طالبانو سره د مذاکره کوونکې ډلې غړې فوزیې کوفي د ترور هڅه
د عکس سرچینه، .
د ولسي جرګې پر پخوانۍ غړې فوزیه کوفي د کابل په شمال کې برید شوی دی.
پر اغلې کوفي دغه برید پرون د کابل په پنځوس کيلومترۍ کې د کابل پروان پر لار د قره باغ په سیمه کې شوی دی.
د رپوټونو له مخې، مېرمن کوفي په لاس برسېرنه ټپي شوې ده او روغتون ته د درملنې لپاره وړل شوې ده.
د یادولو ده چې فوزیه کوفي د دولت له لوري له طالبانو سره د مذاکره کونکي ټیم غړې هم ده چې تمه ده دغه خبرې په څو راتلوونکو ورځو کې پېل شي.
د حکومت له لوري د مذاکره کوونکې ډلې مشر معصوم ستانکزي پرون جمعه (زمری ۲۴/ اګست ۱۴) پر خپله ټویټر پاڼه د بريد د پخلي تر څنګ لیکلي چې د مېرمن کوفي روغتیایي حالت ښه دی.
د ده په خبره، امنیتي ځواکونه به دغه پېښه وڅېړي او مالومات به يې له خلکو سره شریک کړي.
ولسمشر محمد اشرف غني هم پر فوزيه کوفي دغه شوی برید غندلی دی.
د یادولو ده چې اغلې کوفي د بشري او د ښځو د حقونو له فعالو مېرمنو حسابېږي او په تېر کې دوه دورې په ولسي جرګه کې د بدخشان د خلکواستازې هم وه.
تر اوسه مالومه نه ده چې دغه بريد چا کړی دی او وسله والو طالبانو هم په دغه برید کې لاس لرل رد کړي دي.
