کرېکټ؛ له ۱۹ کالونو څخه د کم عمره ځوانانو اسیايي جام اتلولي بنګله دېش وګټله

له ۱۹ کالونو څخه د کم عمره ځوانانو د اسیايي اتلولیو په پایلوبه کې متحده عربي امارات او بنګله دېش له یوه بل سره مخ وو چې بنګله دېشۍ هغې کوربنې لوبډلې ته د ۱۹۵ منډو په لوی توپېر ماته ورکړه.

د دغې برخلیک ټاکونکي لوبې ټاس کوربه عربۍ لوبډلې وګاټه خو بنګله دېش ته یې لومړۍ د توپ وهنې وار ورکړ چې ورپسې له ۱۹ کالونو څخه کم عمره بنګله دېشۍ لوبډلې په ټولو ۵۰ اورونو کې د اتو لوبغاړو په سوځېدو ۲۸۲ منډې جوړې کړې.

دا په ښکاره دغو سیالیو کې ستر هدف و چې د متحده عربي اماراتو لوبډله یې په په پوره کولو کې له یوې مخې پاتې شوه.

د دغه ستر هدف پوره کولو په تعقیب د متحده عربي اماراتو لوبډلې ۸۷ منډې وکړې او په ۲۴ اوور کې یې ټول لوبغاړي وسوځیدل.

د بنګله دېش د سر پیلوونکي (اوپنر) لوبغاړي ۱۲۹ منډې وکړې او د پای په اورونو کې وسوځېد.

عاشق الرحمان شېبلي د لوبډلې وېکټ ساتونکی هم دی.

د هغه تر څنګ د بنګله دېش دوه نورو تنیکو ځوانانو هم پنځوسیزې جوړې کړې او دغه ستر هدف ته یې د لوبډلې په رسولو کې مهم رول ولوباوه.

د توپ اچونې پر مهال هم د بنګله دېش دوه لوبغاړو د سیالې لوبډلې درې - درې او ورپسې دوه نورو د سیالې دوه دوه لوبغاړي وسوځول او کوربنه لوبډله یې دغه هدف ته د رسیدو په لار یوازې په ۸۷ منډو تم کړه.

دا لومړۍ ځل دی چې د پاکستان، هند، شري لنکا او افغانستان غوندې پیاوړو لوبډلو له منځه متحده عربي امارات او بنګله دېش د داسې مهمو اسیايي سیالیو پایلوبې ته ځانونه رسولي وو.

له دې وړاندې د جمعې په ورځ متحده عربي امارتو پاکستان او بنګله دېش بیا هند ته له ماتې ورکولو سره پای لوبې ته لار ومونده.

له ۱۹ کالونو څخه د کم عمره ځوانانو افغان لوبډلې بیا په ګروپي سیالیو کې یوازې یوه لوبه له نیپاله ګټلې وه او له مخکې تګه پاتې وه.

په دغه پړاو سیالیو کې لومړۍ هند او ورپسې پاکستان افغان لوبډله ماته کړې وه.

دا سیالۍ چې په پنځوس اوریزه بڼه وې د راتلونکي نړیوال جام لپاره د چمتووالي او ځآن ازمویلو ښه پړاو بلل کېږي.

له ۱۹ کالونو څخه د کم عمره ځوانانو نړیوال جام راتلونکي میاشت د نړۍ له لر او بره د ۱۶ لوبډلو تر منځ تر سره کېږي.