د ازموینو ملي ادارې نوی مشر: هڅه کوو ټاکلي معیارونه پیاوړي او د ځوانانو حق خوندي کړو
د عکس سرچینه، National Examination Auth AFG
د طالبانو حکومت کې د لوړو زدکړو مخکني چارسمبالي وزیر مولوي عبدالباقي حقاني چې ځینو څرګندونو یې غبرګونونه پارولي وو، د ازموینو ملي ادارې د مشر په توګه دنده پیل کړه.
هغه په دې مناسبت جوړه شوې غونډه کې ژمنه وکړه چې ټاکلي معیارونه به پیاوړي کوي او هڅه به یې دا وي چې د ځوانانو حق ضایع نه شي.
ښاغلی حقاني د پوهاند عبدالقدیر خموش پر ځای چې په دې اداره کې یې د نږدې لسو کالونو کار تجربه لرله، پر دې دنده ګومارل شوی دی.
د ازموینو ملي ادارې نوي مشر دې ادارې لپاره د ښاغلي خموش خدمتونه وستایل خو زیاته یې کړه چې د تېرو څو لسیزو جګړو کې د افغانستان تعليمي ادارې ډېرې ﺯيانمنې شوې.
بلخوا ښاغلي خموش بیا دې غونډه کې د طالب چارواکو پر دې څرګندونو چې ګواکې د نوي مشر په ټاکلو سره کار اهل کار ته سپارل شوی، ظاهرآ په یوه ډول ناخوښي وښوده خو ژر یې خپله خبر واړوله.
د عکس سرچینه، National Examination Auth AFG
پر طالبانو د حکومتي چارو پر مخ بیولو کې یوه لویه نیوکه داده چې د مسلکي او په کار پوه خلکو پر ځای خپل کسان پر دندو ګوماري.
طالبانو ته د پړې ګوته نیول کیږي چې په تدریج مسلکي کسان له دولتي اداروه ګوښه کوي او یايي اړ کوي چې له دندې لاس په سر شي.
خو طالبان بیا وايي د واک په تر لاسه کولو یې دا حق دی چې خپل کسان وګوماري خو نورو مسلکي کسانو ته هم په خپله اداره کې ځای ورکوي او اړتیا ورته لري.
د طالبانو حکومت د چارو ادارې لوی رييس شيخ نورالحق انور د اﺯموينو ملي ادارې د نوي مشر د معرفۍ غونډه کې ویلي "دا اداره هم په تعليمي برخه او هم د راتلونکي نظام پر جوړښت او پياوړتيا باندې ځانګړې اغېزې درلودلى شي."
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
بلخوا د طالبانو حکومت د لوړو زدکړو چارسمبالي وزیر ندا محمد ندیم چې بلخ کې د پوهنتون لیلیې ودانۍ پرانستلو په اړه یوې غونډې ته ویلي چې د افغانستان امریکايي پوهنتون نوم یې بدل کړی او د افغان نړیوال پوهنتون نوم یې پرې اېښې دي.
د افغانستان امریکايي پوهنتون په ۲۰۰۶ کال کې رامنځته شوی وو. د یاد پوهنتون انټرنیټي پاڼه لا هم فعاله ده او په کې ویل شوي چې د دوی له نیمايی زیات محصلین د عراق کردستان ، بشکیک کې د منځنۍ آسیا لپاره امریکايي پوهنتون او امریکا کې بارډ کالج کې زدکړې کوي.
دغه راز یو شمیر یې د نړۍ له نورو برخو انلاین زدکړې کوي.
د عکس سرچینه، afmohe
د افغانستان امریکایي پوهنتون پر پاڼه لیکلي شوي چې راتلونکی کال به دوحه کې خپله څانګه، د افغانستان د څېړنې انیسټیټیوټ پرانیزي او په افغانستان کې دننه او بهر به د خپلو محصلینو لپاره د انلاین زدکړو پروګرامونه پراخ کړي.
د افغانستان امریکایي پوهنتون ویلي ورته وخت کې یې هغه ننګونې او خطرونه له پامه نه دي غورځولي چې افغانستان کې پاتې محصلین او د دوی کارکوونکي ورسره مخامخ دي.
د دغه پوهنتون پر پاڼه لیکل شوي چې د ټولو د خوندیتوب لپاره دوامداره هیڅې کوي.
