اټک کې د ښوونځي پر موټر ډزو کې دوه نجونې وژل شوې، پنځه ماشومان او موټر چلوونکی ټپيان دي

د پاکستان د پنجاب ایالت په سرحدي ولسوالۍ اټک کې د ښوونځي پر یوه موټر د ناپېژاندو کسانو په ډزو کې دوه زدکوونکې وژل شوې او د پنځو ماشومانو په ګډون شپږ تنه ټپیان شوي دي.

د اټک د پوليسو ویاند ویلي، دا پېښه نن پنجشنبه سهار شاوخوا نهه بجې د چشتي کلا د غره په لمن کې ديريکوټ کلي ته څېرمه شوې ده.

نوموړي زیاته کړې چې په دغه بريد کې د ښوونځي موټر چلوونکی هم ټپي شوی دی.

په پېښه کې د وژل شويو او ټپي ماشومانو عمرونه د څلورو او دولسو کلونو ترمنځ دي.

د ژغورنې ۱۱۲۲ ډلې ټپیان او مړي د اټک روغتون ته لېږدولي.

بریدګر د پېښې له ځایه په تېښته بریالي شوي، خو پولیسو سیمه کلابنده کړې او وايي لټون یې پیل کړی دی.

تر اوسه معلومه نه ده، چې برید چا کړی دی.

د اټک د پوليسو وياند عزيزالله خان بي بي سي ته وويل د لومړنيو معلوماتو له مخې، موټر چلوونکي دښمني لرله، خړ په دې اړه نورې څېړنې روانې دي.

د پنجاب اعلي وزیرې مريم نواز شريف د راولپنډۍ له کېمشنر څخه د پېښې په اړه رپورټ غوښتی او د ژوبلو کسانو درملنې لپاره یې اړینې لارښونې کړې دي.

پاکستان کې په وروستیو څو کلونو کې امنیتي پېښې ډېرې شوې دي، چې د امنیتي ځواکونو تر منځ پکې پر ملکي وګړو او بهرنیانو هم بریدونه شوي دي.

د ترسره شويو څېړنو له مخې په تېرو دريو کلونو پاکستان کې نه یوازې دا چې وسله وال بریدونه ډېر شوي بلکې وسله والو د خپلو بریدونو تاکتیکونه هم بدل کړي دي.

پاکستاني چارواکي ادعا کوي چې له افغانستانه د ناټو او امريکايي ځواکونو تر وتلو وروسته ځینې عصري وسلې او جنګي الات د پاکستاني طالبانو تحريک (ټي‌ټي‌پي) وسله والو لاس ته ورغلي او دوی همدغه وسلې پاکستان کې د بریدونو لپاره کاروي.

خو په افغانستان کې د طالبانو حکومت وايي له بهرنیو ځواکونو او د مخکېني حکومت له پوځ او نورو امنیتي ادارو ورپاتې وسلې خوندي دي.