چارسده کې قران ته د سپکاوي له ادعا وروسته تاوتريخوالی: د پوليسو تاڼې ته اور اچول شوی

د خيبرپښتونخوا د چارسدې په تنګي سيمه کې د قران کريم د سپکاوي په تور له تاوتريخالي ډک لاريونونه پيل شوي دي.

د عيني شاهدانو په وينا، قهرېدليو مظاهره چيانو د پوليسو پر يوه مرکز له بريد وروسته هغه ته اور واچاوه او زيان يې ورته واړاوه.

د جهانګير پوليسو تاڼې مشر بهرام شاه په وينا، په سیمه کې داسې اوازې وې چې يوه کس د قران کريم سپکاوی کړی دی. پوليسو سره د لومړنی راپور له ثبت کېدو وروسته دغه کس نيول شوی او پلټنې ترې پیل شوې.

نوموړي زياته کړه کله چې خلک د دې کس له نيولو خبر شول، د پوليسو مرکز ته ورغلل او د تورن کس د ورسپارلو غوښتنه يې کوله.

د عيني شاهدانو په وينا، د يکشنبې له سهار راهيسې په سیمه کې د قران کريم د سپکاوي اوازې خپرې شوې وې او بيا ماښام په سيمه کې دا خبره خپره شوه دغه کس د پولیسو مرکز ته وړل شوی دی.

عيني شاهدان وايي، د پوليسو مرکز مخې ته ګڼ شمېر خلک راټول شول او غوښتنه يې کوله چې تورن کس دې ور وسپارل شي.

لومړی خلکو د دغه کس د ورسپارلو نارې وهلې او بيا ناڅاپه لاريون کوونکي په غوسه شول او د پوليسو د تاڼې ودانۍ ته يې اورو واچاوه او نژدې پوستې ته يې هم زيان ورسېد.

د يوه بل عيني شاهد په وينا، پوليسو تر ډېره د مقاومت هڅه کوله خو د لارې بندېدو له امله مرسته ورته ونه رسېده او د لاريون کوونکو شمېر مخ په زياتېدو و.

ويل کېږي چې لاريون کوونکو پر پوليسو هم بريد کړی دی.

چارسده کې د ځایي خبريال اکبر مومند په وينا، د قران کريم د بې حرمتۍ د ادعا په اړه بېلابېلې اوزاې وې. ځينې راپورونه وايي چې پېښه د شنبې پر ماښام او ځينې بیا د یکشنبې سهار يادوي.

پولیس له تورن کس سره له تاڼې وتلي دي خو د علي اکبر په وينا د پولیسو په تاڼه کې ټولو وسايلو ته اور اچول شوی دی.