Nchịkọta akụkọ ndị kachasị mkpa mere na mbaụwa n'ọnwa Disemba 2025.
Uzoamaka Ewuzie, Ikechukwu Kalu, Michael Ngene, Chinonso Ugorji, Michael Ilediagu, Adline Okere, Marvelous Obomanu, Uche Akolisa
A na-atụ uche na ndị njem amabeghị ọnụọgụgụ anwụọla dịka ihe a na-eche na ọ bụ ogbunigwe gbara na okporoụzọ Yar’Tasha–Dansadau dị na Zamfara Steeti ụbọchị Satode.
Ndị ueojii steeti kwuru na ihe ọgb ugba gbara n'ezie mana ha ekwughị ma ọbụ ogbunigwe nakwa- mmadụ ole o metụtara.
Zamfara bu mpaghara ndị omekome bu egbe na-akpa mkpamkpa na Naijiria
Izrel abụrụla mba mbụ ga-anabata mba si Somalia kewapụta a kpọrọ Somaliland dịka mba nweere onwe ya.
Praim Minista Benjamin Netanyahu Izrel chọrọ ka ha na Somaliland nwee mmekọrịta n'ọrụugbo, ahụike nakwa teknụzụ.
Onyeisiala Somaliland bụ Abdirahman Mohamed Abdullahi, kpọrọ nke a "nnukwu ihe nribama".
Nna malite ịhụta mba Somali etu ahụ bata Izrel nyere Somaliland nwere ike ime ka mba ndị ọzọ ṅomie Izrel ma mepere ndị Somaliland ụzọ azụmahịa na mmekọrita mba na mba.
Mana Praim Minista mba Somalia bụ Hamza Abdi Barre, kwuru na mba ya anabataghị ihe Izrel mere is na o megidere ikike nkwụrụonwe nke Somalia.
Ebe foto si, Getty Images
Ebe foto si, Reuters
Ndị minista na-ahụ maka nchekwa na mba Taịland na kambodịa ekwuola na mba abụọ ahụ ekwetala ịkwụsị ịkwa mgbọ ozugbo ozugbo.
Mba abụọ ahụ kwetara ịkwụsị mkpagharị nke ndịagha, ma mee ka ụmụ mmadụ ndị bi na mpaghara okeala lọghachi n’ụlọ ha.
Nke a na-abịa dịka a hụchara ọgbaaghara kpụ ọkụ n’ọnụ n’okeala mba Taịland na Kambodịa, nke opekatampe, mmadụ iri anọ na otu nwụrụ n’ime ya, ebe ihe ruru nde mmadụ gbapụrụ n’ụlọ ha.
Nkwụsị ịkwa mgbọ a malitere n’elekere iri na abụọ nke etiti ụbọchị, n’oge mba ha (05:00 GMT).
Ozi ndị Minista ahụ wepụtara sịrị na ọ bụrụ na nkwụsị ịkwa mgbọ a ruo ụbọchị atọ, mba Taịland ga-atọhapụ ndịagha mba Kambodịa iri na asatọ ha ji eji.
E nwetara ọganihu a, oge ndị ọchịchị Taịland na Kambodịa nwechara mkparịtaụka were ụfọdụ ụbọchị, nke ebumnobi ya bụ ịkwụsị agha ọhụrụ dị n’etiti mba abụọ ahụ.
Nnukwu ọṅụ na ihu sara mbara ka anyị ji anabata gị n'ọgbakọ BBC News Igbo taa bụ Satọde Eke 27 Disemba, 2025
N'ụtụtụ a, ọ bụ gị na Chinonso Ugorji ga-anọrị tupu Uche Akolisa eburu oche n'oge ehihie.
Gaa n'ihu sonyere anyị na Facebook, Instagram nakwa Whatsapp Chanelụ, iji nweta akụkọ gbasara ihe niile na-eme n'ụwa.
Nnọọ!
Ebe foto si, Eric Thayer via Getty Images
Oke mmiri ozuzo akpaala mkpamkpa na mpaghara dị iche iche n'obodo Kalịfọnịa nke mere ka mmadụ atọ nwụọ, dịka ndị ọrụ gọọmenti si kwuo.
Aka na-achị obodo Kalịfọnịa bụ Gavin Newsom etinyela iwu gbatagbata na Lọs Angelis nakwa ebe ndị ọzọ oke mmiri ozuzo metụtara.
Ndị nwụrụ mgbe mmiri ozuzu a kpara mkpamkpa gụnyere nwoke gbara afọ iri isii na anọ, bụ onye osisi kụgburu.
Onye ọzọ abụrụ nwoke dị afọ iri asaa na anọ, onye nwụrụ mgbe oke idemmiri buuru ya n’ime ụgbọala ọ nọ n’ime ya.
Onye mezuru ndị nwụrụ anwụ mmadụ atọ bụ nwaanyị dị afọ iri asaa, onye okwute ukwu si n’elu dakwasị dịka ọ dabara n’ime idemmiri.
Ebe foto si, screenshot
Nnukwu ọṅụ na ihu sara mbara ka anyị ji anabata gị n'ọgbakọ BBC News Igbo taa bụ Fraịde Nkwọ, 26 Disemba, 2025.
N'ụtụtụ a, ọ bụ gị na Chinonso Ugorji na Marvelous Obomanu ga-anọrị tupu Uche Akolisa na Michael Ngene eburu oche n'oge ehihie.
Gaa n'ihu sonyere anyị na Facebook, Instagram nakwa Whatsapp Chanelụ, iji nweta akụkọ gbasara ihe niile na-eme n'ụwa.
Nnọọ!
Ebe foto si, Babajide Sanwo-Olu / X
Gọvanọ Legọs steeti, Babajide Sanwo-Olu ekwuola ihe gọọmenti ya ga-eme banyere ọku gbara ụlọ Great Nigeria Insurance House na Balogun dị na mpaghara Lagos Island.
Ọkụ gbara ụlọ ahụ nwere ọtụụ ogoogo ma mebie ọtụtụ ihe a mabeghị ego ole ọ pụtara.
Mkpamkpa ahụ kpara n’abalị Wenezde Desemba 24, 2025, nkenke awa ole na ole tupu emume Ekeresimesi amalite.
Ebe foto si, Babajide Sanwo-Olu / X
N'oge Sanwo-Olu gara mgbaru n’ebe ahụ ka o kwuru sị “enweghị etu a ga-esi kọwaa ahụhụ na ihe ụfụ ọkụ a butere”.
Ọ gwara ndị o metụtara ka ha kasie obi, ma kelee ndị ọrụ na-agbanyụ ọkụ etu ha si gbochie ọkụ ahụ ifesa karịa.
O kwere nkwa na gọọmenti ya ga-atule ihe mere ma nye ndị o metụtara nkwado”.
Ebe foto si, Babajide Sanwo-Olu / X
Ebe foto si, ALTEZZA TRAVEL
Ndị ọrụ gọọmenti mba Tanzanịa ewepụtala aha ndị nwụrụ oge helikọpta kpọkasịrị na mba ahụ n'ụbọchị Tọzde.
Ọdachi a mere mgbe ụgbọelu ahụ gara ibupụ ndị ọrụ ahụike ha nọ na nsogbu dịka ndị mmadụ na-arị ugwu Kilimanjaro.
Mmadụ ise nwụrụ n'ihe mberede a gụnyere David Plos na Ana Plosovo ndị amaala mba Czech Repọblik bịara njem nleta na Tanzanịa.
Ndị ọzọ nwụrụ bụ ndị amaala Tanzanịa mmadụ abụọ bụ Innocent Mbaga, onye bụ onyendu na-elekọta ndị bịara njem nlegharị anya nakwa dọkịta Jimmy Daniel.
Onye ọkwọụgbọelu ahụ bụ Constantine Mazonde bụ nwaamaala Zimbabwe so na ndị nwụrụ.
Etụ o sị dị ugbua, Gọọmenti Tanzanịa enyela iwu ka e mee nnyocha ma chọpụta ihe kpatara ọdachị ojọọ a.
Akụkọ kwuru na ụgbọelu ahụ bụ "Airbus Helicọpta H125' nwere akara '5H-KMA', bụ nke ndị ụlọọrụ KiliMedi Air ji arụ ọrụ kpọkasịrị obere oge dịka o felichara elu n'ọdọụgbọelu Barafu dị na ndagwurugwu Barafu n'ugwu Kilimanjaro a ma ama, bụ ebe ọtụtụ mmadụ na-eme njem nlegharị anya na-agbakọ ma na-arị elụ afọ niile.
Ebe foto si, ALTEZZA TRAVEL
Ebe foto si, Reuters
Opekatampe mmadụ ise anwụọla oge ogbunigwe gbawara n’ime ụlọekpere ndị Alakụba dị na Borno Steeti.
Ọnụ na-ekwuchitere ndị uweojii Borno Steeti bụ Nahum Daso gwara ndị mgbasaozi na ogbunigwe ahụ merụrụ mmadụ iri atọ na ise ndị ọzọ ahụ n’ahịa Gamboru dị na Maiduguri oge ha na-ekpe ekpere abalị.
Onyonyoo a hụrụ na soshal midịa gosiri ihe yiri oge ogbunigwe ahụ gbachara, dịka a hụrụ ka ndị mmadụ kwụ na mpaghara ahịa ahụ, ebe ụzụzụ jupụtara ebe niile.
O nwebeghị otu ọbụla kwuru na ọ bụ ha mere mwakpo a, mana ndịagha nnupuisi ejirila ogbunigwe wakpoo ụlọekpere ndị Alakụba nakwa ebe e nwere ọtụtụ mmadụ n’oge gara aga.
Ebe foto si, AFP via Getty Images
A nwụchiela mmadụ iri na otu a na-enyo enyo maka egbe a gbara aghara aghara n’ebe a na-aṅụ mmanya na mba Saụt Afrịka.
Ọ bụ n’ụbọchị Sọnde ka a gbara egbe ahụ aghara aghara ma gbagbuo mmadụ itoolu.
Ndị uweojii malitere ịchọ ndị ojiegbe iri na abụọ a na-amaghị ndị ha bụ e kwuru gbara egbe ahụ n’elekere mbụ nke ime abalị (n’oge Saụt Afrịka) na Bekkersdal dị n’akụkụ Johannesburg.
N’ụbọchị Wenezde, osote kọmịshọna ndị uweojii nke mpaghara ahụ bụ Fred Kekana kwuru na mmadụ itoolu n’ime ndị a nwụchiri bụ ụmụafọ Lesotho ebe otu n’ime ha bụ onye Mozambique.
E jichikwara onye nke ọzọ a na-enyo enyo, bụ onye e kwenyere na ọ bụ nwaafọ Saụt Afrịka na-arụ ebe a na-egwupụta akụ ndị chi nyere.
Nnukwu ọṅụ na ihu sara mbara ka anyị ji anabata gị n'ọgbakọ BBC News Igbo taa bụ Tọzde Afọ, 25 Disemba, 2025 ma bụrụkwa ụbọchị Ekeresimesi.
N'ụtụtụ a, ọ bụ gị na Chinonso Ugorji na Marvelous Obomanu ga-anọrị tupu Uche Akolisa, Michael Ngene na Michael Ilediagu eburu oche n'oge ehihie.
Gaa n'ihu sonyere anyị na Facebook, Instagram nakwa Whatsapp Chanelụ, iji nweta akụkọ gbasara ihe niile na-eme n'ụwa.
Nnọọ!
Ebe foto si, Screengrab
Gọvanọ Adamawa steeti bụ Ahmadu Fintiri enyela otu onye ọrụugbo nọrọla na mkpọrọ afọ 11 dịka ọ na-eche ọnwụ ya ntọhapụ.
Ụlọikpe Kachasị mara Sunday Jackson ikpe ọnwụ maka igbu otu onye ọchịehi wakporo ya n'ugbo ya dịka ọ naazọ onwe ya.
Jackson na mmadụ abụọ ndị ọzọ;Joseph Eugene na Maxwell Ibrahim bụ ndị Gọvanọ Fintri nyere mgbaghara n'abali 23 nke ọnwa Disemba afọ 2025 dịka a na-emerube emume Ekeresimesi na afọ ọhụrụ.
Ka ọ dị ugbua , onye omeiwu mba Amerịka bụ Riley Moore ekwupụtala obi ụtọ ya na ntọhapụ a tọhapụrụ Jackson ma sị na nke a mezuru n'ihi ọkụ mba Amerịka chara Naijiria n'otele banyere okwu a.
Na nsonso a, mba Amerịka na-acha Naijiria ọkụ banyere ebubo igbusịsị ndị ụka Kraistị ọkachasị n'Ugwu Naijiria.
N'ozi ya n'akara ọbaozi X,Moore kwuru sị,"O teela m na-akpọ oku ka a tọhapụ Sunday ma n'ọha ma n' ọgbakọ ime ụlọ, ọbụladị oge m du ndị omeiwu mee njem gaa Naijria na nsonso a."
Ọ gara n'ihu sị na nwaamadị ahụ bụ onye a wakporo, ọ zọwa onwe ya ma gbuo onye wakporo ya, so na ndị otu Kraịstị na-agabiga mmekpa ahụ na Naijiria.
"Onye nweanyị bịara ịtọhapụ ndị e ji eji, ugbua Sunday ga-enwe ohere ya na ezinaụlọ ya ịgbakọ Ekeresimesi."
Ebe foto si, Abubakar Malami/X
Ngalaba na-ebu agha megide nrụrụaka na Naijiria bụ 'Economic and Financial Crimes Commission' (EFCC) akpụpụla onye bụbụ Okaiwu Ukwu nke Gọọmentị Etiti na Minista na-ahu maka ikpe bụ Abubakar Malami, Ụlọikpe Ukwu nke Etiti dị n'Abụja maka ebubo ibupụ akatamkpo ego nakwa izo ego na ihe ndị ọzọ o nwetara n'uzọ megidere iwu.
Ndị eso kpụpụ ụlọikpe n' okwu ahụ gụnyere nwa Malami nwoke bụ Abubakar Malami nakwa onye ọrụ ya a kpọrọ Bashir Asabe.
EFCC na-ebo ha ebubo iji ụlọọru dị iche iche were zofuo ijeri kwuru ijeri naira n'agbata afọ '2015 rue afọ 2025.
A na-ebokwa ebubo na malami zụrụ ụlọ 41 na Kebbi, Kano na Abuja gụnyere ụlọ nkwari, ụlọakwụkwọ na ụlọbibi nke ọnụahịa ya ruru ijeri naira 212.89(N212.89 bn).
Cheta na Malami bụ ọkaiwu Ukwu nakwa Minista na-ahụ maka ikpe n'oge Ọchịchị Muhammadu Buhari afọ asatọ Buhari chịrị malite n'afọ 2015 rue afọ 2023.
Ebe foto si, Getty Images
Ụlọọrụ mba Amerịka ekwuola na ha agaghị enye mmadụ ise gụnyere onye jibu ọkwa kọmishọna EU bụ Thierry Breton akwụkwọ njem visa maka ihe ụfọdụ ha dere n’akara soshal midia ha dị iche iche.
Odeakwụkwọ gọọmenti Amerịka bụ Marco Rubio kwuru na ihe ndị ahụ ha dere bụ nke metụtara ndị Amerịka nakwa ụfọdụ ụlọọrụ mba Amerịka.
E kwuru na ọ bụ Breton kpalitere atụmatụ Digital Service Act (DSA) nke EU mapụtara iji gbochie nlebanye anya a na-elebanye n’ụlọọrụ soshal midia ụfọdụ.
Breton na Elon Musk onyeisi ụlọọrụ X enwebuola esemokwu n’oge gara aga banyere ime ka X na-esonye iwu EU mapụtara.
Ebe foto si, Getty Images
Mmadụ abụọ gụnyere ndị uweojii abụọ anwụọla na mwakpo e mere na Mosko isiobodo mba Rọshịa.
Kọmitii mba Rọshịa na-eme nnyocha kwuru na ndị uweojii abụọ na-ahazị ụgbọala kwuru na ha hụrụ otu onye a na-eyo eyo n’akụkụ ụgbọala ndị uweojii na Yeletskaya mana oge ha gara ịnwụchi ya, ogbunigwe gbawapụrụ
Ndị uweojii abụọ ahụ na otu onye ọzọ nwụrụ site na ahụ ha merụrụ n’ọdachi ahụ.
Nke a na-abịa dịka nnukwu ọchịagha ndịagha mba Rọshịa bụ Ọchịagha Fanil Sarvarov nwụrụ oge ogbunigwe e tinyere n’ụgbọala gbawapụrụ n’ụbọchị Mọnde.
Ọnụ na-ekwuru kọmitii nnyocha ahụ bụ Svetlana Petrenko kwuru na a malitela ime nnyocha iji chọpụta ihe mere e ji awakpo ma na-egbu ndị uweojii.
Nnọọ n'ọgbakọ BBC News Igbo taa bụ Wenezde 24 Disemba, 2025 ma bụrụkwa ahịa Orie.
Sonyere anyị dịka anyị na-ewetara gị akụkọ sị Naịjirịa, Afrịka na mbaụwa niile.
Gaa n'ihu soro akara soshal midia anyị maka akụkọ foto na vidio anyị ji bịa taa.
Ndewo.
Ebe foto si, FIRS/X, Getty Images
Dịka ụlọọrụ Federal Inland Revenue Service (FIRS) siri kwuo, akara National Identification Number (NIN) ga-abụzi akara njirimara ụtụisi maka ụmụafọ Naịjirịa malite n’afọ 2026.
Nkwupụta a na-abịa dịka ndị mmadụ na-enwe mmetụta gbasara otu mpaghara iwu ụtụisi, bụ nke mere ka ọ bụrụ iwu na onye niile ga-enweta akara njirimara ụtụisi iji nwee akara ọbaego.
Site n’ozi ụlọọrụ NIMC wepụtara, e nyela ụmụafọ Naịjirịa dị otu narị nde na iri abụọ na atọ na ụma itoolu akara njirimara NIN kemgbe ọnwa Ọktoba, 2025.
Site n’ozi ha wepụtara n’akara X n’ụbọchị Mọnde 22 Disemba 2025, FIRS kwuru na akara ndebanyeaha nke ụlọọrụ Corporate Affairs Commission (CAC) na-enye ga-abụ akara njirimara ụtụisi ha.
Iwu ụtụisi bụ Nigeria Tax Administration Act (NTAA) a atụrụ anya ịmalite rụwa ọrụ n’ọnwa Jenụwarị, 2026 manyere onye niile iji akara ụtụisi atụ mgbere.
Ebe foto si, Gov House Ebonyi state
Opekatampe mmadụ 25 nọ na mkpọrọ n’Abakiliki enwerụla onwe ha site n’enyemụaka nwunye Gọvanọ Ebonyi steeti bụ Mary Mauduline Uzoamaka Nwifuru.
Uzoamaka kwụrụ ụgwọ ha ji ma mee ka ha si n’ụlọmkpọrọ laa.
Kọmịshịọna na-ahụ maka ikpe ọha n’Ebonyi steeti bụ Ben Uruchi Odoh sị na ndị ahụ pụtara dịka nwunye gọvanọ kwụrụ ụgwọ ha ji.
Onyeisi ụlọọrụ ‘Nigeria Correctional Service Ebonyi Steeti bụ Angela Chika Igwugwu kenere nwunye Gọvanọ Nwifuru ma kpọọ oku ka a gwado ha n’inyere ndị a sin a mkpọrọ pụta aka ma kwado ha ị bụ ndị gbanwere agbawe.
Ebe foto si, Gov House Ebonyi state
Ọ sị na a rụrụ ụlọ nga dị n’Abakiliki maka mmadụ 387 mana ndị nọ n’ime ya ugbua ruru mmadụ 1,018.
Ọ kawara na ndị na-anọ n’ime otu ime ụlọ n’ụlọ nga ahụ na-eru mmadụ 122 ma ha na-aga mposi ma na-asa ahụ n’out ime ụlọ ahụ.
Mana ọ bụ mgbe nwunye Gọvanọ Ebonyi steeti bụ Mary Mauduline Uzoamaka Nwifuru kwuru okwu ka ọ sị na ihe ya mere bụ maka mmụọ ekeresimesi.
Ọ sị na ya chọrọ ka a na-anabata ndị mmadụ na ya achọghị nkewa na ịkpa oke.
Ebe foto si, PA Media
Jack Hibbert bụ onye ọrụ nchekwa a gbara egbe mgbe a wakporo ‘Bondi Beach’ esila n’ụlọọgwụ laa.
Jack dị naanị ọnwa anọ n’ọrụ ya mgbe a gbara ya egbe ahụ n'oge ndị ojiegbe mmadụ abụọ gbagburu mmadụ 15, meruo mmadụ 40 ahụ n’ọdọ mkporindụ dị na Hanukkah.
Nwaamadị a dị naanị afọ iri na abụọ na-enwezi nsogbu ijiri otu anya ya hụta ụzọ kamgbe ahụ dịka ezinaụlọ ya si kwuo.
N'okwu ezinaụlọ ya "anyị agaghị arịọ ihe ọzọ ọkachasị ka nwaanyị bụ Jack si lọghachịta n’ime ekeresimesi a, nke a bụ ihe ịtụnanya".
Ndị uweojii abụọ ka mgbọ egbe tụrụ na mwakpo ahụ mere na ‘Bondi beach’ mana dịka Jack sị n'ụlọọgwụ laa, onye ọzọ a gbara egbe bụ Scott Dyson dị afọ 25 ka nọ n’ụlọọgwụ na-anara ọgwụgwọ.
Ebe foto si, Press service of the State Emergency Service of Ukraine in Odesa region
Mba Rọshịa ewelitela aka n’ogbunigwe ha na-atụ na mpaghara ndịda Yukren bụ Odesa, nke mebiri ọtụtụ akụrụngwa ọkụ latrik ma na-achọ imebi akụrụngwa njem ụgbọmmiri.
Osote Praịm Minista mba Yukren bụ Oleksiy Kuleba kwuru na Mosko kpachara anya na mwakpo a ha na-eme ma kwuo na ebe agha na-elekwasị anya ugbua bụ n’Odesa.
Onyeisiala Yukren bụ Volodymyr Zelensky kwuru na ọtụtụ mwakpo a Mosko na-eme ha bụ iji gbochie ha emela njem n’ọgbọmmiri.
Na mbido ọnwa Disemba, Onyeisiala Rọshịa bụ Vladimir Putin yiri egwu na ọ ga-emebi okporo njem ụgbọmmiri ndị Yukren iji megwara n’ogbunigwe ha tụrụ ụgbọmmiri tanka ndị Rọshịa a kpọrọ ‘shadow fleet’ n’osimiri ojii.
‘Shadow fleet’ bụ ọtụtụ ụgbọmmiri Rọshịa na-eji agafe mpagara Yurope maka mmachi e nyere ha kamgbe afọ 2022 ha wakporo mba Yukren.
Na mgbede Mọnde, Rọshịa tụrụ ọtụtụ ogbunigwe n’ọdọmmiri Odesa mebie ụgbọmmiri mmadụ nwee dịka gọvanọ mpaghara ahụ si kwuo.
Nke a so n’ọtụtụ ogbunigwe a tụrụla na mpaghara ahụ kamgbe ụbọchị ole ma ole nke mebirila ọtụtụ akụrụngwa ọkụ latrik ma merụọ ọtụtụ mmadụ ahụ.
N’abalị Sọnde, ogbunigwe mebiri ụdọ ọkụ latrik na-enye mmadụ puku 120 ọkụ ma gbaa ọdọụgbọmmiri ọkụ, mebie ọtụtụ ngwaahịa dịka mmanụ nri na flọ.
N’izuụka gara aga, ogbunigwe gbara n’ọdọụgbọmmiri Pivdenniy dị n’Ọwụwa Anyanwụ Odesa gburu mmadụ asatọ ma merụọ mmadụ iri atọ ahụ.
