري د کورنیو او بهرنیو مؤسسو د ښځینه کارمنانو د کار بندولو پرېکړه غندلې ده.

   په ملګرو ملتونو کې د متحده عربي اماراتو د بهرنیو چارو وزارت او د نړیوالې همکارۍ او سیاسي چارو مرستیالې لانا زکي نسیبې ویلي، په شدت د طالبانو هغه پرېکړه غندي چې افغانستان کې یې په کورنیو او بهرنیو نا دولتي ادارو کې د ښځو پر کار بندیز لګولی دی.

   نسیبې خبرداری ورکړی چې د افغانستان کابو دریمه برخه وګړي بشري مرستو ته اړتیا لري او نژدې شپږ میلیونه وګړي د لوږې له خطر سره مخامخ دي.

   دا وايي "دغه پرېکړه په دې هېواد [افغانستان] کې د انساني مرستو وړاندې کولو هڅې له خنډ‌ سره مخامخوي او د ښځو،‌ ماشومانو او بوډاګانو په ګډون په ټولنه کې تر ټولو ډېر کمزوري وګړي ترې اغېزمنېږي."

   متحده عرب‍ي اماراتو د طالبانو دا وروستۍ پرېکړه او ترې وړاندې د پوهنتوني نجونو د زدکړو د ځنډولو پرېکړه د ملګرو ملتونو د امنیت شورا له ۲۶۱۵ پرېکړه لیک سره په ټکر کې بللې چې په وینا یې له شک پرته دا به په افغانستان کې بشري کړاو لا پسې ډېر کړي.

   اغلې نسیبې ویلي "اسلامي دین ښځې ته لوړ مقام او رول ورکړی او حقونه یې خوندي کړي دي" چې په وینا یې د ژوند په هره برخه کې د ښځو او نجونو بشپړ او مساوي ګډون مهم دی.

   متحده عربي اماراتو ټینګار کړی چې له خپلو سیمه‌ییزو او نړیوالو ملګرو سره په همکارۍ به د افغانستان د ځمکنۍ بشپړتیا ملاتړ، ټیکاو او امنیت ټینګېدو او پرمختګ ته پر خپلو ژمنو ټینګ پاتې شي.

   هغې په پای کې ویلي، چې د افغانستان او افغانانو روښانه راتلونکی په ټولنه کې به بشپړ ډول د ښځو او نجونو پر ښکېلولو ولاړ دی.‌

3. ۵ مرغومی ۱۴۰۱ - ۲۶ ډیسمبر ۲۰۲۲"د خلکو اقتصادي ستونزې په پام کې ونیسئ"

   د بشر حقونو د څار او د رسنیو سازمان یا WHM په مؤسسو کې د ښځو د کار د بندیز په اړه د طالبانو پر امر سخته اندېښنه ښودلې او ویلي یې دي چې "دا پرېکړه زرګونه هغه کورنۍ چې له همدې لارې یې د خپل ژوند ستونززې حلولې له سختو ستونزو سره مخامخولی شي" او د طالبانو دا کار به د نړیوالو مرستو مخه ونیسي.

   دغې ادارې په یوه خبرپاڼه کې ویلي، دوی پر دې باور دي چې د اسلامي شریعت په رڼا او حجاب کې "نه یوازې مؤسسو کې بلکې په دولتي ادارو کې هم ښځو ته باید د کار زمینه برابره شي او د افغانستان د خلکو اقتصادي ستونزې په پام کې ونیول شي".

   د بشر حقونو د څار او د رسنیو سازمان له کاره د ښځو منع کول د خلکو په زیان بللي او دا پرېکړه له مرستندویه هېوادونو سره د طالبانو د حکومت د دیپلوماتیکو اړیکو ټکنۍ کولو لامل کېدای شي چې تر ټولو ډېر زیانګالي به عام وګړي وي.

4. ۵ مرغومی ۱۴۰۱ - ۲۶ ډیسمبر ۲۰۲۲وروستی, د طالبانو د رئیس الوزرا سیاسي مرستیال: هڅه کوو د ښځو د زدکړو ځنډ ژر پای ته ورسېږي

   د طالبانو حکومت د ریاست الوزرا مرستیال مولوي عبدالکبیر وايي حکومت یې د نجونو زدکړې مخالف نه دی او هڅه کوي دا ځنډ ژر پای ته ورسېږي.

   د طالبانو حکومت د رسنیو مرکز په اعلامیه کې راغلي چې مولوی عبدلکبیر د خصوصي پوهنتونونو له رئيسانو سره وکتل.

   په دې کتنه کې نوموړي وویل د اسلامي نظام ټينګول د افغانانو غوښتنه وه او زیاته یې کړه چې خلک د ثبات او اسلامي نظام د ټینګښت په برخه کې د دوی له حکومت سره همکار دي.

   د پوهنتونونو مشرانو هم له نوموړي د نجونو پوهنتونونو د بیا پرانستلو غوښتنه وکړه.

   مولوي عبدالکبیر په دې کتنه کې ویلي افغانستان د ټولو ګډ کور دی او هرڅوک حق لري چې خپل نظر څرګند کړي او خپل حق وغواړي.

   د طالبانو حکومت د لوړو زدکړو وزیر څه موده وړاندې وویل د کابینې د پرېکړې له مخې به د نجونو پوهنتونونه تر دویم امر پورې تړلي وي.

5. ۵ مرغومی ۱۴۰۱ - ۲۶ ډیسمبر ۲۰۲۲پېښور پوهنتون کې احتجاج: "نجونو ته د زدکړې اجازه ورکړئ"

   د خیبرپښتونخوا پېښور کې يو شمېر مدني فعالانو په افغانستان کې د طالبانو له خوا د نجونو د پوهنتونونو او ښوونځيو د تړل کېدو پر ضد احتجاج وکړ او د طالبانو له حکومت يې غوښتل چې نجونو ته اجازه ورکړي‌ چې ښوونځيو او پوهنتونونو ته ولاړې شي.دغه احتجاج چې د مدني فعالانو له خوا د پېښور پوهنتون کې را بلل شوی و، ګډونوالو یې افغانستان کې د ټولو نجونو د زدکړو او کار کولو د حق لپاره نارې وهلې.

6. ۵ مرغومی ۱۴۰۱ - ۲۶ ډیسمبر ۲۰۲۲"د کور لګښتونه مې د موسسې له معاشه برابرول"

   په افغانستان کې ګڼې هغه مېرمنې چې په نادولتي‌ ادارو یا موسسو کې یې کارونه کول،‌ له تېرو دوو ورځو راهیسې دندو ته نه پرېښودل کېږي.‌

   ځینو دغو مېرمنو بي بي‌ سي پښتو پاڼې ته ویلي‌ چې پر ښځو د طالبانو کاربندیز نه یوازې مېرمنې بلکې هغه کورنۍ هم اغېزمنې کړي‌ چې د موسسو ورسره مرسته کوله.‌

   حفیظ الله معروف له یوې داسې افغان مېرمنې سره خبرې کړې چې د کور لګښتونه یې د موسسې له معاشه برابرول خو اوس پرې معاش بند شوی دی.‌

7. ۵ مرغومی ۱۴۰۱ - ۲۶ ډیسمبر ۲۰۲۲قطر هم پر افغان ښځو د بندیزونو په اړه له طالبانو د بیا غور غوښتنه کړې

   د قطر د بهرنیو چارو وزارت وايي،‌ افغانستان کې د ښځو په اړه د طالبانو د تازه پرېکړې په اړه اندېښمن دي.

   د دغه وزارت له لوري په خپره شوې خبرپاڼه کې د ښځو د حقونو په اړه د قطر دریځ روښانه شوی، او پر طالبانو یې غږ کړی چې پر خپله پرېکړه له سره غور وکړي.

   قطر د طالبانو نژدې ملګری هېواد دی او یو له هغو څو هېوادونو دی چې طالبانو پکې افغان سفارتونو ته خپل استازي ور استولي دي.‌

   خبرپاڼه کې د ښځو کار حق ته په درناوي ټینګار شوی او زیاته کړې یې ده چې:"ازادي او د کار کولو انتخاب یو انساني حق دی چې د نړیوالو سازمانونو له خوا په رسمیت پېژندل شوی او د نړۍ ټولو هېوادونو له خوا منل شوی دی."

   د قطر بهرنیو چارو وزارت په خپره شوې خبرپاڼه کې همدا راز ټینګار کړی چې هېواد یې د ټولو افغانانو ملاتړ کوي چې خپل حقونه ترلاسه کړي.

8. ۵ مرغومی ۱۴۰۱ - ۲۶ ډیسمبر ۲۰۲۲پر ښځو د کار بندیز؛ اروپايي ټولنه وايي افغانستان کې د خپلو مرستو پر دوام له سره غور کوي

   اروپايي ټولنه وايي، له افغانستان سره د خپلو مرستو پر دوام به له سره غور وکړي.

   د اروپایي ټولنې د بهرنۍ تګلارې مشر جوزف بورېل دغه څرګندونې وروسته له هغې کوي چې طالبانو په افغانستان کې غیر دولتي بنسټونو کې د ښځو پر کار کولو بندیز ولګاوه.

   ښاغلي بورېل په یوه خپره شوې خبرپاڼه کې ویلي، د طالبانو د نوي فرمان له مخې پر ښځو د کار او زد کړې بندیز له "بنسټیزو بشري حقونو ښکاره سرغړونه" او "ویروونکې" ده.

   نوموړي دا پرېکړه له ټولنې د ښځو د ایستلو یوه بڼه یاده کړې ده.

   اروپايي ټولنې د افغانستان خلکو ته د بشر دوستانه مرستو او لومړنیو اړتیاوو د اصلي برابروونکي په توګه دغه بندیزونه په کلکه غندلي، او پر طالبانو یې غږ کړی چې، بشر دوستانه قوانینو ته د درناوي په موخه دې سم لاسي دې خپله پرېکړه بېرته واخلي.

   یادې ټولنې ویلي: "د طالبانو د نویو پرېکړو د اغېز له امله به مونږ افغانانو سره د خپلو مرستو د دوام شونتیا ارزونه وکړو."

   د اروپایي ټولنې د خبرپاڼې له مخې اټکل کېږي چې، افغانستان کې دا مهال شاوخوا ۳۰ میلیونه وګړي د ژوندي‌ پاتېدو لپاره د خوراکي او روغتیايي مرستو په ګډون پر بشري مرستو پایي.

   دغې ټولنې ټینګار کړی چې ښځینه کارکوونکې نورو ښځو سره د مرستې په برخه کې مهم رول لري.

   د ډسمبر په ۲۴مه د طالبانو اقتصاد وزارت په ملي او نړیوالو نادولتي بنسټونو کې د ښځو پر کار بندیز اعلان کړ او ګواښ یې وکړ چې، که کوم بنسټ له دغې پرېکړې سرغړونه وکړه جوازونه به یې لغوه کړي.

9. ۵ مرغومی ۱۴۰۱ - ۲۶ ډیسمبر ۲۰۲۲یوناما وايي‌ طالبان دې په این جیوګانو کې پر ښځو دبندیز پرېکړه لېرې کړي

   افغانستان کې د ملګرو ملتونو استازولۍ یوناما مرستیال رامز الاکبروف د طالبانو له حکومته یو ځل بیا غوښتنه کړې چې په این جیو ګانو کې پر ښځو د کاربندیز پرېکړه بېرته واخلي.‌

   د یوناما مرستیال د طالبانو له اقتصاد وزیر سره په کتنه کې دغه غوښتنه کړې.‌ ښاغلي الاکبروف ویلي چې "میلیونونه افغانان بشري‌ مرستو ته اړتیا لري او د دغو بندیزونه لېرې کول خورا مهم دي."

   ښاغلی الاکبروف له لومړیو هغو کسان وو چې د دغې پرېکړه یې له اعلان وروسته ډېره اندېښمنونکې بللې وه.

   د طالبانو حکومت کې د اقتصاد وزیر دین محمد حنیف دوه ورځې وړاندې په یوه مکتوب کې پر ټولو هغو ښځو د کاربندیز لګولی چې په کورنیو او نړیوالو این جیوګانو کې کار کوي.‌

   د دغې ناستې په اړه د طالبانو اقتصاد وزارت په خپله ټوېټر پاڼه کې دا یادونه نه ده کړې چې له دوی د دغې پرېکړې د بېرته اخیستو غوښتنه شوې وه.‌

   طالبانو ویلي،‌ په دغه ناسته کې د افغانستان لپاره د ملګرو ملتونو مرستیال مشر ډاډ ورکړی چې اقتصاد وزارت په مشرۍ به د طالبانو "د مقراراتو" په پام کې نیولو سره بشري‌ مرستې روانې ساتي.‌

   خو د یوناما د مرستیال مشر په څرګندونو کې د اقتصاد وزارت د "بندیزونو" په پام کې نیولو سره د بشري‌ مرستو د دوام یادونه نه ده شوې.

10. ۵ مرغومی ۱۴۰۱ - ۲۶ ډیسمبر ۲۰۲۲وروستی, یونیسف: د طالبانو وروستی امر د ښځو او ماشومانو هوسا ژوند خطر کې اچوي

    د ملګرو ملتونو د ماشومانو ملاتړ صندوق 'یونیسف' وايي، په افغانستان کې د ټولو ښځینه بشردوستانه کارمنانو د کار د بندیز په اړه د طالبانو وروستی امر غندي.

    دغې ادارې په یوه ویناپاڼه کې ویلي، دا پرېکړه د نړیوالو بشردوستانه قوانینو په رڼا او افغانستان کې د ښځو د حقونو له حقونو ښکاره سرغړونه ده.‌

    یونیسف وړاندې لیکي "د لومړنیو حقونو له فاحشو لغوه کولو هاخوا،‌ دا پرېکړې د ماشومانو او کورنیو لپاره په ټول هېواد کې د خدماتو وړاندې کولو په اړه پراخې پایلې لري، په تېره د ماشومانو د روغتیا، تغذیې، روزنې او ساتنې په برخو کې – او هغه سیمې اغېزمنوي چې ښځې پکې په بشردوستانه مرستو کې فوق العاده رول لري."

    د ملګرو ملتونو دغه اداره زیاتوي، یونیسف په ټول افغانستان کې ۱۹ میلیون خلکو ته، چې تر ۱۰ میلیون ډېر ماشومان هم پکې دي – د خدماتو پروګرام لري، چې په وینا یې د طالبانو له پرېکړې سره به اغېزمن شي.

    "د نادولتي ادارو د ښځینه کارمنانو د کار په بندولو سره، طالب مشران عملاً له خلکو نه دغه خدمتونه راګرځوي او د ټولو افغانانو- په تېره د ښځو او ماشومانو هوسا ژوند په خطر کې اچوي".

    یونیسف وايي، له طالب مشرانو یې غوښتنه دا ده چې سم لاسي د لوړو زدکړو او بشردوستانه کار په اړه خپلې دواړې پرېکړې بېرته واخلي او ټولو نجونو زدکوونکو ته ښوونځیو ته د تللو اجازه ورکړي او نادولتي مؤسسو کې ښځینه کارمنانې افغانستان کې بشردوستانه سکیټور کې خپلو کارونو جاري ساتلو ته پرېږدي.

11. ۵ مرغومی ۱۴۰۱ - ۲۶ ډیسمبر ۲۰۲۲وروستی, "اسلامي همکاري"، افغان چارواکي دې د ښځو د کار بندیز لغوه کړي

    د اسلامي همکارۍ ادارې یا Islamic Relief هم ویلي، دوی افغانستان کې خپل ډېریه کار بند کړی دی.

    دغې ادارې ویلي، افغانستان کې یې د ژوندژغورنې خپل پروګرام بندولو بندولو پرېکړه ورته ډېره ګرانه وه.

    دغه اداره زیاتوي، چې د دوی پروژې د هغو اړمنو بې وزله افغانانو د ملاتړ لپاره فعالیت کاوه چې غواړي د کورنیو غړي یې د ډوډۍ موندلو له ستونزې خلاص او بچیان یې تعلیم وکړي.‌

    د اسلامي همکارۍ اداره وايي دوی په روغتیايي برخو کې د ژوندژغورنې اړوندې ځینې پروژې هم لري، چې په وینا یې لا تر اوسه یې د بندولو پرېکړه نه ده کړې او کارونه به یې دوام لري.

    "د اسلامي همکارۍ اداره پر افغان چارواکو غږ کوي چې سم لاسي د اېنجوګانو پر ښځینه کارمنانو بندیز لیرې کړي".

12. ۵ مرغومی ۱۴۰۱ - ۲۶ ډیسمبر ۲۰۲۲وروستی, 'پاملرنه' مؤسسه: له ښځینه کارمنو پرته افغانستان کې فعالیت راته ګران دی

    په افغانستان کې د پاملرنې نړیوالې مؤسسه وايي، دوی د طالبانو له لوري په کورنیو او بهرنیو مؤسسو کې د ښځینه کارمنانو د کار بندولو پرېکړه غندي.

    په افغانستان کې د پاملرنې مؤسسې مرستیالې مشرې ریشمه ازمي بي بي سي ته وویل، "دا بندیز له هغو انساني اصولو کاملاً‌ سرغړونه ده چې موږ یې پلی کوو او نیمايي هغه نفوس ته زموږ د رسېدنې مخه ډب کوي چې افغان ښځو او نجونو ته د ښځو په لاس خدمات وړاندې کوي".

    اغلې ازمي وايي، په بشري چارو کې د ښځو نه ګډون په هېواد کې د ټولو بشرپالو فعالانو لپاره لویه اندېښنه ده.

    دا وايي، هڅه یې دا ده چې په ګډه له چارواکو سره دې ستونزې ته د حل موندلو یوه لاره چاره ومومي، چې په حلېدو سره به یې ټولو اړمنو افغانانو ته – که نارینه دي یا ښځې خپل ملاتړ او مرستې وغځول شي.

    پاملرنه مؤسسه وايي په ختمېدونکي ۲۰۲۲ کال کې یې کابو د اوه سوه زره اړمنو افغانانو – چې تر نیم میلیون ډېرې پکې ښځې او نجونې وې، لاسنیوی کړی چې په وینا یې له ښځو او نجونو سره مرسته کول د دوی د پروګرام اصلي موخه وه.

    ریشمه ازمي وايي، له ښځینه کارمنو پرته دوی ته افغانستان کې فعالیت کول ګران دي:

    "له ښځینه مرستندویانو کارمنو پرته هغو ښځو او نجونو ته زموږ رسېدل ناممکن دي چې مرستو ته اړتیا لري."

    پاملرنه مؤسسه وايي، دوی د افغانستان په نهو ولایتونو کې دا مهال کابو نهه سوه کارمنان لري، چې اته دېرش سلنه یې ښځې دي.

    د پاملرنې مؤسسې دې مرستیالې مشرې دا څرګندونې داسې مهال کړې، چې تازه د ژغورنې نړیوالې کمېټې (ای ار سي) په افغانستان کې د خپل فعالیت درولو اعلان کړی.‌ دغې کمېټې ویلي، د دوی له کابو اتو زرو کابو څلوېښت سلنه کارمنان ښځې دي.

13. ۵ مرغومی ۱۴۰۱ - ۲۶ ډیسمبر ۲۰۲۲وروستی, ای‌ار‌سي: له ښځینه کارمنانو پرته افغانستان کې فعالیت راته ناشونی دی

    تازه د ژغورنې نړیوالې کمېټې (ای ار سي) په افغانستان کې د خپل فعالیت درولو اعلان کړی.‌

    دغې کمېټې ویلي، د دوی له کابو اتو زرو کابو څلوېښت سلنه کارمنان ښځې دي.

    د سېف ده چلډرن مؤسسې اجرائيوي مشر ډېوېډ رایټ ویلي: "ښځو او ماشومانو ته د لاسرسي لرلو لپاره، تاسو ښځینه روغتیايي کارمنانو لرلو ته اړ یاست. که تاسو دغه کارمنانې ونه لرئ، تاسو به دې خلکو ته لاسرسی ونه مومئ. نو اصلا دا موږ ته ممکنه نه ده که زموږ ښځینه همکارانې کار ته راونه وځي، موږ دې خپل کار مخته بوتللی شو."

    نوموړی وايي، په لوړه کچه خبرې او هڅې روانې دي چې طالبان دا پرېکړه بېرته واخلي.

    خو طالبانو د دوی د پرېکړې نړیوالې غندنې رد کړې دي او وايي ټولې نادولتي ادارې چې غواړي افغانستان کې خپل فعالیتونه وکړي، باید د هېواد قانون ته غاړه کېږدي.

14. ۴ مرغومی ۱۴۰۱ - ۲۵ ډیسمبر ۲۰۲۲د بې پولې ډاکټرانو ټولنه: افغانستان کې له ښځینه کارمنانو پرته درملیزې مرستې وړاندې کول نه شته

    د بې پولې ډاکټرانو ټولنې په نړیوالو مؤسسو کې د ښځو کار د بندیز په غبرګون کې ویلي، په تېرو څلورو لسیزو کې چې دوی افغانستان کې کار کوي، له ښځینه کارمنانو پرته د روغتیايي څارنو وړاندې کول ورته ممکن نه دي.

    دغه سازمان په یوه ټویټ کې لیکلي "په ډېرو برخو کې موږ په خپلو مرکزونو کې د باکیفیته خدماتو وړاندې کول د ښځینه کارمنانو له خوا ترسره کېږي".

    دا اداره ټینګار کوي چې هېڅ سازمان له ښځو پرته سیمه ییزو خلکو سره مرسته نه شي کولی.

15. ۴ مرغومی ۱۴۰۱ - ۲۵ ډیسمبر ۲۰۲۲'ګڼو افغان مؤسسو د خپل کاري فعالیت درولو پرېکړه کړې'

    د افغانستان د مدني ټولنې ګډ کاري ګروپ هم بي بي سي ته ویلي چې ګڼو افغان مؤسسو هم پرېکړه کړې چې خپل فعالیت ودروي.

    د افغانستان د مدني ټولنې د ګډ کاري ګروپ غړې نګینې یاري بي بي سي ته وویل، دا چې ملي مؤسسې هم تر ډېره پر نړیوالو بنسټونو تکیه دي ګڼو یې د فعالیت د درولو پرېکړه کړې.

    آغلې یاري زیاته کړه چې د دغو پرېکړو ډېر زیان د افغانستان زیانمنېدونکو خلکو ته رسېږي.

16. ۴ مرغومی ۱۴۰۱ - ۲۵ ډیسمبر ۲۰۲۲

17. ۴ مرغومی ۱۴۰۱ - ۲۵ ډیسمبر ۲۰۲۲د اسلامي همکاريو سازمان؛ طالبان دې "اېن جيوګانو کې د ښځو کار کولو پر بنديز بيا غور وکړي"

    د اسلامي همکاريو سازمان په افغانستان کې د طالبانو د حکومت له خوا په دولتي او نادولتي موسسو کې د ښځو کار کولو پر بنديز نيوکه کړې او دا کار يې د افغان ښځو پر بنسټيزو حقونو يو بل سخت ګوزار بللی دی او له طالبانو يې غوښتي چې له خپلې پرېکړې بېرته په شا شي.

    د اسلامي همکاريو سازمان پر ټوېټر پاڼه ليکلي، له دې کړنې ښکاري چې په "زور واک ته رسېدلي واکمن په ښکاره غواړي چې د افغان ښځو حقونه نور هم اغېزمن کړي".

    د اسلامي همکاريو سازمان لیکلي چې دا کار به له زيان منونکو افغانانو سره بشري مرستې په جدي توګه اغېزمنې کړي.

18. ۴ مرغومی ۱۴۰۱ - ۲۵ ډیسمبر ۲۰۲۲طالبان: امریکايې چارواکي دې زمونږ کورنیو چارو کې لاسوهنه نه کوي

    په افغانستان کې د طالبانو حکومت له خوا په بهرنيو او کورنيو موسسو کې د ښځو پر کار د بنديز له امله د بېلابېلو هېوادونو، موسسو او سازمانونو له غبرګونونو وروسته د طالبانو ویاند ذبیح الله مجاهد ويلي، امریکا دې د دوی په کورنیو چارو کې لاسوهنه نه کوي.

    ذبیح الله مجاهد په ښکاره د افغانستان لپاره د امریکا د شازدافېرې کرن ډېکر له بیان وروسته خپل غبرګون څرګند کړی دی.

    اغلي کرن په ټوېټر لیکلي، "زه له افغانستان سره د بشري مرستو د سترې مرستندویه ټولنې په استازولی ځان ته دا حق او وضاحت ورکوم چې که ښځې نورو ښځو او ماشومانو ته د مرستې رسولو اجازه نه لري، طالبان څنګه د ښځو او ماشومانو د لوږې د مخنیوي اراده کوي."

    نوموړي زیاته کړي "پر دې امر د طالبانو د اقتصاد د وزیر قاري دین محمد لاسلیک دی او زه هغه مسول ګڼم."

    طالب ویاند ذبیح الله مجاهد د اغلی کرن دا خبرې له سکرین شارټ سره بیا خپرې کړي او ورسره یې لیکلي، "هغه موسسې چې په افغانستان کې فعالیت کوي زمونږ د هېواد د قوانینو او فرمانونو په رعایت کولو مکلفې دي."

    نوموړي زیاته کړي چې چاته به اجازه ورنکړي چې د بشري مرستو په نوم "د اسلامي امارت د پرېکړو یا چارواکو په اړه بې مسولیته خبرې او یا کوم ګواښ وکړي."

19. ۴ مرغومی ۱۴۰۱ - ۲۵ ډیسمبر ۲۰۲۲جرمني د طالبانو د نويو فرمانونو پر وړاندې له نړۍ د پیاوړي غبرګون او دریځ غوښتنه کړې

    د جرمني د بهرنیو چارو وزیرې انالنا باربوک د افغان نجونو او ښځو د زده کړو او په نادولتي موسسو کې د کار بندیز په غبرګون کې ویلي" دا د منلو وړ نه ده چې طالبان دې بشري مرستې د ښځو ضد وکاروي" نوموړې په دې اړه "له نړیوالې ټولنې د جدي غبرګون" غوښتنه کړې.

    د جرمني د بهرنیو چارو وزیرې په ټوېټر یوه خپور شوې بیان کې لیکلي، "طالبان د نفوس نیمایې برخه له یو بل بنسټیز حقه محرومه کړه، دوی بشردوستانه اصول تر پښو لاندې کوي او د خپلو خلکو حیاتي اړتیاوې له ګواښ سره مخ کوي."

    نوموړې زیاته کړي "د جنسیت پر بنسټ ځورونه بشري ضد جنایت ګڼل کېدای شی او مونږ د نړیوالې ټولنې پیاوړي ځواب ته ژمن یوو. "

    جرمني په افغانستان کې د طالبانو له راتګ را وروسته د بشري مرستو یو له سترو مالي ملاتړ کونکو څخه دی خو تر اوسه یې په دې اړه څه نه دي ویلي چې د طالبانو له نویو تګلارو وروسته به هم بشري مرستو ته دوام ورکړي که نه؟

20. ۴ مرغومی ۱۴۰۱ - ۲۵ ډیسمبر ۲۰۲۲پاريس کې د افغان مېرمنو د حقونو او نجونو د زدکړو په ملاتړ لاريون شوی

    د فرانسې پلازمېنه پاريس کې يو شمېر افغانانو په افغانستان کې د طالبانو له خوا د نجونو د پوهنتونونو او ښوونځيو د تړل کېدو پر ضد لاريون وکړ او د طالبانو له حکومت يې وغوښتل چې نجونو ته اجازه ورکړي‌ چې ښوونځيو او پوهنتونونو ته ولاړې شي.

    لاريونوالو له نړيوالې ټولنې غوښتل چې پر طالبانو فشار راوړي چې د نجونو پر وړاندې د پوهنتونو او ښوونځيو دروازې بېرته پرانيزي او مېرمنو ته د کار اجازه ورکړي.

    د طالبانو د لوړو زدکړو چارسمبالي وزير ندا محمد نديم له خوا څو ورځې وړاندې په خصوصي‌او دولتي پوهنتونونو کې د نجونو پر زدکړو بنديز ولګول شو چې په کور دننه او نړيواله کچه له ګڼو نيوکو ا غبرګونونو سره مخ شو.