د کرېکټ د نړیوال جام سیالیو کې افغانستان بنګله دېش ته د ۱۵۷ منډو هدف وټاکه

د هند د درم شالا ښار کې ددې لوبې ټاس یا پچه د بنګله دېش کپتان وګټله او خپله یې د توپ اچوونې پرېکړه وکړه. افغان لوبډلې په ۳۷ اعشاریه دوو اوورونو کې د ټولو لوبغاړو له سوځېدو وروسته ۱۵۶ منډې وکړې او بنګله دېش ته یې د ۱۵۷ منډو هدف وټاکه.

د افغان لوبډلې پیل ښه و، خو وروسته یې لوبغاړي په چټکۍ وسوځېدل. تر ټولو ډېرې منډې په کې رحمان الله ګوربز وکړې خو نور لوبغاړو ژر وېکټې له لاسه ورکړې.

ګوربز په دغه لوبه کې په ۶۲ بالونو ۴۷ منډې وکړې، ابراهیم ځدراڼ بیا ۲۲ منډې، حشمت الله شهیدي او رحمت شاه هر یوه ۱۸ منډې جوړې کړې. عظمت الله عمرزي هم په ۲۰ بالونو ۲۲ منډې وکړې.

دواړه لوري به هڅه کوي چې د نړیوال جام د پیل د لوبې ګټلو سره په دې سیالیو کې ښه مورال سره راتلونکې لوبې وکړي.

پرون د افغان لوبډلې کپتان حشمت الله شهیدي خبري کانفرانس ته ویلي و، له بنګله دېش سره لوبې ته بشپړ چمتو والی لري، د اسیا جام کې بنګله دېش سره له خپلو لوبو زده کړه کړې او د مقابل لوري کمزوري ټکي يې په نښه کړې دي.

نوموړي وویل، لوبډله به پوره هڅه کوي چې دا سیالي وګټي.

دا د ۲۰۲۳ کال نړیوال جام سیالیو درېیمه لوبه ده.

له دې وړاندې لومړنیو دوو سیالیو کې نیوزلینډ انګلنډ او پاکستان هالیڼد ته ماتې ورکولو سره دوه دوه پواینټوڼه ترلاسه کړي دي.

د افغانستان په ننني ټیم کې رحمان الله ګوربز ویکټ ساتونکی، ابراهیم ځدران، رحمت شاه، راشد خان، محمد نبي، حشمت الله شهیدي کپټان، نوین الحق، فضل حق فاروقي، نجیب الله ځدران او عظمت الله عمرزی دي.

د افغانستان ددې جام دویمه لوبه به د چارشنبې په ورځ له کوربه هند سره وي.

تر اوسه پورې تېرو دوو نړیوالو جامو کې افغانستان ۱۵ لوبې کړې او یواځې یوه یې ګټلې ده.