هغه سړی روغتون ته وړل شوی چې د الوتکې لاندینۍ برخه کې یې ځان پټ کړی و

فرانسوي چارواکي وايي، یو سړی یې له الجزائره فرانسې ته د رسېدلې الوتکې په لاندینۍ برخه (لنډینګ ګئیر) کې موندلی او له هغه وروسته د روغتون ځانګړې پاملرنې په څانګه کې بستري کړی دی.

دا الوتکه د الجزائر له اوران هوايي ډګره د فرانسې پلازمېنې پاریس اورلې هوايي ډګر ته له دوه نیم ساعته سفر وروسته ورسېده او یاد یې سړی د لنډینګ ګیئر په برخه کې وموندل شو.

د هوايي ډګر یوه مسوول کس اې ایف پي خبري اژانس ته ویلي، کله چې دا سړی چارواکو ولید د هائپوترمیا (یو بیړنی روغتیايي وضعیت چې د انسان بدن د حرارت له سخت کمښت سره مخامېږي) له شدته ځورېده.

امنیتي چارواکي وايي، دې سړي د پېژندګلوۍ هېڅ ډول اسناد نه درلودل، ځکه یې عمر هم نه معلومېږي.

د فرانسې په ځینو رپوټونو کې د دې سړي عمر د ۲۰ او ۳۰ کلونو تر منځ یاد شوی، خو ځینې نور رپوټونه بیا وايي، د ۱۵ کلونو زلمی معلومېږي.

د ځايي څارنوالۍ دفتر له لوري ویل شوي دي، دا سړی په کریتیل سیمه کې هینري موندور روغتون ته لېږدول شوی دی.

د الوتکې په لاندینۍ برخه کې سفر کول خورا خطرناکه چاره بلل کېږي. کله چې الوتکه په هوا کې سفر کوي، پر برسېرنه اډانه یې د تودوخې درجه تر منفي ۶۳ درجو په رسېدای شي، چې له کبله یې د سختې هائبوترمیا او اکسیجن د شدید کمښت خطر رامنځته کېږي.

په ۲۰۱۹ کال کې د لندن د یوه کور پر سر همداسې یو مړی وموندل شو، چې له کینیا نه د لندن هیترو هوايي ډګر ته پر لار الوتکې له لنډینګ ګئیره لاندې غورځېدلی و.

په ۲۰۲۲ کال کې بیا له سویلي افریقا د امسټرډام شیپول هوايي ډګر ته د یوې رسېدلې الوتکې په ټائرونو کې یو سړی ژوندی موندل شوی و.