پر ډیورنډ کرښه تازه نښتې شوې دي
د عکس سرچینه، Getty Images
د افغانستان سوېل ختیځ کې د پکتیا له ډنډ پټان ولسوالۍ رپوټونه وايي چې له تېرو څو ساعتونو راهیسې د افغانستان د طالبانو حکومتي ځواکونه له پاکستاني ځواکونو سره په جګړه کې ښکېل وو.
د طالبانو حکومت امنیتي سرچینو هم بيبيسي ته منلې چې پوځیانو او پوله ساتو ځواکونو یې له پاکستاني اړخ سره نښتې کړې دي.
سرچینو دغو نښتو کې پاکستاني ځواکونو ته د مرګژوبلې اړولو ادعا هم کړې ده.
بيبيسي ته لېږل شوې یوه ویډیو کې ښکاري چې د طالبانو حکومت ځواکونو پر کرښه د پاکستاني ځواکونو لوري ته راکټ او د درنو توپونو مرمۍ واروي.
د افغانستان دولتي خبري اژانس(باختر) د طالبانو حکومت د سرچینو له قوله د ۷ پاکستاني سرتېرو د وژل کېدو ادعا کړې ده.
باختر د ځايي خلکو له نکله ویلي چې سیمه کې حالت بېرته عادي شوی دی.
د پاکستان حکومت د دغه ادعا او دې نښتو په تړاو څه نه دي ویلي.
لا خو روښانه نه ده چې دا نوې نښتې د څه له امله شوي او چا لومړی برید کړی دی.
د تېر کال اکټوبر راهیسې چې د پاکستان او افغانستان ترمنځ کړکېچ پراخ شوی پر ډیورنډ کرښه د دواړو لوریو ترمنځ وخت ناوخت درنې خونړۍ نښتې شوې دي.
پاکستاني رسنیو هم کرمه ایجنسۍ کې پر کرښه د بریدونو رپوټونه ورکړي او ویلي یې دي چې پاکستاني "پاکستان د "طالبانو" پر حکومتي ځواکونو ځوابي بریدونه کړې دي.
