चुनावको खर्चः उम्मेदवारको खर्च बाहेक २० अर्ब रुपियाँको चुनाव
प्रतिनिधिसभा र प्रदेश सभा चुनाव सम्पन्न गर्नका लागि २० अर्ब भन्दा बढी रुपियाँ निर्वाचन आयोग र सुरक्षा निकायका लागि सुनिश्चित गरिएको अर्थ मन्त्रालयको विवरणमा उल्लेख छ।
निर्वाचन आयोगलाई १० अर्ब रुपियाँ खर्चको सीमा तोकिएको छ।
गृह मन्त्रालय र मातहतका कार्यालय र नेपाल प्रहरी एवं सशस्त्र प्रहरी बल समेतका लागि ९ अर्ब १ करोड रुपियाँ छुट्टाइएको छ।
नेपाली सेनालाई ९७ करोड ७३ लाख र राष्ट्रिय अनुसन्धान विभागलाई ५ करोड ७३ लाख स्रोत सुनिश्चित गरिएको छ।
कति खर्च भयो भन्ने कुरा निर्वाचन आयोगले चुनावी कार्यक्रम सम्पन्न भएपछि सार्वजनिक गर्ने गरेको छ।
निर्वाचन आयोगले उम्मेदवारको निर्वाचन खर्चको अधिकतम हद तोकेको छ।
त्यसमा प्रतिनिधिसभामा प्रत्यक्षतर्फ निर्वाचन क्षेत्र अनुसार २५ देखि ३३ लाख रुपियाँ र समानुपातिकमा २ लाख रुपियाँ प्रति उम्मेदवारको सीमा तोकिएको छ।
प्रदेशसभा निर्वाचनमा प्रत्यक्षतर्फका उम्मेदवारहरूले १५ देखि २३ लाख रुपियाँसम्म र समानुपातिकतर्फ १ लाख ५० हजार रुपियाँ प्रति उम्मेदवार खर्च गर्न मिल्ने व्यवस्था छ।
चुनावी प्रचारका लागि तोकिएको खर्च हदको तुलनामा कैयौँ गुणा बढी खर्च हुने गरेको भनि बेलाबेला चिन्ता व्यक्त हुने गरेको छ।
