تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
اوکراییني ځواکونو یو روسي سرتېری خارکیېف کې له ۶ میاشتې پټ ژوند وروسته نیولی
اوکرایین کې پولیسو یو روسی سرتېری نیولي چې وايي شپږ میاشتې یې خارکیېف کې پټ ژوند تېر کړی.
د اوکراییني پولیسو ځايي څانګې ویلي، د دوی ځواکونو دغه ۴۲ کلن سړی د خارکیېف کوپیانڅک ناحیه کې د ګزمې پر مهال درولی دی.
کوپیانڅک تېره سپتمبر میاشت کې بېرته د اوکراییني ځواکونو لاس ته کېوت.
دغه روسي سرتېري پولیسو ته ویلي چې له هماغې راهیسې یې دغلته د جګړې له کبله تشو شویو ودانیو کې پټ ژوند کاوه.
د پولیسو اعلامیه کې راغلې چې له دغه سړي نورې څېړنې روانې دي.
کوپیانڅک کې د اورګادو یو مهم جنکشن پروت دی.
دا سیمه تېر کال د روسیې یرغل له پیل راهیسې د سختو جګړو شاهده ده.
روسي ځواکونو د جګړې د پیل ورځو کې دا سیمه لاندې کړه او څو میاشتې یې کنټرول کې وه.
اوکراییني ځواکونو که څه هم د خارکیېف دا سیمه تېره سپتمبر میاشت کې بېرته ونیوه، خو اوس هم هره ګړۍ دا خطر شته چې روسیه به یې د بېرته نیولو هڅه وکړي.
اوکراییني چارواکو له همدې کبله د روان مارچ لومړیو کې د دې ځای ځینو اوسېدونکو ته د وتلو امر وکړ.
د خارکیېف ځايي ادارې مشر اولېګ سینېګوبوف د سې شنبې پر ورځ هم ویلي، چې روسي ځواکونو پر دې او ورڅېرمه نورو سیمو درانه راکټي بریدونه کړي دي.