Spòrs

Tha Kerry Nic a' Phì ri rothaireachd-beinne ann an sgìre Atlas de Mhoroco oidhche Haoine far a bheil i gu bhith a' siubhal fad còrr is 800 mìle thairis air nas lugha na seachdain.

Cluinnear tuilleadh bho Kherry air Spòrs na Seachdain Disathairne air BBC Radio nan Gàidheal agus air BBC Sounds

Tha feadhainn a tha an sàs ann an iomain òigridh anns an Eilean Sgitheanach ag ràdh gu bheil cunnart mòr ann gun toir riaghailtean ùra aig Comann na Camanachd droch bhuaidh air an spòrs am measg dhaoine òga.

Bha cead aig sgoiltean beaga roimhe aon sgioba a chur gu farpaisean nuair nach robh robh barrachd na 150 clann air clàr nan sgoiltean sin uile gu lèir.

Tha sin a-nise air a ghearradh gu 80 sgoilear an dà chuid airson farpaisean a-staigh agus am-muigh.

Ged a tha an Comann ag ràdh gu bheil dleasdanas orra siostam a chur an sàs a tha cothromach dhan a h-uile sgìre - thuirt aon choidse às an Eilean Sgitheanach gun nochd an sgioba aige aig na Farpaisean Nàiseanta a-staigh aig deireadh na mìos - riaghailtean ùra ann no às.

Bhruidhinn Gilleasbuig MacDhòmhnaill ri Keith MacCoinnich bho Sgioba Iomain Cheann a Deas an Eilein Sgitheanaich is Bruce Crawford bho Sgioba Iomain Cheann a Tuath an Eilein Sgitheanaich

Tha fios a-nise cò bhios a' cluich cò ann an Cupa an t-Sutharlannaich, prìomh fharpais nan dàrna sgiobaidhean ann an iomain nam fear.

An-uiridh 's iad An Gearasdan a bhuannaich an cupa is iad air a' chùis a dhèanamh 6-4 air Ceann Loch Seile ann an geama air leth sa chuairt dheireannaich.

Tha an taghadh am-bliadhna mar a leanas:

A' Chiad Chuairt - 04/04/26

• Cabar Fèidh - Inbhir Nis

• Ceann Loch Seile - Gleann Urchadain

• Cill Mhàilidh - Loch Abar

• Glaschu Meadhan Earra-Ghàidheal - Uddingston

• Sruighlea - Eilean Bhòid

• Srath Chura-Dùn Omhain - Tatha is For

An Dàrna Cuairt - 09/05/26

• Ceann a' Ghiùthsaich - A' Mhanachainn

• Cabar Fèidh/Inbhir Nis - Baile Ùr an t-Slèibh

• Loch Carran - Camanachd an Eilein Sgitheanaich

• Lòbhat - Ceann Loch Seile/Gleann Urchadain

• Inbhir Aora - An Gearasdan

• Lochside Rovers - Cill Mhàilidh/Loch Abar

• Caol Bhòid - Srath Chura-Dùn Omhain/Tatha is For

• GMA/Uddingston - Sruighlea/Eilean Bhòid

Tha Comann na Camanachd is Comann Camanachd nam Ban air clàr nan geamaichean airson seusan 2026 a sgaoileadh gu na clubaichean is an seusan ùr a-nise a' teannadh dlùth.

Ann am Prìomh Lìog nam fear, tha geama inntinneach dha-rìribh ann gus toiseach an t-seusain a chomharrachadh is Camanachd an Eilein Sgitheanaich gus tadhal air Ceann a' Ghiùthsaich.

'S e cuideachd a' chiad gheama farpaiseach a bhios aig Kings fo stiùir Raghnaill Rois.

Aig deas, bidh a' chiad gheama aig Caol-Gleann sa Phrìomh Lìog aig an taigh an aghaidh Chinn Loch Seile.

Thèid an tuilleadh eachdraidh a dhèanamh air an dàrna Disathairne den t-seusan nuair a nì Caol-Gleann an turas goirid gu Taigh na Bruaich 'son cluich an aghaidh nan nàbaidhean aca Chaol Bhòid, a' chiad gheama eatorra sa Phrìomh Lìog.

Tòisichidh Prìomh Lìog nam fear air an t-seachdamh là den Mhàrt leis na geamaichean seo:

• Caol-Gleann - Ceann Loch Seile

• An Gearasdan - Cabar Fèidh

• Ceann a' Ghiùthsaich - Camanachd an Eilein Sgitheanaich

• Loch Abar - Caol Bhòid

• Camanachd an Òbain - Baile Ùr an t-Slèibh

Tòisichidh Camanachd Leòdhais an seusan acasan ann an Lìog Tuath 2 le turas dhan Mhanachainn.

Tha aca ri feitheamh gun 2na den Chèitean airson a' chiad gheama lìge aca aig an taigh agus tha sin an aghaidh Loch Abair.

Tòisichidh seusan nam ban cuideachd air deireadh-seachdain an 7mh is 8mh den Mhàrt.

Tha Loch Abar - a bhuannaich an tiotal an-uiridh ann an geama play-off an aghaidh Bhàideanach - a' tòiseachadh aig an taigh an aghaidh nan Sgitheanach.

Bidh sùilean mhòran an uairsin air geama mòr eadar na h-Abraich is Bàideanach air an dàrna deireadh-sheachdain den t-seusan.

Gheibh Prìomh Lìog nam ban gu dol leis na geamaichean seo:

• Gleann Urchadain - Glaschu Meadhan Earra-Ghàidheal

• Inbhir Nis - Bàideanach

• Loch Abar - Camanachd an Eilein Sgitheanaich

Tha dùil gun tèid am fiosrachadh air fad fhoillseachadh air làraichean-lìn nam buidhnean oifigeil ann an ùine nach bi ro fhada.

Tùs an deilbh, SNS

Thog Ross County trì puingean cudromach oidhche Mhàirt is iad a' soirbheachadh 1-0 an aghaidh Queen's Park aig Lesser Hampden.

'S e Uche Ikpeazu a chuir an tadhal às dèidh 79 mionaidean is e air tighinn far na beingidh air a' chiad gheama aige dha County bho chuir e ainm ri cùmhnant Diluain.

Tha na trì puingean a' togail Chounty far bhonn an Championship is os cionn Queen's Park.

"Tha sinn air ar dòigh," thuirt manaidsear Chounty, Stuart Kettlewell.

"Geama teann ach tha mi a' smaointinn gun robh na cothroman as fheàrr againne. Rinn Uche fìor mhath is 's e tadhal air leth a bh' ann".

Chan eil geama idir aig County air an deireadh-sheachdain is Cupa na h-Alba ann, is an ath gheama aca a-nise seachdain Disathairne nuair a chluicheas iad Queen's Park a-rithist, an turas seo ann an Inbhir Pheofharain.

Buille do Hearts ann am Pàislig

Ach ged a bha deagh oidhche aig Ross County oidhche Mhàirt, bha briseadh-dùil ann dha Hearts sa Phrìomh Lìog is iadsan a' call 1-0 ri St Mirren.

Bha sgioba Dhùn Èideann air a dhol sìos gu deichnear sa chiad leth is Craig Halkett air a chur far na pàirce sa chiad leth, is St Mirren mu dheireadh thall a' glèidheadh trì puingean cudromach dhaibh fhèin le tadhal anns na mionaidean mu dheireadh bho Miguel Freckleton.

"Chan fhaca mi Hearts a' cluich cho truagh siud fad an t-seusain," thuirt eòlaiche a' bhuill-choise Ailig O'Henley air Aithris na Maidne.

"Sin an treas geama a tha iad air a chall air an t-seusan seo san lìog ach tha iad air tilleadh air ais gu làidir is feumaidh iad sin a dhèanamh.

"Mura dèan iad an aghaidh Hibs is gu seachd-àraid an uairsin a' dol gu Ibrox tha mi a' smaointinn gum faodadh sinn tòiseachadh a-rithist bruidhinn mu dheidhinn Rangers no Celtic a dhol thairis orra."

Tùs an deilbh, SNS

Tha dithis chluicheadairean air Ross County fhàgail, goirid às dèidh do dh'Uinneag an Fhaoillich a dhùnadh.

Dhearbh an cluba Dimàirt gu bheil Gary Mackay-Steven is Nicky Clark air falbh.

Bha an dithis am measg na thug Don Cowie a-steach as t-samhradh an-uiridh, mus do chaill e fhèin a dhreuchd mar mhanaidsear.

• Mackay-Steven air ais aig County

• Thuirt Cowie gur ann a chùm maith Ross County a tha e gam fàgail

Rugadh Mackay-Steven, 35, ann an Inbhir Theòrsa is bha e ann an siostam òigridh Chounty na bhalach mus do ghluais e gu Liverpool aig aois 17.

Bha e air a chleachdadh far na beingidh sa mhòr-chuid anns na mìosan mu dheireadh.

Cha do thòisich Nicky Clark, 34, ach dà gheama lìge is cha d' fhuair e tadhal idir.

Bha County mar-tha air triùir chluicheadairean a thoirt a-steach dìreach mus do dhùin an uinneag.

Neartaich Ross County an sguad aca le dithis chluicheadairean a bharrachd mus do dhùin Uinneag a' Gheamhraidh oidhche Luain.

Thug na Staggies a-steach Jayden Carbon bho Middlesbrough is Kaedyn Kamara bho Preston North End.

Bidh an dithis air iasad ann an Inbhir Pheofharain gu deireadh an t-seusain.

'S e fear-aghaidh a th' ann an Carbon is bidh Kamara a' cluich ann am meadhan na pàirce.

Nas tràithe Diluain bha County air Uche Ikpeazu a thoirt a-steach bho St Johnstone.

Cha robh naidheachd sam bith ann a thaobh Chaley Thistle Diluain, ged a tha cothrom aig clubaichean san Championship is ann an Lìog 1 is Lìog 2 iasadan a thoirt a-steach bha chlubaichean eile ann an Alba 'son beagan sheachdainean fhathast.

Tùs an deilbh, Ross County

Tha Ross County air cur ris an sguad aca air thoiseach air dùnadh Uinneag an Fhaoillich le Uche Ikpeazu a thoirt a-steach bho St Johnstone.

Tha Ikpeazu, 30, air cluich do mhòran sgiobaidhean anns na bliadhnaichean mu dheireadh, Cambridge, Hearts, Cardiff, Middlesbrough, Wycombe agus Konyaspor nam measg.

Chluich e 24 geamaichean do St Johnstone is chuir e ceithir tadhail.

"Tha tòrr eòlais aig Uche is e air cluich ann an Alba agus Sasainn, cho math ri sia geamaichean a chluich do dh'Uganda," thuirt manaidsear Chounty Stuart Kettlewell.

"Bheir e dhuinn rudeigin diofraichte san loidhne-aghaidh - tha e gu math làidir is fiosaigeach agus tha e doirbh do luchd-dìon dèiligeadh ris".

Thuit County air ais gu bonn an Championship air an deireadh-sheachdain nuair a chaill iad 2-1 ri Morton.

Bha na Staggies air an dà gheama lìge mu dheireadh ron sin a bhuannachadh is air èirigh far a' bhuinn.

Tùs an deilbh, EPA/Shutterstock

"Am fleasgach òg is an seann saighdear" - 's e sin a ghabh an t-eòlaiche teanais Tormod MacLeòid air cuairt dheireannach Farpais Fhosgailte Astràilia eadar Carlos Alcaraz is Novak Djokovic.

Air a' cheann thall 's e am fleasgach òg Alcaraz a rinn an gnothach, a' tighinn am bàrr 2-6 6-2 6-3 7-5.

Aig 22 's e a-nise an duine as òige a tha air na ceithir farpaisean Grand Slam a bhuannachadh.

A' bruidhinn air Aithris na Maidne, rinn Tormod moladh mòr air Alcaraz is e air a' chlach-mhìle a ruighinn aig aois cho òg.

'S e briseadh-dùil a bh' ann dha Djokovic is an oidhirp aigesan eachdraidh a dhèanamh leis an 25mh tiotal Grand Slam aige a bhuannachadh, rud a chuireadh e seachad air Margaret Court.

An dèan e an gnothach air is e a-nise 38 bliadhna a dh'aois?

"Tha mi an-còmhnaidh a' creidsinn gu bheil teans agam aig na farpaisean Grand Slam," thuirt e às dèidh làimh.

Chan eil Tormod cho cinnteach.

"Tha mi a' smaoineachadh gur e siud 's dòcha a' chuairt dheireannach Grand Slam mu dheireadh a bh' aig Djokovic," thuirt esan.

Ann am farpais nam ban 's i Elena Rybakina a bha a' dèanamh gàirdeachais às dèidh dhi an gnothach a dhèanamh air Aryna Sabalenka 6-4 4-6 6-4.

'S e seo an dàrna Grand Slam aice is e a' tighinn ceithir bliadhna bhon bhuannaich i aig Wimbledon.

Thuirt Rybakina gun robh i an-còmhnaidh a' creidsinn gum b' urrainn dhi tilleadh chun na h-ìre as àirde.

Tùs an deilbh, SNS

Dhearbh Ross County gu bheil iad air Ronan Hale a reic ri Gillingham.

Tha an cluicheadair-aghaidh à Èirinn a Tuath air soirbheachadh gu math bho thàinig e gu County bho Chliftonville as t-samhradh 2024.

Bhon uairsin chuir e 30 tadhal ann an 68 geama, a dh'aindeoin nach robh County san fharsaingeachd a' dol ro mhath.

Chluich Hale do dh'Èirinn a Tuath 'son a' chiad uair an-uiridh is bha fathannan air a bhith a' dol anns na seachdainean mu dheireadh gum biodh e a' fàgail Inbhir Pheofharain.

Dhearbh County Diardaoin gun robh e air gluasad gu Gillingham airson suim nach deach fhoillseachadh.

Chuir Hale ainm ri cùmhnant dà bhliadhna gu leth leis na Gills, is roghainn aig a' chluba bliadhna eile a chur ris.

"Seo far a bheil mi airson mo bhall-coise a chluich is tha mi air dhòigh a bhith ann," thuirt Hale.

Tha Ross County air èirigh far bhonn an Championship bho chionn ghoirid is iad air seachd puingean a thogail bho na trì geamaichean mu dheireadh aca.

Anns an Spòrscast as ùire tha Dòmhnall Pollock le sùil a-steach air rannsachadh sgeulachd Mhàrtainn Mhic a' Phì agus mar a thog e, a-rithist, an t-aite a bh' aig cluicheadairean Albannach ann am ball-coise Shasainn.

Cluinnear an còmhradh gu lèir eadar Dòmhnall is Shona NicEanraig air Spòrscast an seo.

Tha Caley Thistle san iar-chuairt-dheireannaich de Chupa Dùbhlain na h-Alba às dèidh dhaibh an gnothach a dhèanamh air Stenhousemuir oidhche Mhàirt.

Cha robh ach aon tadhal sa gheama ann an Inbhir Nis is thàinig e bho Alfie Bavidge le 17 mionaidean air fhàgail.

Chaidh Raith Rovers troimhe cuideachd oidhche Mhàirt air breaban-peanais an aghaidh Queen's Park is an geama air crìochnachadh 1-1.

Feumaidh ICT feitheamh 'son faighinn a-mach cò na sgiobaidhean eile a bhios sa cheithir mu dheireadh ge-tà, oir chaidh na geamaichean eadar Obar Bhrothaig is Airdrieonians is eadar St Johnstone is Ayr United a chur dheth ri linn na h-aimsire.

Tùs an deilbh, Comann na Camanachd

Chaidh an taghadh a dhèanamh airson Cupa a' Bhaile Mhòir - farpais iomain airson na ciad sgiobannan iomain anns na roinnean fon Phrìomh Lìog.

Seo mar a chluicheas iad sa chiad chuairt:

• Glaschu Meadhan Earra-Ghàidheal - A' Mhanachainn

• Lòbhat - Obar Dhobhair

• Inbhir Aora - Srath Ghlais

Troimhe dìreach chun na dàrna cuairt:

• Eilean Bhòid

• Gleann Urchadain

• Cill Mhàilidh

• Ceiltich an Òbain

• Inbhir Nis

Thèid geamanan sa chiad chuairt a chluiche Disathairne 16mh den Chèitean.

Tùs an deilbh, SNS

'S e deireadh linn a th' ann ann an Taigh na Bruaich is Roddy Dòmhnallach air dearbhadh gu h-oifigeil nach bi e a' cluich iomain aig ìre na ciad sgioba tuilleadh.

Tha an Dòmhnallach, 37, air a bhith am measg shàr-chluicheadairean na spòrs san 20 bliadhna mu dheireadh aig àm nuair a bha Caol Bhòid tric a' farpais airson nan duaisean mòra.

'S e an là as iomraichte aige gun teagamh cuairt dheireannach Chupa na Camanachd ann an 2012 nuair a chuir e fhèin ceithir tadhail is Caol Bhòid a' soirbheachadh 6-5 an aghaidh Inbhir Aora.

Fhuair an Dòmhnallach bonn Albert Mhic a' Ghobhainn an là ud.

Gus cùisean a dhèanamh fiù 's nas sònraichte dha 's e athair fhein - Kenny - a bha eadar na puist do Chaol Bhòid.

Bhuannaich an cluba Cupa MhicAmhlaigh trì tursan anns na bliadhnaichean aige is iad cuideachd soirbheachail dha-rìribh ann an Cupa Comann Ceilteach Ghlaschu.

A thuilleadh air sin bha an Dòmhnallach tric ann an sgioba na h-Alba.

• Caol Bhòid 6 Inbhir Aora 5

Bha fathannan air a bhith a' dol gun robh e gus sguir a chluich is dhearbh e sin gu h-oifigeil ann an agallamh leis a' Phress and Journal, taobh a-muigh.

"Chluich mi a' mhòr-chuid den t-seusan mu dheireadh is mi air mo ghoirteachadh mun chruachainn is bha e doirbh dhomh coiseachd 'son là no dhà às dèidh gach geama," thuirt Roddy.

"Cha b'urrainn dhomh trèanadh ceart is chan eil e air fàs dad nas fheàrr. Tha e cuideachd air fàs trom a bhith a' siubhal à Glaschu gach seachdain.

"Ma gheibh mi fut is ma tha an sgioba gann cuidichidh mi ach tha mi an dòchas gum gum bi iad glan às m' aonais.

"Tha mi an dòchas cuideachadh leis an dàrna sgioba ach bidh sin a rèir mar a tha mo chruachann."

Aig an dearbh àm, dh'innis manaidsear Chaol Bhòid Grant Profit nach bi Seumas Pringle aca am-bliadhna is an Sgitheanach a' dol a dh'Astràilia, is gum bi Liam Arnott a-mach fad an t-seusain is e air a ghoirteachadh.

Thuirt Profit ge-tà, gu bheil e ag amas air an sgioba a neartachadh is gu bheil e misneachail mun t-seusan ùr.

Bha siud am measg nan ceistean a bh' aig Iain Moireasdan is an sgioba air Spòrs na Seachdain às dèidh do choidse ùr sgioba nam ban, Sione Fukofuka, sguad de 50 cluicheadair ainmeachadh airson campa trèanaidh air thoiseach air farpais Sia Dùthchannan nam ban.

Tha Iona NicIlleBhàin an dòchas gun tig buannachd às a' chrathadh a tha Fukofuka a' toirt air an sguad air a' cheann thall.

Gheibhear am prògram air fad an seo.

Tùs an deilbh, Comann na Camanachd

Le seusan na h-iomain a-nise air fàire tha Comann na Camanachd air fiosrachadh a dhearbhadh a sgaoileadh mu chuid de na cupanan eile.

Am measg nan geamaichean a thàinig às an ad ann an Cupa a' Chinn-chinnidh bidh Camanachd Leòdhais air falbh an aghaidh Tatha is For is an sgioba a bhuannaicheas gu bhith an aghaidh Loch Carran no Comann Camanachd Shasainn.

Tha an taghadh air fad ann an Cupa a' Chinn-chinnidh mar a leanas:

Thèid a' chiad chuairt a chluich air a' 25mh den Ghiblean.

• Oilthigh Obar Dheathain - Uddingston

• Baile a' Chaolais - Cille Mhoire

Thèid an dàrna cuairt a chluich air an 30mh den Chèitean.

• Loch Carran - Comann Camanachd Shasainn

• Tatha is For - Camanachd Leòdhais

• Gleanna Garradh - Àird nam Murchan

• Oilthigh Obar Dheathain/Uddingston - Baile a' Chaolais/Cille Mhoire

Thèid an iar-chuairt dheireannach a chluich air an 13mh den Ògmhios.

• Gleanna Garradh/Àird nam Murchan - Oilthigh Obar Dheathain/Uddingston/ Baile a' Chaolais/Cille Mhoire

• Loch Carran/Comann Camanachd Shasainn - Tatha is For/Camanachd Leòdhais

Rinneadh cuideachd an taghadh ann an Cupa Bhullough aig deas

Bidh a' chiad chuairt ann air an 18mh den Ghiblean

• Srath Chura-Dùn Omhain - Comann Camanachd Shasainn

• Tatha is For - Obar Dobhair

• Cille Mhoire - Sruighlea

• Uddingston - Lochside Rovers

Thèid an dàrna cuairt a chluich air an 30mh den Chèitean.

• Cille Mhoire/Sruighlea - Srath Chura-Dùn Omhain/Comann Camanachd Shasainn

• Inbhir Aora - Uddingsto/Lochside Rovers

• Caol Bhòid - Glaschu Meadhan Earra-Ghàidheal

• Tatha is For/ Obar Dobhair - Eilean Bhòid

Thèid an iar-chuairt dheireannach a chluich air an 11mh den Iuchar

• Tatha is For/Obar Dobhair/Eilean Bhòid - Cille Mhoire/Sruighlea/Srath Chura-Dùn Omhain/Comann Camanachd Shasainn

• Inbhir Aora/ Uddingston/Lochside Rovers - Caol Bhòid/Glaschu Meadhan Earra-Ghàidheal

Tùs an deilbh, Comann na Camanachd

Chaidh an taghadh a dhèanamh airson Cupa Shrath Èireann - farpais nan dàrna sgiobannan iomain aig tuath.

Thèid a' chiad chuairt a chluich air an 18mh là den Ghiblean.

• Lòbhat - Camanachd an Eilein Sgitheanaich

• Ceann Loch Seile - Cill Mhàillidh

• Loch Abar - An Gearasdan

• Cabar Fèidh - Inbhir Nis

• Ceann a' Ghiùthsaich - Gleann Urchadain

• A' Mhanachainn - Baile Ùr an t-Slèibh

Dìreach chun na h-ath-chuairt:

Loch Carrann

Camanachd Leòdhais

Thèid an dàrna cuairt a chluich air an 30mh là den Chèitean.

• A' Mhanachainn/Baile Ùr an t-Slèibh - Ceann Loch Seile/Cill Mhàillidh

• Cabar Fèidh/Inbhir Nis - Lòbhat/Camanachd an Eilein Sgitheanaich

• Ceann a' Ghiùthsaich/Gleann Urchadain - Loch Carrann

• Camanachd Leòdhais - Loch Abar/An Gearasdan

Tùs an deilbh, SNS

Thill Caley Thistle gu mullach Lìog 1 oidhche Mhàirt nuair a rinn iad an gnothach 2-0 air East Fife.

Thàinig na tadhail san 20 mionaid mu dheireadh bho Alfie Stiùbhart is Alfie Bavidge, a tha le chèile air iasad aig ICT à Obar Dheathain.

Bha còrr air mìos bho bhuannaich Inbhir Nis geama san lìog ach tha na trì puingean seo air an cur air ais aig bàrr na lìge, co-ionnan ri Stenhousemuir ach air thoiseach air tadhail is ICT cuideachd air geama nas lugha a chluich.

Bidh an ath gheama aca an aghaidh Alloa ann an Inbhir Nis Disathairne.

Bha deagh oidhche aig Alloa fhèin oidhche Mhàirt is iadsan air soirbheachadh 4-1 an aghaidh Mhon Rois.

Tùs an deilbh, Camanachd Leòdhais

Dhearbh Camanachd Leòdhais gu h-oifigeil gur iad Connor Chalmers is Donnie MacRath a bhios os cionn na sgioba air an t-seusan seo.

Bha beàrn ann is Donnchadh Mac an t-Saoir is Anndra MacAsgaill air innse san t-Sàmhain gum biodh iad a' seasamh sìos.

Bha Mac an t-Saoir air a bhith dà thuras na mhanaidsear air a' chluba is e air na Leòdhasaich a stiùireadh dhan àite as àirde aca san lìog a-riamh.

• Sgioba stiùiridh Camanachd Leòdhais air seasamh sìos

Ann an brath air na meadhanan sòisealta dh'innis Camanachd Leòdhais gu bheil Chalmers is MacRath air aontachadh an stiùir a ghabhail mar cho-mhanaidsearan.

Chluich Chalmers 'son a' chluba 'son a' chiad turas sa chiad sheusan aca san lìog ann an 2011 is tha e air cliù a chosnadh às ùr bho chaidh e eadar na puist ann an 2024.

Tha ceanglaichean làidir Hearach aig Donnie MacRath is tha e air na tadhail a fhrasadh a-steach bho chluich e dha na Leòdhasaich an toiseach ann an 2022.

Gu seo, chuir MacRath 61 tadhal ann an 61 geama dha Camanachd Leòdhais.

Tòisichidh an seusan ùr sa Mhàrt.

Tùs an deilbh, ICT

Thuirt manaidsear Chaley Thistle Inbhir Nis gu bheil e a' sùileachadh barrachd bhon sgioba aige an aghaidh East Fife san lìog oidhche Mhàirt às dèidh dhaibh a dhol a-mach à Cupa na h-Alba air an deireadh-sheachdain.

Chaill ICT ri Spartans bho Lìog 2 air breaban-peanais is an geama air crìochnachadh 0-0.

Thuirt Scott Kellacher gur e cothrom caillte a bha seo an sia deug mu dheireadh den chupa a ruighinn, is e a' tighinn cuideachd às dèidh sreath gheamannan nuair nach eil an sgioba air a bhith a' dèanamh cho math 's a bha.

"Briseadh-dùil mòr oir bha cothroman gu leòr againn an geama a bhuannachadh", thuirt Kellacher.

"Tha fòcas againn a-nise air East Fife san lìog oidhche Mhàirt. Feumaidh barrachd spionnaidh a bhith annain, barrachd spàirn".

Tha ICT an-dràsta san dàrna àite ann an Lìog 1, trì puingean air cùl Stenhousemuir, ach iad air dà gheama nas lugha a chluich.

Bha briseadh-dùil cuideachd aig a' chluba eile às a' Ghàidhealtachd a bha fhathast ann an Cupa na h-Alba is Ross County a' call 1-0 ri Tobar na Màthar.

Thuirt am manaidsear aca Stuart Kettlewell gun robh e ìre mhath toilichte le mar a chluich an sgioba aige ach gu bheil obair gu leòr ri dhèanamh fhathast.

Chan eil dad eile san amharc aige, thuirt e, ach an cluba a chumail san Championship.

Tha geama cudromach aig na Staggies san lìog Disathairne seo tighinn is iad a' siubhal gus Airdrieonians a chluich.

Tha na Daoimeanan an-dràsta ceithir puingean os cionn Chounty sa bhlàr aig bonn na lìge.

Saoil an e seo a' bhliadhna nuair a gheibh Bob Mac an t-Saoir às an Òban a làmhan air farpais Major?

Bha sin am measg nan cuspairean a bha fon phrosbaig aig Iain Moireasdan is an sgioba sa phrògram as ùire aca, is iad cuideachd a' bruidhinn ri Kerry Nic a' Phì is i a' coimhead air ais air farpais an Strathpuffer a bhuannaich i an t-seachdain seo chaidh.

Sin agus gu leòr eile!

Gheibhear am prògram slàn an seo: