Briseadh-dùil a thaobh FtMG sna Crìochan

Tha pàrantan anns na Crìochan air briseadh-dùil fhaighinn agus comhairle na sgìre air innse nach tèid foghlam Gàidhlig aig ìre bun-sgoile a stèidheachdh ron ath bhliadhna-sgoile air sgàth 's gu bheil tuilleadh sgrùdaidh a dhìth.

Tha Màiri Anna Shanks am measg nam pàrantan a th' air a bhith ag iomairt gus foghlam Gàidhlig a thòiseachadh san sgìre.

Tha dithis chloinne aice, a tha còig agus seachd bliadhna a dh' aois. Chaidh i fhèin tro fhoghlam Gàidhlig.

"Tha fios agam dè dìreach cho cudromach 's a tha e do chloinn an cothrom sin fhaighinn," thuirt i.

"Tha mi ag iarraidh gum faigh mo chuid chloinne an aon chothrom 's a fhuair mise."

As t-samhradh an-uiridh, chuir na pàrantan iarrtas airson foghlam Gàidhlig do 33 duine cloinne gu Comhairle Chrìochan na h-Alba.

Rinn an t-ùghdarras ionadail an uairsin measadh agus chaidh co-dhùnadh a dhèanamh gun robh iarrtas gu leòr ann airson aonad Gàidhlig a stèidheachadh.

Chaidh aithisg air beulaibh chomhairlichean san t-Samhain an-uiridh a bha a' moladh an leithid a dhèanamh san Lùnastal am-bliadhna.

Leis an sin, bha làn-dùil aig pàrantan gum biodh foghlam Gàidhlig ri fhaotainn aig tòiseach na h-ath bhliadhna-sgoile.

Tha Mòrag NicIlleDhuinn nam measg agus i air a bhith an sàs san iomairt bho thòisich e. Tha a mac a' tòiseachadh san sgoil às dèidh saor-làithean an t-samhraidh.

Bha i fad mhìosan a' cur cheistean air a' chomhairle agus i ag iarraidh fiosrachaidh mu na planaichean aca. Bha i airson dearbhadh fhaighinn air càite am biodh an t-aonad Gàidhlig ùr.

Bha dùil aice gun tigeadh co-dhùnadh ro shaor-làithean na Càisge, leis gur ann an uairsin a tha na taghaidhean sgoile deireannach gan dèanamh. Ach cha tàinig càil.

"Tha a h-uile pàrant a tha seo againn le clann a tha a' dol dhan sgoil san Lùnastal," thuirt i.

"Feumaidh fios a bhith aca càite bheil iad a' dol."

"Gu h-àraid leis a' Ghàidhlig. Feumaidh fios a bhith aca a bheil iad a' dol a dh'fhaighinn foghlam tro mheadhan na Gàidhlig."

Thuirt Comhairle nan Crìochan gun deach moladh a chur air adhart san t-Samhain airson foghlam Gàidhlig a stèidheachadh san Lùnastal am-bliadhna.

Ach thuirt iad gun robh sin a-riamh an eisimeil tuilleadh sgrùdaidh gus faicinn an gabhadh a dhèanamh.

A rèir na comhairle, thàinig e am follais gu bheil dùbhlain mhòra ann a thaobh cosgais, luchd-obrach agus còmhdhail agus leis an sin, chan eil coltas ann gun gabh an t-amas a choileanadh.

Tha sgrùdadh a' leantainn ge-tà, gus aithisg a dheasachadh a thèid air beulaibh chomhairlichean.

Tha Comann nam Pàrant air a bhith a' cumail taic ri pàrantan san sgìre.

Tha iadsan den bheachd gum bu chòir dhan ùghdarras ionadail a bhith seachad air an ìre seo air sgàth 's gun robh iad air làn mheasadh a dhèanamh roimhe.

Tha iad cuideachd a' cur às leth na comhairle nach eil iad air am pròiseas a th' air a chur romhpa fon lagh a leantainn mar bu chòir.

'S i Maggie Wentworth ceannard na buidhne.

"Tha seo cho cudromach a thaobh a' phròiseis a th' againn," thuirt i.

"Chan eil còir laghail againn air foghlam tro mheadhan na Gàidhlig."

"Chan eil againn ach am pròiseas a tha seo far am faod pàrantan iarrtas a dhèanamh."

"'S e pròiseas fon lagh a tha seo. Mura h-eil a' chomhairle deònach am pròiseas a leantainn - càite bheil sinn?"

Ann am brath-naidheachd, thuirt Bòrd na Gàidhlig gu bheil iad air a bhith a' conaltradh ri Comhairle Chrìochan na h-Alba agus Riaghaltas na h-Alba.

Tha dùil aca taic agus comhairle a chumail riutha gus an tèid foghlam bun-sgoile tron Ghàidhlig a stèidheachadh san sgìre.

Thuirt an riaghaltas gu bheil còmhraidhean air a bhith aca leis a' chomhairle, gu bheil pròiseas ri leantainn agus gu bheil iad ag obair còmhla gus fòcas a chur air an seo.

Ach aig an ìre seo, chan eil cinnt no clàr-ama ann.

Tha dragh air Mòrag mun na tha san amharc dha mac agus e a' dol dhan sgoil a dh'aithghearr.

"Chan eil mi a' faireachdainn math mu dheidhinn a chur gu sgoil eile," thuirt i.

"'S dòcha gum fuirich e san sgoil sin 's nach bi cothrom aige a chaoidh Gàidhlig a bhruidhinn.

"'S dòcha gum faigh e air gluasad gu foghlam Gàidhlig uaireigin san àm ri teachd."

"Chan eil mi air a bhith a' faireachdainn math mun seo airson ùine mhòr a-nis."