टुँडिखेलमा प्रधानमन्त्री ओलीले के भने?
तस्बिर स्रोत, RSS
गणतन्त्र दिवस २०८२ का अवसरमा सैनिक मञ्च टुँडिखेलमा आयोजित विशेष समारोहमा प्रधानमन्त्री केपी शर्मा ओलीले सम्बोधन गरेका छन्।
गणतन्त्र “हजारौँ जनताको बलिदानबाट र त्यागबाट” आर्जन गरिएको स्मरण गर्दै उनले यो जनताको व्यवस्था भएकाले “यसमा यदि कमजोरी भयो भने गणतन्त्रको होइन, निर्णयकर्ताको कमजोरी” हुन सक्ने र “निर्णयमा हुने कमजोरीलाई निर्णयबाटै सच्याउने सुविधा” भएको बताएका छन्।
“मुकुटको हुकुमी आदेशबाट सञ्चालन हुने राज्यप्रणाली भत्काएर जनताको मुटुले गरेको निर्णयबाट चल्ने प्रणाली स्थापित गरेका हौँ। हाम्रो समाजले हासिल गरेको त्यस गौरवपूर्ण दिवसको मूल्य हामीले कहिल्यै बिर्सनु हुँदैन, बिर्सने छैनौँ।”
“....राजतन्त्रलाई प्रश्नभन्दा माथि राखिन्थ्यो, गणतन्त्रमा आलोचनाबाहिर कोही रहन्नन्। आज तपाईँ सरकारको आलोचना गर्न सक्नुहुन्छ, गर्न पाउनुभएको छ। हामी सरकार बदल्न पाउँछौँ, निडर भएर लेख्न बोल्न पाउँछौँ। अर्काको अधिकारमा दख्खल नदिई आफ्नो अधिकारको वकालत गर्न पाउँछौँ। किनभने हामी गणतन्त्रमा छौँ। यही स्वतन्त्रता, यही उत्तरदायित्व हाम्रो शक्ति हो।”
उनले गणतन्त्रलाई नारामा नभई व्यवहारमा संस्थागत गर्दै लैजानुपर्नेमा जोड दिएका छन्।
“गणतन्त्र कुनै दलको स्वामित्व होइन, यसको मालिक जनता हो। लोकतान्त्रिक गणतन्त्र ‘जनताको लागि, जनताद्वारा, जनताको’ शासन प्रणाली हो।... राम्रो वा नराम्रोको उत्तरदायित्व पनि जनताकै हातमा छ। जनताको अधिकार र उत्तरदायित्वको संयोजन गर्न सक्दा मात्र गणतन्त्रले हाम्रो सुन्दर देश नेपाललाई विकास समृद्धि र सुशासनको अत्युत्कर्षमा पुर्याउन सक्ने छ।”
