Comhairlichean an aghaidh plana 'son loidhne-dealain mòr air Ghàidhealtachd

Chaidh fhàgail air SSEN Transmission nach eil "spèis sam bith aca" agus Comhairle na Gàidhealtachd air bhòtadh an aghaidh phlanaichean na companaidh airson loidhne-dealain 115 mìle a dh'fhaid eadar A' Mhanachainn is Ceann Phàdraig.

Ghabh buill Comataidh Dealbhachaidh a' Chinn a Deas gu h-aona ghuthach ri moladh oifigearan planaidh cur aghaidh nam planaichean.

Fo na planaichean, bhiodh 56 cilemeatair de loidhnichean-dealain a' ruith tron Ghàidhealtachd le crainn-dealain anns am biodh 58m a dh'àirde sa chumantas, a' cumail tacsa riutha.

Tha "tùr sònraichte" cuideachd an lùib nam planaichean. Bhiodh seo air làrach faisg air Slighe-Uisge a' Ghlinne Mhòir agus bhiodh 97m a dh'àirde ann.

Bhiodh na paidhleonan ùra rim faicinn bho Bhlàr Chùil Lodair.

Tha am pròiseact mar phàirt den obair mhòr aig SSEN lìonra agus bun-structar an dealain ùrachadh an ceann a tuath na h-Alba airson na bhios air a chruthachadh de chumhachd ath-nuadhachail.

Tha bheag a' chonnspaid a dh'adhbharaich pròiseact na companaidh sna coimhearsnachdan timcheall air bun-structar agus na loidhnichean ùra a bhiodh ann.

Thuirt fear-gairm Comhairle na Gàidhealtachd, Bill Loban, gun toir e "fìor dhroch bhuaidh air muinntir an àite agus an àrainneachd aca".

"Dhòmhsa dheth, thèid agam air smaoineachadh air co-dhiù 20 adhbhar gearain a chuirinn ris a' phaipear seo.

"Feumaidh an luchd-leasachaidh beachdachadh an ann mu dheidhinn an dòigh as saoire seo a lìbhrigeadh neo a bheil dòigh nas daoire ann a b' fheàrr leis a' chomataidh seo neo leis an riaghaltas."

Chaidh beachd iarraidh bho SSEN.