बेलारूसची राजधानी मिन्स्क याठिकाणी युक्रेनसोबत चर्चा करण्यास आपण तयार आहे, असं क्रेमलिन (रशियन संसद) प्रवक्ते दमित्री पेस्कोव्ह यांनी म्हटलं आहे.
रशियाच्या सरकारी वृत्तसंस्थेने (RAI) दिलेल्या माहितीनुसार, ही बातचीत युक्रेनला न्यूट्रल स्टेटस घोषित करण्याबाबत असेल. तसंच त्यांना आपलं सैन्यही कमी करावं लागेल, अशी अट रशियाने घातली आहे.
युक्रेनने नेटोमध्ये सहभागी होऊ नये, अशी रशियाची इच्छा आहे. युक्रेन संघर्षादरम्यान अमेरिका आणि इतर पाश्चात्य देशांसोबत रशियाची चर्चा होत होती. तेव्हासुद्धा त्यांची प्रमुख मागणी हीच होती.
दरम्यान, युक्रेनचे राष्ट्राध्यक्ष वोलोदिमीर झेलेंस्की यांनी रशियन राष्ट्राध्यक्ष व्लादिमीर पुतीन यांना चर्चा करण्याचं आवाहन केलं आहे. तत्पूर्वी, युक्रेनचं सैन्य जोपर्यंत शस्त्र खाली ठेवत नाही, तोपर्यंत कोणतीही चर्चा केली जाऊ शकत नाही, असंही रशियाचे परराष्ट्र मंत्री म्हटलं होतं.
बेलारुसची राजधानी मिन्स्क याठिकाणी ही चर्चा करण्यात यावी, असं क्रेमलिन प्रवक्त्यांनी म्हटलं. हे ठिकाण रशिया आणि युक्रेन या दोन्ही देशांच्या संबंधांसाठी महत्त्वाचं आहे.
पूर्व युक्रेनमध्ये रशियन समर्थक बंडखोर आणि युक्रेनच्या सैन्यात रक्तरंजित संघर्ष झाल्यानंतर 2014 मध्ये मिन्स्क-1 आणि 2015 मध्ये मिन्स्क-2 करार झाला होता. फेब्रुवारी 2015 मध्ये बेलारुसची राजधानी मिन्स्क येथे रशिया, युक्रेन, जर्मनी आणि फ्रान्स या देशांच्या उपस्थितीत हा करार झाला होता.
याअंतर्गत परिसरात शांतता प्रस्थापित करण्यासाठी रशियन समर्थक बंडखोरांनी कब्जा केलेल्या भागात योग्य ती पाऊले उचलण्याचं ठरलं होतं.पण रशियाने केलेला हल्ला म्हणजे मिन्स्क कराराचं उल्लंघन असल्याचं सांगितलं जात आहे.