२७० जनाको शव भेटिएको प्रहरीको भनाइ
नेपाल प्रहरीले सार्वजनिक गरेको पछिल्लो विवरणअनुसार भोटेकोशी-त्रिशूली बाढीका कारण मारिएका मध्ये हालसम्म कम्तीमा २७० जनाको शव प्राप्त भएको थाहा भएको छ।
तपाईँ अहिले हाम्रो वेबसाइटको थोरै डेटा प्रयोग हुने ‘टेक्स्ट-ओन्ली’ साइटमा हुनुहुन्छ। सबै तस्बिर र भिडिओसहित मूल वेबसाइटमा जान यहाँ क्लिक गर्नुहोस्।
मूल वेबसाइट तथा पूरा संस्करणमा जानुहोस्।
हाम्रो वेबसाइटको थोरै डेटा प्रयोग हुने संस्करणबारे थप जान्नुहोस्।
मृतकको सङ्ख्या बढ्दो क्रममा, भोटेकोशी नदीमा फेरि बाढी 'आउन सक्ने जोखिम'
रसुवामा बुधवार स्थानीय भोटेकोशी नदीमा अचानक आएको विनाशकारी बाढीका कारण धनजनको ठूलो क्षति भएको छ।
सारांश
- रसुवाको भोटेकोशी नदी र तल त्रिशूलीमा बुधवार आएको बाढीका कारण धनजनको ठूलो क्षति
- क्षतिबारे विवरण आउने क्रम जारी
- बिहीवार दिउँसोसम्म ३५९ जनाको शव फेला परेको नेपाल प्रहरीद्वारा पुष्टि
- ९०० जनाभन्दा बढी मानिस 'अझै सम्पर्कविहीन'
लाइभ कभरेज
बेपत्ताको खोजीका लागि ब्यारेकमा आफन्तको भीड
नुवाकोटको विदुरमा रहेको सैनिक ब्यारेकमा बाढीमा बेपत्ताहरूको खोजीका लागि नाम टिपाउन आफन्तको भीड लागेको छ।
विदुर आसपासका मानिसहरू श्री नं १ सैनिक तालिम केन्द्रमा पुगेर आफन्तको खोजीका लागि नाम टिपाइरहेका छन्।
राष्ट्रिय विपद् जोखिम न्यूनीकरण तथा व्यवस्थापन प्राधिकरणले हालसम्म ८२६ जना सम्पर्कविहीन रहेको जनाएको छ।
सम्पर्कविहीनमध्ये सबैभन्दा धेरै ५७९ जना पर्यटक छन्।
बाढीपछि ८५ जना सुरक्षाकर्मी सम्पर्कविहीन रहेको प्राधिकरणले जनाएको छ।
तीमध्ये नेपाली सेनाका ४४ जना, नेपाल प्रहरीका २८ जना र सशस्त्र प्रहरीका १३ जना सम्पर्कविहीन छन्।
अस्पतालमा नअट्ने भएपछि चितवनमा शव राख्न छुट्टै ठाउँको व्यवस्था
जिल्ला प्रशासन कार्यालय चितवनले भरतपुरस्थित औद्योगिक व्यवसाय विकास प्रतिष्ठानको पुरानो भवनलाई शव संरक्षणस्थलका रूपमा प्रयोग गर्ने भएको छ।
चितवनका प्रमुख जिल्ला अधिकारी गणेश अर्याललाई उद्धृत गर्दै राष्ट्रिय समाचार समितिले अस्पतालमा पर्याप्त स्थान नभएका कारण प्रतिष्ठानको भवन प्रयोग गर्न लागिएको उल्लेख गरेको छ।
जिल्ला प्रशासन कार्यालयले हालसम्म ७३ वटा शव चितवनमा मात्रै भेटिएको उल्लेख गरेको छ।
शव सुरक्षित राख्न आवश्यक बरफ सहितका सामग्रीको व्यवस्था चितवन उद्योग वाणिज्य सङ्घ र रत्ननगर उद्योग वाणिज्य सङ्घले उपलब्ध गराउने राससले जनाएको छ।
प्रतिष्ठानको भवनअगाडि पाल टाँगेर अस्थायी कक्ष स्थापना गरी बेपत्ता व्यक्तिको खोजी, शव पहिचान तथा आफन्तलाई शव बुझाउने काम गरिने भएको छ।
४५ विदेशीसहित ३३६ जनाको हवाई उद्धार
रसुवामा आएको बाढीका कारण प्रभावित ३३६ जनाको हवाई उद्धार गरिएको नेपाली सेनाले बिहीवार दिउँसो जनाएको छ।
झन्डै ४,००० सैनिकहरूको समन्वयमा घाइतेको खोज तथा उद्धार, आपत्कालीन उपचार र राहत वितरणको काम भइरहेको नेपाली सेनाका प्रवक्ता राजाराम बस्नेतले राष्ट्रिय समाचार समितिलाई बताए।
बिहानदेखि रसुवाको टिमुरे, धुन्चे र मैलुङ इलाकाबाट विभिन्न ६ देशका ४५ विदेशीसहित सेनाले हेलिकप्टरमार्फत् उद्धार गरेको हो।
'उद्धार र पुर्नस्थापना'मा सघाउन दलहरूद्वारा अन्तर्राष्ट्रिय समुदायलाई आह्वान
सत्तापक्षीय र विपक्षी दलहरूले बाढी प्रभावित स्थानमा उद्धार, राहत र पुर्ननिर्माणमा सघाउन अन्तर्राष्ट्रिय समुदायसँग आग्रह गरेका छन्।भोटेकोशी-त्रिशूली नदीमा आएको बाढीलाई "निकै ठूलो र अकल्पनीय" भन्दै दलहरूले संयुक्त रूपमा "उद्धार, राहत, पुनर्स्थापना तथा पुनर्निर्माणमा आवश्यक मानवीय, प्राविधिक तथा आर्थिक सहयोग उपलब्ध गराउन" आह्वान गरेका हुन्।
संयुक्त राष्ट्रसङ्घ, विकास साझेदार, अन्तर्राष्ट्रिय गैरसरकारी संस्था, मित्रराष्ट्र तथा प्रवासी नेपाली समुदायलगायतलाई सम्बोधन गर्दै उनीहरूले त्यस्तो आह्वान गरेका हुन्।
सत्तारूढ दल रास्वपाका सभापति रवि लामिछानेले सर्वदलीय बैठक बोलाएका थिए। यद्यपि सरकारले भने हालसम्म अन्तर्राष्ट्रिय सहयोगबारे औपचारिक रूपमा केही बोलेको छैन।
तर उसले प्रधानमन्त्री दैवी प्रकोप राहत कोषमार्फत् एकद्वार प्रणालीबाट मात्र सहयोग सङ्कलन गर्न भन्दै सूचना जारी गरेको छ।
हालसम्म सहायता प्रदान गर्नेमध्येको एक भारतले १० टन राहत सामग्री पठाएको छ भने अमेरिकाले ५ लाख डलर सहायताको वाचा गरेको छ।
'हराएका मानिसहरू जीवितै भेटिन्छन् कि भन्ने आशा छ', शक्तिमाया तामाङ, बीबीसी संवाददाता, नुवाकोट
म आज नुवाकोटको विदुर नगरपालिका वडा नम्बर २ स्थित श्री नम्बर १ तालिम केन्द्रमा छु।
हिजोदेखि नै यहाँ विभिन्न ठाउँबाट मानिसहरूलाई उद्धार गरेर ल्याई प्राथमिक उपचार गर्ने काम भइरहेको छ।
उद्धार गरेर ल्याइएकाहरूलाई खाद्यान्नको व्यवस्था गरिएको अधिकारीहरूले बताएका छन्।
उद्धार गरिएकाहरू भने आफ्नै आँखाअगाडि परिवारका सदस्यलाई बाढीले बगाएको भन्ने सुनाउँदै छन्। तैपनि उनीहरू कतै जीवित छन् कि भनेर सम्पर्क गर्न वा कतैबाट सूचना पाउने आशामा छन्।
सरकारले छिट्टै खोजिदिए हुन्थ्यो भन्ने आशा रहेको उनीहरूले बताएका छन्।पढ्नुहोस् विस्तारमा
दलाई लामाले के भने
भारत निर्वासनमा रहेका तिब्बती धर्मगुरु दलाई लामाले एउटा विज्ञप्ति जारी गर्दै हिजोको विनाशकारी बाढीको खबर सुनेर आफू "दुःखी भएको" बताएका छन्।
उक्त बाढीका कारण तिब्बतको केरुङ र नेपालका रसुवा तथा नुवाकोटसहितका जिल्लाहरूमा धनजनको ठूलो क्षति पुगेको छ।
"म मृत्यु हुने सबै जनाका लागि प्रार्थना गर्छु अनि शोकसन्तप्त परिवारजन र यो विपत्बाट प्रभावित सबैप्रति सहानुभूति एवम् हार्दिक समवेदना व्यक्त गर्छु," उनले भने।
उक्त क्षेत्रमा विगतमा पनि यस्ता विपत्तिहरू भएको उल्लेख गर्दै उनले ती घटनाहरू पक्कै पनि कुनै गहन अन्तर्निहित कारणको सङ्केत, चाहे त्यो जलवायु परिवर्तन होस् वा अन्य केही, भएको टिप्पणी गरे।
"यस्ता विपत्तिहरू दोहोरिन नदिनका लागि यथासम्भव उपयुक्त कदम चालिन्छ भन्ने म अपेक्षा गर्छु।"
दलाई लामा सन् १९५९ देखि निर्वासनमा बस्दै आएका छन्। बेइजिङले उनलाई विद्रोही र पृथक्तावादी मान्दै आएको छ।
८ जिल्लामा १७७ जनाको शव भेटियो
बुधवारको बाढीमा ज्यान गुमाएका मृतकको सङ्ख्या १७७ पुगेको नेपाल प्रहरीले जनाएको छ।
प्रहरीका अनुसार आठ जिल्लामा मानिसहरूका शव फेला परेका हुन्।
चितवनमा त्रिशूली र नारायणी नदीले बगाएर ल्याएका शवहरू सर्वाधिक सङ्ख्याम भेटिएको हो।
- चितवन - ६९
- नवलपरासी पूर्व - ३२
- धादिङ - २७
- गोरखा - २०
- नुवाकोट - १२
- तनहुँ - ९
- नवलपरासी पश्चिम - ६
- रसुवा - २
स्रोत : नेपाल प्रहरी
तिब्बतमा ५५८ जना सम्पर्कविहीन
तिब्बतको केरुङ काउन्टीमा बुधवार बाढीपछि सम्पर्कविहीन हुनेहरूको सङ्ख्या ५५८ पुगेको सरकारी टेलिभिजन सीसीटीभीले जनाएको छ। तीमध्ये २६० जना विदेशी नागरिक हुन्।
अहिलेसम्म तिब्बतमा तीन जनाको मात्र मृत्यु भएको अधिकारीहरूले पुष्टि गरेका छन्।
उद्धारका लागि परिचालित चिनियाँ टोलीहरूले अहिलेको प्राथमिकता विनाश भएको क्षेत्रभन्दा माथिपट्टि नदी थुनिएर बनेको तालको स्थिरता रहेको बताएका छन्।
त्यसका लागि एउटै उपाय भनेको नदी थुन्ने अवरोध हटाउनु भएको उनीहरूले 'सदर्न मेट्रोपोलिस डेली'लाई बताएका छन्।
थुनिएको ताल भत्कियो भने फेरि बाढीले अर्को विपद् निम्तिन सक्ने आशङ्का गरिएको छ।
हालसम्म सम्पर्कबाहिर रहेका पर्यटकको सङ्ख्या ६४४
नेपाल पर्यटन बोर्डले दिएको ताजा जानकारीअनुसार भोटेकोशी नदीमा आएको बाढीका कारण हालसम्म सम्पर्कमा नआएका पर्यटकहरूको सङ्ख्या ६४४ रहेको छ।
सबैभन्दा धेरै भारतीय पर्यटक १७८ जना सम्पर्कविहीन भएको बोर्डका प्रवक्ता सुनील शर्माले बीबीसीलाई बताए।
त्यस्तै १२७ जना नेपाली पर्यटक अनि ६५ जना अमेरिकी, ३५ जना अस्ट्रेलियाली तथा ३३ जना यूकेका पर्यटक पनि सम्पर्कबाहिर रहेको उनले बताए।
“हामी सम्बन्धित निकायहरूसँग मिलेर उनीहरूको खोजी तथा उद्धारकार्यको समन्वय गरिरहेका छौँ,” शर्माले भने।
नेपाल पर्यटक प्रहरीका डीएसपी विश्वराज अधिकारीले विभिन्न टूर अपरेटरहरूसँग त्यस क्षेत्रमा गएका पर्यटकहरूको जानकारी लिने काम भइरहेको बताए।
रसुवाबाट हालै उद्धार गरिएका २३ जना पर्यटकलाई नुवाकोटमा ल्याइएको पनि उनले जानकारी दिए। तर उनीहरू कुन देशका थिए भन्ने जानकारी आइनसकेको उनले बताए।
तिब्बतस्थित कैलास मानसरोवर जाने मार्गमा बाढीको प्रभाव परेको थियो। कतिपय पर्यटक चाहिँ लाङटाङ क्षेत्रको स्याफ्रुबेँसी तथा गोसाईँकुण्ड यात्रामा रहेको बताइएको छ।
यसअघि नेपाली सेनाले टिमुरे क्षेत्रमा हराइरहेका २१ जना भारतीय पर्यटकको पनि उद्धार गरी काठमाडौँ ल्याउने क्रम जारी रहेको भनेर प्रधानमन्त्री कार्यालयको सचिवालयले जनाएको थियो।
बाढी प्रभावित ठाउँका केही तस्बिर
नुवाकोटको त्रिशूली बजारआसपास मानिसहरू बाढीको लेदोले पुरेका ठाउँ र क्षति पुर्याएका घरहरूमा जान थालेका छन्।
उद्धारकर्ताहरूले हराइरहेका मानिसहरूको खोजी जारी राख्दा सर्वसाधारणले पनि बाढी पसेका क्षेत्रमा आफ्ना सरसामानको खोजी गरेको देखिएको छ।
राहत सामग्री पठाउन थालियो
नुवाकोटमा रहेको नेपाली सेनाको ब्यारेकमा सरकार र दाताहरूबाट प्राप्त राहत सामग्री पुर्याइएको छ।
विभिन्न ठाउँबाट उद्धार गरिएका मानिसहरूलाई नुवाकोटको श्री नं १ सैन्य तालिम केन्द्र 'मैथली ब्यारेक'मा राखिएको छ।
प्रधानमन्त्री शाह नुवाकोट पुगे
प्रधानमन्त्री वालेन्द्र शाह 'बालेन' बाढी प्रभावित क्षेत्रको स्थलगत निरीक्षणका लागि नुवाकोटको विदुर पुगेका छन्।
राष्ट्रिय समाचार समितिले प्रधानमन्त्री शाह, पूर्वाधार विकासमन्त्री सुनील लम्साल नुवाकोटको श्री नं १ सैन्य तालिम केन्द्र 'मैथली ब्यारेक'मा पुगेको जनाएको छ।
प्रधानमन्त्री शाहले नुवाकोटको विदुर र आसपासका प्रभावित बस्तीहरूको निरीक्षण गर्ने योजना रहेको उनको सचिवालयले जनाएको छ।
बाढीका कारण रसुवा र नुवाकोट जिल्लामा धनजनको ठूलो क्षति पुगेको छ।
रसुवाको सीमापारि तिब्बतमा '२.५ किलोमिटर लामो पहिरो', वर्षा र भौगोलिक विकटताका कारण उद्धारकार्यमा बाधा
तिब्बतमा प्रतिकूल मौसम र भौगोलिक विकटताका कारण उद्धारकार्य प्रभावित भएको चिनियाँ पक्षले जनाएको छ।
चीनको सरकारी प्रसारक सीसीटीभीले सरकारी अधिकारीहरूलाई उद्धृत गर्दै तिब्बतको केरुङ काउन्टीमा गएको पहिरो नेपाल-चीन सीमाबाट २.५ किलोमिटर टाढासम्म फैलिएको र त्यो झन्डै १.५ मिटर गहिरो रहेको जनाएको छ।
उक्त पहिरोका कारण तिब्बततिर उद्धार गर्ने प्रयासमा ठूलो बाधा पुगेको अधिकारीहरूको भनाइ छ।
"यो क्षेत्रमा अग्ला हिमाल र जलाधार क्षेत्र भएका गहिरा उपत्यकाहरू छन्। त्यसैले [जारी] वर्षाले ठूलो अनिश्चितता ल्याउन सक्छ," उक्त रिपोर्टमा भनिएको छ।
केरुङ पोर्ट र दिङ्ग्री विमानस्थललाई जोड्ने बाटो भएको क्षेत्रमा आगामी तीन दिनसम्म निरन्तर वर्षा हुने मौसमविद्हरूको पूर्वानुमान छ।
त्यसबाट पनि उद्धारकार्य कठिन बन्ने देखिन्छ। पहाडी भेगमा सडकहरू साँघुरा भएकाले ठूला सवारीसाधन र भारी उपकरणहरू परिचालन असहज भएको अधिकारीहरूले बताएका छन्।
जथाभावी हेलिकप्टर नउडाउन निर्देशन
बाढीका कारण प्रभावित क्षेत्रमा जारी खोज तथा उद्धारकार्यमा प्रयोग भइरहेका निजी कम्पनीका हेलिकप्टरहरूलाई सरकारी निकायसँग समन्वय गर्न सरकारले पत्राचार गरेको प्रधानमन्त्रीको सचिवालयले जनाएको छ।
प्रधानमन्त्रीको सचिवालयका अनुसार जथाभावी उडान गर्दा हुन सक्ने सम्भावित हेलिकप्टर दुर्घटना र अन्य प्राविधिक समस्याहरूलाई दृष्टिगत गर्दै त्यस्तो निर्णय लिइएको हो।
"आफ्नै हिसाबले सञ्चालन हुँदा उक्त क्षेत्रमा हवाई ट्राफिक बढेर दुर्घटनाको जोखिम हुने भएपछि राष्ट्रिय विपद् जोखिम न्यूनीकरण तथा व्यवस्थापन प्राधिकरणले रसुवा, नुवाकोट, गोरखा, धादिङ र चितवनका जिल्ला प्रशासन कार्यालयहरूलाई पत्राचार गर्दै हेलिकप्टरबाट खोज तथा उद्धार गर्नुपर्ने अवस्थामा जिल्ला सुरक्षा समितिले आवश्यक निर्णय गरी व्यवस्थित ढङ्गले कार्य अघि बढाउन भनिएको छ," सचिवालयले एउटा विज्ञप्तिमा भनेको छ।
सेनाको हेलिकप्टर उडाउनुपर्ने अवस्था आएमा समितिले सम्बन्धित जिल्लाको नेपाली सेनाको टोलीसँग समन्वय गर्नुपर्ने तथा निजी हेलिकप्टर आवश्यक परेको खण्डमा प्राधिकरणले तोकेका सम्पर्क व्यक्तिहरूसँग सम्पर्क गरी तुरुन्त उद्धारको व्यवस्था मिलाउन निर्देशन दिइएको छ।
८५ जना सुरक्षाकर्मी सम्पर्कविहीन
भोटेकोशी-त्रिशूली बाढीपछि ८५ जना सुरक्षाकर्मी सम्पर्कविहीन रहेको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ।
प्राधिकरणका अनुसार सुरक्षा निकाय, पर्यटक र सर्वसाधारण गरी ८२६ जना सम्पर्कविहीन छन्।
तीमध्ये सबैभन्दा धेरै नेपाली सेनाका ४४ जना सम्पर्कविहीन रहेको प्राधिकरणले जनाएको छ।
त्यसै गरी नेपाल प्रहरीका २८ जना र सशस्त्र प्रहरीका १३ जना सम्पर्कविहीन छन्।
अहिलेसम्म हामीलाई के थाहा छ?
सीमावर्ती जिल्ला रसुवामा तिब्बत हुँदै आएको भोटेकोशी र तल त्रिशूली नदीमा बुधवार बिहान आएको विनाशकारी बाढीपछि बिहीवार बिहानसम्म कम्तीमा १६५ जनाको शव फेला परेको र सयौँ मानिस अझै सम्पर्कविहीन रहेको राष्ट्रिय विपद् जोखिम न्यूनीकरण प्राधिकरणले जनाएको छ।
प्रहरीका अनुसार रसुवा, नुवाकोट, धादिङ, गोरखा, तनहुँ, चितवन, नवलपरासी पूर्व र नवलपरासी पश्चिममा शवहरू फेला पर्ने क्रम जारी छ।
प्रभावित स्थानबाट उद्धार गरिएका ४१ जनालाई काठमाण्डू र नुवाकोटको त्रिशूलीमा उपचारार्थ भर्ना गरिएको प्रहरीले जनाएको छ।
प्राधिकरणले जनाए अनुसार पर्यटकहरू र विभिन्न निकायका सुरक्षाकर्मीहरूसहित ८२६ जना सम्पर्कविहीन छन्। तीमध्ये पर्यटकको सङ्ख्या ५७९ रहेको प्राधिकरणले जनाएको छ।
नेपाली सेनाका अनुसार रसुवा र नुवाकोटमा घाइते र जोखिममा परेका मानिसहरूलाई बिहानदेखि हेलिकप्टरबाट उद्धार गर्न थालिएको छ।
विभिन्न जलविद्युत् आयोजनाका कर्मचारी र सर्वसाधारण नागरिकहरूको उद्धार गर्न सेनाका हेलिकप्टरहरू खटेका छन्।
रसुवाको टिमुरे क्षेत्रबाट ९५ जनाको र हाकुस्थित एउटा जलविद्युत् आयोजनाको सुरुङमा फसेका सात जनाको जीवितै उद्धार गरिएको पनि सेनाले जनाएको छ।
प्रधानमन्त्री वालेन्द्र शाह आज बिहान ९ः३० बजे बाढी प्रभावित क्षेत्र नुवाकोटको विदुरतर्फ स्थलगत निरीक्षणका लागि काठमाण्डूबाट हिँडेको उनको सचिवालयले जनाएको छ। उनीसँगै पूर्वाधार विकास मन्त्री सुनिल लम्साल पनि छन्।
प्रधानमन्त्री बालेन गाडीबाट नुवाकोट जाँदै
प्रधानमन्त्री वालेन्द्र शाह बालेन बाढी प्रभावित क्षेत्रको स्थलगत निरीक्षणका लागि नुवाकोटको विदुर हिँडेका उनको सचिवालयले जनाएको छ।
प्रधानमन्त्रीसँगै पूर्वाधार विकासमन्त्री सुनिल लम्साल पनि नुवाकोट गएका छन्।
प्रधानमन्त्री शाहले नुवाकोटको विदुर र आसपासका प्रभावित बस्तीहरूको निरीक्षण गर्ने योजना रहेको उनको सचिवालयले जनाएको छ।
स्थानीय प्रशासन, सुरक्षा निकाय र जनप्रतिनिधिसँग राहत, पुनर्स्थापना र अवरुद्ध पूर्वाधार सञ्चालनबारे प्रधानमन्त्रीको टोलीले छलफल गर्ने बताइएको छ।
बाढीका कारण रसुवा र नुवाकोट जिल्लामा धनजनको ठूलो क्षति पुगेको छ।
जलविद्युत् आयोजनाको सुरुङबाट सात जनाको जीवितै उद्धार
रसुवाको हाकुस्थित एउटा जलविद्युत् आयोजनाको सुरुङमा फसेका सात जनाको जीवितै उद्धार गरिएको नेपाली सेनाले जनाएको छ।
अन्य तीनवटा सुरुङमा फसेकाहरूको पनि उद्धार गर्ने प्रयास भइरहेको नेपाली सेनाले जनाएको छ।
सेनाका अनुसार रसुवाको टिमुरे क्षेत्रबाट ९५ जनाको सकुशल उद्धार गरिएको छ।
८०० जनाभन्दा धेरै सम्पर्कविहीन
रसुवाको भोटेकोशी-त्रिशूली बाढीमा ८०० जना भन्दा धेरै सम्पर्कविहीन रहेको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ।
प्राधिकरणका अनुसार सुरक्षा निकाय, पर्यटक र सर्वसाधारण गरी ८२६ जना सम्पर्कविहीन छन्।
बाढीपछि सम्पर्कविहीन रहेकामध्ये सबैभन्दा धेरै ५७९ जना पर्यटक छन्। नेपाली सेनाले चीनसँगको सीमा नजिकैको टिमुरे क्षेत्रमा हराइरहेका २१ जना भारतीय पर्यटकको जीवितै उद्धार गरिएको जनाएको छ।