You’re viewing a text-only version of this website that uses less data. View the main version of the website including all images and videos.
मुंबई-पुणे, महाराष्ट्र, देश आणि जगभरातले कोरोनाविषयक ताजे अपडेट्स तसंच महाराष्ट्राच्या राजकारणातल्या ताज्या घडामोडी एकाच ठिकाणी.
मुंबई विमानतळाच्या दिशेने प्रवासाला निघालेले प्रवासी तसंच विमानतळाहून घरी निघालेले प्रवासी ई-पास विना जाऊ शकतात. मात्र प्रवासाचा बोर्डिंग पास आणि अन्य परिचयपत्रं बाळगणं आवश्यक आहे असं मुंबई पोलिसांनी स्पष्ट केलं आहे.
जगभरातील कोरोना प्रादुर्भावामुळे यंदा होणारा ट्वेन्टी-२० वर्ल्डकप दोन वर्षांसाठी पुढे ढकलण्यात येण्याची शक्यता आहे. आंतरराष्ट्रीय क्रिकेट परिषदेने यासंदर्भात अधिकृत घोषणा केलेली नाही. मात्र सूत्रांनी यासंदर्भात माहिती दिली आहे.
यंदाच्या वर्षी 18 ऑक्टोबर ते 15 नोव्हेंबर या कालावधीत ऑस्ट्रेलियात ट्वेन्टी-२० वर्ल्ड कप होणार होता. ट्वेन्टी-२० फॉरमॅटमधला हा सातवा वर्ल्ड कप असणार होता. 2007 मध्ये टीम इंडियाने पहिल्यावहिल्या ट्वेन्टी-२० विश्वविजेतेपदावर कब्जा केला होता.
या स्पर्धेत 16 टीम्स होत्या आणि चार गटांमध्ये त्यांना विभागण्यात आलं होतं. आयर्लंड, ओमान, पापुआ न्यू गिनी, श्रीलंका, बांगलादेश, नामिबिया, नेदरलँड्स, स्कॉटलंड, वेस्ट इंडिज, पाकिस्तान, ऑस्ट्रेलिया, न्यूझीलंड, अफगाणिस्तान, भारत, दक्षिण आफ्रिका, इंग्लंड हे संघ सहभागी होणार होते. एकूण 45 मॅचेस खेळवल्या जाणार होत्या.
काही दिवसांपूर्वीच वर्ल्ड कप पूर्वनियोजित वेळापत्रकानुसार होईल असं संकेत देण्यात आले होते मात्र जगभर कोरोनाचा वाढता संसर्ग लक्षात घेऊन स्पर्धा पुढे ढकलण्याचा निर्णय होण्याची शक्यता दिसते आहे.
सिंगापूर सरकारने आपल्या नागरिकांना कोरोनाच्या प्रादुर्भावापासून दूर ठेवण्यासाठी मोफत मास्क देऊ केले आहेत. यासाठी विविध ठिकाणी मिळून 400 वेंडिंग मशीन्स बसवण्यात आली आहेत.
स्थानिक प्रशासनाने तिसऱ्यांदा ही उपाययोजना केली आहे.
सुरुवातीला सिंगापूरने कोरोनाचा संसर्ग चांगल्या प्रकारे रोखला असं मानलं गेलं मात्र आता तिथे कोरोनाचे रुग्ण वाढू लागले आहेत.
सिंगापूरमध्ये आतापर्यंत कोरोनाचे 32 रुग्ण आढळले आहेत.
गेल्या 24 तासात, राज्यातील 75 पोलीस कर्मचाऱ्यांना कोरोनाचा संसर्ग झाला आहे. राज्यातील कोरोनाबाधितांची पोलिसांची संख्या 1964 इतकी झाली आहे. आतापर्यंत कोरोनामुळे 20 पोलीस कर्मचाऱ्यांचा मृत्यू झाला आहे. 849 पोलीस कर्मचारी बरे होऊन घरी परतले आहेत.
गृहनिर्माण मंत्री डॉ. जितेंद्र आव्हाड यांनी कामाला सुरुवात करत असल्याचं म्हटलं आहे.
"मी हॉस्पिटलमधून 10 तारखेला परतलो. पंधरा दिवस विश्रांती घेतल्यानंतर मी हळूहळू कामाला सुरुवात करत आहे. कोव्हिड-19ने निराश होण्याऐवजी मी त्याकडे संधी म्हणून पाहायचं ठरवलं आहे", असं ट्वीट आव्हाड यांनी केलं आहे.
आमच्या इथल्या हॉस्पिटल्समध्ये कोरोनाचा एकही रुग्ण नाही असं न्यूझीलंड सरकारने म्हटलं आहे.
न्यूझीलंडच्या कोरोनाविरुद्धच्या लढाईकडे एक यशस्वी मॉडेल म्हणून पाहिलं जात आहे.
न्यूझीलंडच्या आरोग्य मंत्रालयाने सांगितलं की कोरोनाच्या शेवटच्या रुग्णाला मंगळवारी घरी सोडण्यात आलं, आता कोणत्याही हॉस्पिटलमध्ये कोरोनाचा रुग्ण नाही.
न्यूझीलंडमध्ये गेल्या पाच दिवसात कोरोनाचा एकही नवा रुग्ण आढळलेला नाही.
न्यूझीलंडमध्ये 4 लाख 20 हजार लोकांनी सरकारी कॉन्टॅक्ट ट्रेसिंग अॅप डाऊनलोड केलं आहे.
न्यूझीलंडने कोरोनाचं कम्युनिटी ट्रान्समिशन यशस्वीपणे रोखलं आहे. पुढच्या महिन्याभरात न्यूझीलंडच्या सीमा खुल्या केल्या जातात. त्यावेळी कोरोना विषाणूचा संसर्ग रोखणं न्यूझीलंडपुढचं आव्हान असणार आहे.
रेडिओ पाकिस्तानने दिलेल्या वृत्तानुसार, पाकिस्तानचे भारतात अडकलेले 176 नागरिक अटारी-वाघा बॉर्डरमार्गे मायदेशी परततील.
लॉकडाऊनमुळे पाकिस्तानचे हे नागरिक छत्तीसगढ, गुजरात, मध्य प्रदेश, पंजाब, उत्तर प्रदेश, राजस्थान अशी ठिकाणी अडकले होते.
नवी दिल्लीस्थित पाकिस्तानच्या हाय कमिशनने पाकिस्तानचे पंतप्रधान इम्रान खान यांच्या आदेशान्वये या नागरिकांच्या परतीची व्यवस्था सुरू केली.
देशात गेल्या 24 तासात कोरोनाचे 6387 रुग्ण आढळले आहेत. या कालावधीत 170 जणांचा कोरोनामुळे मृत्यू झाला आहे.
देशातील कोरोनाग्रस्तांची संख्या 1,51, 767 इतकी झाली आहे तर 64425 बरं झालेल्यांना घरी सोडण्यात आलं आहे.
कोरोनामुळे देशात आतापर्यत 4337 लोकांचा मृत्यू झाला आहे.
केंद्रीय आरोग्य आणि कुटुंब कल्याण मंत्रालयाने ही माहिती दिली.
कोरोनाचा प्रादुर्भाव कमी करण्याच्या उद्देशाने लाँच करण्यात आलेल्या आरोग्य सेतू अॅपचा सोर्स कोड सार्वजनिक करण्यात येणार असल्याची घोषणा सरकारने केली आहे. आरोग्यसेतू नागरिकांच्या खाजगी जीवनावर, वैयक्तिक गोपनीय माहितीवर आक्रमण करतं असा आरोप करण्यात येत होता.
कोरोना संसर्ग झालेल्या लोकांचं कॉन्टॅक्ट ट्रेसिंगकरता आरोग्यसेतू अॅप लाँच करण्यात आलं होतं. सोर्स कोड जाहीर होणं हे चांगलं असल्याचं डिजिटल क्षेत्रातील जाणकारांनी सांगितलं.
2 एप्रिल 2020 रोजी केंद्र सरकारने आरोग्यसेतू अॅपची घोषणा केली होती. सद्यस्थितीला 11.5 कोटी नागरिक या अॅपचा वापर करत आहेत. यापैकी अँड्रॉईड युझर्स अॅपचा सोर्स कोड पाहू शकतील. IOS प्रणाली असणाऱ्या युझर्सनाही लवकरच सोर्स कोड पाहता येईल.
केंद्रीय गृहमंत्रालयाने सर्व राज्यातील शाळा सुरू करण्याची परवानगी दिली आहे असा एक मेसेज सोशल मीडियावर व्हायरल झाला आहे. मात्र या मेसेजमध्ये तथ्य नसल्याचं उघड झालं आहे.
केंद्रीय गृह मंत्रालयाच्या प्रवक्त्यांनी मंत्रालयाने असा कोणताही निर्णय घेतला नसल्याचं स्पष्ट केलं. देशभरातील शाळा तसंच महाविद्यालयं बंदच राहतील. खोट्या बातम्यांवर विश्वास ठेऊ नका, त्या पसरवू नका असं आवाहनही त्यांनी केलं.
जगभरात थैमान घालणाऱ्या कोरोना विषाणूच्या संसर्गाची दुसरी लाट धोकादायक असू शकते असं जागतिक आरोग्य संघटनेनं म्हटलं आहे.
जगभरात अनेकठिकाणी लॉकडाऊन शिथिल केला जात आहे. त्या पार्श्वभूमीवर WHOने हा इशारा दिला आहे.
युरोपातील अनेक देशांसह अमेरिकेतील सरकारने कोरोनासंदर्भात चाचण्या, संशोधन, उपाययोजना वाढवाव्यात असं जागतिक आरोग्य संघटनेनं म्हटलं आहे.
WHOची सेफ्टी टीम हायड्रॉक्सीक्लोरोक्वीन औषधाबाबतच्या माहितीचा पुर्नआढावा घेईल असं संघटनेनं स्पष्ट केलं आहे.
ब्राझील आता कोरोना संसर्गाचा नवा केंद्रबिंदू झाला आहे. ब्राझीलमध्ये 3 लाख 91 हजार लोकांना कोरोनाचा संसर्ग झाला आहे. ब्राझीलमध्ये आतापर्यंत 24 हजार 500 हून अधिक लोकांचा मृत्यू झाला आहे.
अन्य देशांच्या तुलनेत ब्राझीलमध्ये कोरोना मृत्यूदर जास्त आहे.
एका संशोधनानुसार, ब्राझीलमध्ये कोरोनामुळे होणाऱ्या मृत्यूंची संख्या ऑगस्टपर्यंत एक लाख 25 हजारांच्या पुढे जाऊ शकते.
राज्य आणि केंद्रशासित प्रदेश, खाजगी प्रयोगशाळांशी परस्पर सामंजस्यातून कोरोना चाचण्यांचा दर ठरवू शकतात असं ICMRने स्पष्ट केलं आहे. तूर्तास या चाचणीसाठी रुग्णांकडून 4500 रुपये घेतले जात होते.
या चाचणीसाठी आवश्यक किटची उपलब्धता वाढल्याने राज्यं तसंच केंद्रशासित प्रदेश किंमत निश्चित करू शकतात असं इंडियन काऊंसिल ऑफ मेडिकल रिसर्चचे महासंचालक बलराम भार्गव यांनी म्हटलं आहे.
वंदे भारत मोहिमेअंतर्गत आतापर्यंत 3393 भारतीयांना मायदेशी घेऊन आल्याचं केंद्रीय हवाई वाहतूक मंत्री हरदीपसिंग पुरी यांनी म्हटलं आहे.
अबूधाबी, दुबई, बहरीन, मनिला, सेबू, व्हँकोव्हर, तेल अवीव, सिंगापूर, बर्मिंगहॅम, न्यूयॉर्क, मॉस्को, करागंदा, बिशेक, मिन्स्क अशा विविध ठिकाणांहून सुटलेल्या 19 विमानांच्या माध्यमातून भारतीय नागरिक मंगळवारी मायदेशी परतले,
गुड मॉर्निंग,
कसे आहात?घरी आहात ना? तुमची आणि घरच्यांची काळजी घ्या.
राज्य, देश आणि आंतरराष्ट्रीय स्तरावरील कोरोनाच्या सर्व अपडेट्स तुम्हाला इथे वाचायला मिळतील.
जगभरात 55.47लाख लोकांना कोरोनाचा संसर्ग झाला आहे. आतापर्यंत 3.48 लाख लोकांचा कोरोनामुळे मृत्यू झाला आहे.
देशातील एकूण रुग्णांची संख्या 1 लाख 45 हजार 380झाली आहे. आतापर्यंत देशात कोरोनामुळे 4,167 जणांचा मृत्यू झाला आहे.
राज्यात मंगळवारी कोरोनाचे 2091 रुग्ण आढळले तर 97 जणांचा मृत्यू झाला. राज्यातील कोरोनाबाधितांची संख्या 54,758 इतकी झाली आहे.
सर्वोच्च न्यायालयाने केंद्र आणि राज्य सरकारांना नोटीस जारी करून स्थलांतरित कामगारांना घरी पोहोचण्यासाठी आवश्यक उपाययोजना कराव्यात असं म्हटलं आहे.
दिवसाला 1.1 लाख चाचण्या होत असल्याचं इंडियन काऊंसिल ऑफ मेडिकल रिसर्चचे महासंचालक बलराम भार्गव यांनी म्हटलं आहे.
ब्रिटनने रेमडेसिवीर औषधाच्या क्लिनिकल ट्रायलला परवानगी दिली आहे. ब्रिटनमधील नॅशनल हेल्थ सर्व्हिस कोरोना रुग्णांना हे औषध उपलब्ध करून देतील. कोरोना रुग्णांसंदर्भातील हा सगळ्यात निर्णायक टप्पा असेल असं ब्रिटनचे आरोग्यमंत्री मॅट हॅनकॉक यांनी सांगितलं.
तूर्तास या औषधाची मर्यादित उपलब्धता लक्षात घेऊन, अत्यावश्यक रुग्णांनाच हे औषध देण्यात येईल. अमेरिका आणि जपानने यासंदर्भात उपाययोजना केल्या आहेत.
मंगळवारी दिवसभरात काय काय घडलं हे तुम्हाला या लिंकवर वाचायला मिळू शकतं.