नोर्थ क्यारलाइना, जोर्जा, पेन्सिल्भेनिआ र विस्किन्सिनजस्ता महत्त्वपूर्ण 'स्विङ स्टेट' आफ्नो पक्षमा उभिएपछि डोनल्ड ट्रम्प अमेरिकाको राष्ट्रपति निर्वाचित हुने निश्चित भएको छ। यद्यपि मतगणनाको अन्तिम र औपचारिक परिणाम घोषणा हुन बाँकी नै छ।
केशव कोइराला, सञ्जय ढकाल, विष्णु पोखरेल र दिवाकर प्याकुरेल
यो निर्वाचनको परिणामले अमेरिकी कङ्ग्रेसका दुवै सदनमा कुन पार्टी बलियो हुन्छन् भन्ने पनि निर्क्योल गर्ने छ।
यो निर्वाचनमा डेमोक्र्याटहरूको नियन्त्रणमा रहेको माथिल्लो सदन सिनेटको लगभग एकतिहाइ सीटका लागि प्रतिस्पर्धा भएको छ भने रिपब्लिकनहरूको बहुमत रहेको तल्लो सदन हाउस अफ रेप्रिजेन्टेटिभ्सका सबै ४३५ सीटमा प्रतिस्पर्धा भइरहेको छ।
अमेरिकामा मतदान सकिएपछि अहिले मतगणना जारी छ। तर विजेताको नाम थाहा पाउन किन अझ केही घण्टा वा दिन वा साता लाग्न सक्छ?
पढ्नुहोस् विस्तारमा
ताजा विवरणहरूका अनुसार डोनल्ड ट्रम्पले महत्त्वपूर्ण स्विङ स्टेट नोर्थ क्यारोलाइनामा जित हासिल गर्दै १६ इलेक्टोरल कलेज मत पाएका छन्।
ट्रम्प अभियानको निम्ति यो सुखद समाचार हो किनभने यसले उनलाई आवश्यक न्यूनतम २७० इलेक्टोरल कलेज भोट पाउने मार्ग थप प्रशस्त गर्छ।
तर कडा प्रतिस्पर्धा हुने ठानिएका राज्यमध्ये अधिकांशमा नतिजा यस्तै हुन्छ भन्न सकिने स्थिति छैन। ती सात राज्यको परिणामले उम्मेदवारलाई ह्वाइट हाउस पुग्ने बाटो खोलिदिन्छ।
'रस्ट बेल्ट स्टेट' भनिने विस्कन्सिन, पेन्सिल्भेनिआ र मिशिगन तीनवटै राज्यमा जितिन् भने कमला ह्यारिसले अझै पनि बाजी मार्न सक्छिन्।
रिपब्लिकनहरूका निम्ति नोर्थ क्यारलाइनाको जित ठूलो हो तर उक्त राज्यमा विगतका चुनावी नतिजाहरूसँग भने यो प्रवृत्ति मेल खान्छ। सन् २०१६ र सन् २०२० मा पनि यहाँ ट्रम्पले जितेका थिए।
यो राज्य जित्ने पछिल्लो डेमोक्र्याटिक उम्मेदवार भनेको सन् २००८ मा बराक ओबामा हुन्।
डोनल्ड ट्रम्पले धेरै जसो स्विङ स्टेटमा निकै राम्रो मत ल्याएको देखिएको छ।
जोर्जा, नोर्थ क्यारलाइना र पेन्सिल्भेनिआमा धेरै मत गनिसक्दा उनी अगाडि छन्।
एरिजोना र विस्कन्सिनमा उनी थोरै मतले अगाडि छन्। त्यहाँ पनि आधाभन्दा धेरै मत गनिसकिएको छ।
यसबीच मिशिगन राज्यमा ३२ प्रतिशत भोट गनिसक्दा कमला ह्यारिस अगाडि छिन्।
अमेरिकाको पश्चिमी तटमा अवस्थित लगायत सबैजसो राज्यहरूमा मतदान सकिएको छ भने हवाई र अलास्कामा मतदान सकिन केही बेर लाग्ने छ।
आधाभन्दा धेरै राज्यमा कसले जित्छ भनेर प्रक्षेपण गरिसकिएको छ।
हालसम्म ती प्रक्षेपण अपेक्षाबमोजिम नै छन्। डोनल्ड ट्रम्पले परम्परागत रिपब्लिकन राज्यहरूमा फेरि जितेका छन् भने कमला ह्यारिसले पनि परम्परागत डेमोक्र्याटिक राज्यहरू आफ्नो पोल्टामा पारेकी छन्।
अमेरिकामा कुल ५० राज्य छन्।
नमस्कार। संयुक्त राज्य अमेरिकामा भएको राष्ट्रपति निर्वाचनसँग सम्बन्धित विषयवस्तु प्रकाशित गरिने यो 'लाइभ पेज'मा तपाईँलाई स्वागत छ।
आज हामी यो पेजमा भर्खरै मतदान सम्पन्न भएको निर्वाचन र जारी मतगणनासँग सम्बन्धित महत्त्वपूर्ण ताजा जानकारी दिने छौँ।
