Geàrr-chunntas

  • Bidh Alba ann am Buidheann C aig Cupa na Cruinne còmhla ri Brasil, Morogo is Haiti

  • Bidh an fharpais air a cluich anns na Stàitean Aonaichte, Canada is Meagsago

  • Tha dearbhadh ann a-nise air far an tèid geamaichean na h-Alba a chluich

  • Cluichidh Alba an aghaidh Haiti is Morogo ann am Boston agus bidh an geama an aghaidh Bhrasil ann am Miami

  • Bidh Sasainn còmhla ri Croatia, Ghana is Panama

  • Tha geamaichean play-off ri tighinn aig a' Chuimrigh, Èireann a Tuath is Poblachd na h-Èireann uile

  • Seo na buidhnean a dh'fhaodadh a bhith acasan

  • Chaidh an taghadh a dhèanamh sa Kennedy Centre ann an Washington DC

Ag aithris beò

Air a dheasachadh le Dòmhnall Angaidh Moireasdan is Dòmhnall Pollock.

  1. Buidheann H

    An Spàinn

  2. Buidheann G

    A' Bheilg

  3. Buidheann F

    An Òlaind

  4. Buidheann E

    A' Ghearmailt

  5. Buidheann C

    Brasil

  6. Seo sinn ma-tha, bheil sibh deiseil?

  7. Mu dheireadh thall, tha sinn cha mhòr gus tòiseachadh...

  8. Laoich

    Tha a-niste cuid dhe na laoich spòrs as cliùitiche anns na Stàitean Aonaichte agus Canada air nochdadh còmhla ri Rio airson a chuideachadh leis an taghadh.

    Wayne Gretzky (Hocaidh deigh), Aaron Judge (Baseball), Shaquille O'Neal (Ball-basgaid) agus Tom Brady (Ball-coise Ameirigeanach)

  9. Rio Ferdinand

    Chan eil sinn fhathast buileach cinnteach carson ach 's e Rio Ferdinand a tha os cionn an taghaidh fhèin.

    Tha Rio air an àrd-urlar a-nise is e ag ràdh gur e football a th' ann seach soccer.

    Ball-coise, Rio, ball-coise.

    Rio FerdinandReuters

  10. Tadhail air nach fàs sinn sgìth

    Uill leis gu bheil sinn a' feitheamh.....dè mu dheidhinn seo a-rithist?

    Bithibh onarach, cia mheud turas a choimhead sibh na tadhail aig Alba bhon gheam sin an aghaidh na Danmhairg o chionn beagan is cola-deug?

    Na tadhail a thug sinn gu Cupa na Cruinne airson a' chiad turas bho 1998.

    50 turas? 100 turas? 1,000 turas?

    Och, siuthad ma-thà, aon turas eile...

    Alba 4 An Danmhairg 2

  11. Dàil

    Alasdair MacIllinnein
    BBC Spòrs

    Tha cùisean air dheireadh ann an Washington. Chan eil dùil aig an ìre seo ri Poit 3 gu timcheall air 6:45f.

  12. Tha Lauryn Hill a' gabhail òran an-dràsta.

    Tha seo mu 15 mionaid nas anmoiche na bhathar a' sùileachadh.

    Tha sinn air feitheamh 28 bliadhna...dè th' ann am beagan mhionaidean eile?

  13. Cò tha sinn ag iarraidh?

    Calum Dòmhnallach
    BBC Scotland Sport

    Chan urrainn dhomh co-dhùnadh a dhèanamh, bu mhath leam buidheann le Alba a-mhàin on Roinn Eòrpa, ach nam faigheadh sinn buidheann le sgioba Eòrpach bhon dara poit, bhiodh sinn cinnteach na sgiobaidhean as duilghe sa cheathramh phoit a sheachnadh - a' toirt cothrom nas fhearr dhuinn a dhol troimhe.

    De ur beachd?

  14. It's a funny old game

    Robh fios agaibh gu bheil an Ceann-suidhe Trump eòlach gu leòr air taghaidhean ball-coise?

    Cò eile ach Dòmhnall Trump a rinn an taghadh airson Chupa Rumbelows air ais ann an 1992 còmhla ri Saint is Greavsie.

    Dh'innis e aig an àm gun do chluich e ball-coise nuair a bha e san sgoil agus fhuair e prèasant sònraichte bho na balaich.

    Saoil a bheil muga Saint and Greavsie aige fhathast?

    Cha ghabh am post YouTube seo a shealltainn air a’ bhrabhsair agaibh. Ceadaichibh Javascript no feuchaibh brabhsair eile.Faicibh stuth tùsail air YouTube
    Chan eil am BBC an urra ri na tha air Làraichean-lìn air an taobh a-muigh. Dh’fhaodadh sanasan a bhith an lùib stuth YouTube.
    Leum thairis air bhideo youtube

    Cead do stuth YouTube?

    Tha stuth Google YouTube an cois an artaigil seo. Tha sinn a’ sireadh cead bhuat mus tèid sìon luchdachadh, oir dh’fhaodadh iad ‘briosgaidean’ agus teicneòlas eile a chur an sàs. ‘S dòcha gum biodh tu airson poileasaidh nam briosgaidean aca a leughadh a leughadh agus am poileasaidh prìobhaideachd aca mus tèid thu air adhart. Airson sùil a thoirt air an stuth seo, tagh ‘Gabh ris agus lean ort’.

    Chan eil am BBC an urra ri na tha air Làraichean-lìn air an taobh a-muigh. Dh’fhaodadh sanasan a bhith an lùib stuth YouTube.

  15. "Messi Factor"

    Duilgheadas tiocaidean fhaighinn ma gheibh sinn Argentina?

    Alasdair MacIllinnein
    BBC Spòrs

    Ged a bhiodh Argentina sgoinneil (bu thoil leam fhèin iad sa bhuidhinn againn), bhiodh luchd-taic na h-Alba gu tur sa bheag-chuid. Tha e do-chreidsinneach mar a tha luchd-taic Argentina a' faighinn grèim air tiocaidean.

    Cuir ris a sin am "Messi Factor" leis gur e seo an Cupa na Cruinne mu dheireadh aige is bhiodh strì mhòr ann chanadh tu airson tiocaidean gheamannan Argentina.

  16. Nach sibh a tha air a bhith foighidneach!

    Chan eil fada ri dhol a-niste is ceannardan Chanada, Meagsago agus na Stàitean Aonaichte air an àrd-ùrlar airson na sgiobaidhean aca fhèin a thaghadh.

    Na gabh dragh, chan e coirbteachd a th' ann oir bha fios againn mar-thà gum biodh Meagsago ann am Buidheann A, Canada ann am Buidheann B agus Na Stàitean Aonaichte ann am Buidheann D.

  17. Tha an taghadh fhèin a' teannadh dlùth a-nise (mu dheireadh thall, chanadh cuid).

    Cò tha sibh ag iarraidh?

  18. Bhideo: Mar a dh'obraicheas an taghadh

    Agus ma 's e bhideo a b'fheàrr leibh a choimhead airson blas fhaighinn air mar a bhios an taghadh ag obair, tha seo againn cuideachd.

    Taghadh Chupa na Cruinne

  19. Cuin a gheibh sinn a-mach càite am bi na geamaichean?

    Ma bhios Alba san aon bhuidheann ri Meagsago, Canada neo na Stàitean Aonaichte, bidh fios againn a-nochd càite am bi iad a' cluich agus dè na làithean a bhios na geamaichean.

    'S e sgioba bho Phoit a' trì a chluicheas Meagsago sa chiad gheam dhen fharpais a' ciallachadh gur dòcha gur e Alba a bhios ann - coltach ri Brazil anns a' Fhraing ann an 1998.

    An iarradh sibh sin? A' chiad gheam an aghaidh deagh sgioba ann an teas Mheagsaganaich shuas àrd os cionn ìre na mara? Chan eil mi fhèin ro chìnntech...

    Mura bi Alba ann an aon dhe na buidhnean sin, bidh againn ri feitheamh chun a-màireach airson faighinn a-mach càite dìreach a bhios iad a' cluich. Bidh tomhas mhath againn air an sgìre sam bi iad ge-tà.

    Mapa de Cheann a Tuath Ameireaga a' comharrachadh nam bailtean far am bi geamaichean Cupa na Cruinne gan cluichFIFA

    Na bailtean far am bi geamaichean gan cluich agus an àireamh dhiubh anns gach baile.

  20. Cupa Eilein an Fhraoich

    Calum Dòmhnallach
    BBC Scotland Sport

    Duais sìthe FIFA ga buileachadh air a' Cheann-suidhe Trump an sin. Leis na ceanglaichean Eileanach aige 's dòcha gur e an duine ceart airson riaghailtean Chupa Eilein an Fhraoich a chur air dòigh 'son nam bliadhnaichean ri thighinn?