داعش د ابوالحسین القریشي وژل کېدل او د هغه د ځایناستي نوم اعلان کړ

اسلامي دولت نومې ډلې (داعش) د سوریې په شمال کې د خپل مشر ابوالحسین الحسین القریشي وژل تائید کړي دي. دغه ډله وايي، ابوحفص الهاشمي القریشي نومی سړی یې د هغه ځایناستي په توګه ټاکلی دی.

دا خبر د داعش نوي ویاند ابو حذیفه انصاري په یوه غږیز پیغام کې تائید کړی، چې په ټیلګرام خواله رسنۍ کې خپور شوی دی. نوموړی په دې پیغام کې وايي، چې ابوالحسین القریشي په ادلیب سیمه کې د ترکیې څارګرو ادارو له ''عواملو'' سره په نښته کې وژل شوی دی.

داسې ښکاري چې دا په ادلیب سیمه کې د سوریې ولسمشر بشار الاسد حکومت وسله والې سخت دریځې مخالفې ډلې هیات تحریر الشام ته اشاره ده.

داعش ویاند وايي، له وژل کېدو وروسته د داعش ډلې مشر مړی ترکیې ته سپارل شوی دی. د یادونې ده چې د ترکیې ولسمشر رجب طیب اردوغان درې میاشتې مخکې د ترکیې استخباراتو په عملیاتو کې د ابو الحسین القریشي وژل کېدو خبره کړې وه.

د داعش ډلې نوی ویاند وايي، د دې ډلې مخکینی ویاند ابو عمر المهاجر هم د ترکیې ځواکونو نیولی دی. د یادونې ده چې ابوالحسین القریشي د تېر کال نومبر کې د داعش ډلې مشرتابه ته رسېدلی و. دی د دې ډلې درېیم مشر دی چې ځان ته پخپله (خلیفه) وايي او له دوو کلونو په کمه موده کې وژل کېږي. نوموړي په تېرو څو میاشتو کې چې د دې ډلې مشري یې کوله هېڅ پیغام نه و خپور کړی.

د داعش نوی ویاند د دې ډلې له پلویانو غوښتي چې له نوي مشر سره ''بیعت'' رسماً اعلان کړي. د یادونې ده، چې ابوحفص هم هغسې یو مستعمار نوم دی، چې د دې ډلې مخکینیو مشرانو د ځان لپاره غوره کول.

داعش وسله والو په ۲۰۱۴ کال کې د سوریې او عراق پراخې سیمې تر خپل کنټرول لاندې راوستې، پولي واحد، پاسپورټ او خپل قضايي نظام یې فعال کړ او ځان یې یو نړیوال خلافت باله.

که څه هم دا ډله د هغه وخت پرتله اوس ډېره کمزورې شوې، خو د افغانستان په ګډون یې په ځینو هېوادونو کې لا هم وسله وال غړي فعال دي او اندېښنې یې راپورته کړې دي.