د افغانستان د ټاکنو د کمېسیون یو غړی: هغه کسان چې نومونه یې نوملړ کې نه وي رایه کارولی شي
د رایې ورکونې په لومړیو ساعتونو کې د افغانستان په مرکز او ولایتونو کې خلکو شکایت درلود چې نومونه یې په نوملړ کې نشته. یو شمېر یې وايي چې په فهرست کې د نوم د نشتوالي له امله د رایې ورکولو له حق محروم شول.
خو د افغانستان د ټاکنو کمېسیون یو غړی مولانا عبدالله وايي د هغو کسانو نومونه چې د رایه ورکوونکو په فهرست کې وي خو د بایومټریک په دستګاه کې ثبت شوي نه وي په هماغه محل کې خپله رایه کارولی شي.
ښاغلي عبدالله وویل:"د هماغه محل کارکوونکی کولی شي خپله قانوني کړن لاره پلې کړي او د هغه چا نومونه چې د رایو ورکوونکو په نوم لړ کې وي کولی شي خپله رایه وکاروي. "
هغه وویل په هغه صورت کې چې د چا نوم په بایومټریک دستګاه کې وي خو د رایه ورکونکو په نوملړ کې یې نومونه نه وي ثبت شوي کولی شي په هماغه محل کې رایه وکاروي.
ښاغلي عبدالله وویل:'د هغه چا چې د رایه ورکونکو په کاغذي نوملړ کې نومونه نه وي کولی شي رایه ورکړي خو نوم یې پر تذکره د سټېکر شمېره یې پر کاغذي نوملړ کې لیکل کیږي.'
ښاغلي عبدالله زیاته کړه، کله چې د یو چا نوم په نوملړ کې نه وي نو د بایومټریک په دستګاه کېد سټېکر د شمېرې په پلټلو سره یې نوم ښکاري چې د رایه ورکونکو نوم په بل مرکز کې ثبت دی نو بیا دې هماغه ځای کې رایه وکاروي.
هغه وویل که په بایومټریک دستګاه کې د سټېکر شمېره "لېرې شوي" وښیې، د رایه ورکونکي نوم په نوملړ کې شته او په وروستیو کې خپله رایه کارولی شي.
نوموړي ټینګار وکړ که' که چېرته په بایومټریک دستګاه کې د سټېکر شمېره نه وي یانې سټېکر تقلبي وي نو رایه ورکونکی له رایې کارونې بې برخې کیږي.'