BBC News, Ìgbò
Wụga n’ọdịnaya

You’re viewing a text-only version of this website that uses less data. View the main version of the website including all images and videos.

Take me to the main website

Mba Venezuela akatọọla egwu Trump yiri maka imechi ụzọ ụgbọelu n’ikuku mba ahụ

Nchịkọta akụkọ ndị kachasị mkpa mere na mbaụwa n'ọnwa Nọvemba 2025.

Mkpuchi Na Eme Ozugbo

Uzoamaka Ewuzie, Ikechukwu Kalu, Michael Ngene, Chinonso Ugorji, Michael Ilediagu, Adline Okere, Marvelous Obomanu

  1. Ndị ekperima egbuola onye nkuzi, tọrọ ụmụakwụkwọ ụmụnwaanyị 25 na Kebbi

    Ndị ekperima bu egbe egbuola osote onyeisi ụlọakwụkwọ ma tọọrọ o pekata mpe ụmụakwụkwọ 25 na-agụ n'ụlọakwụkwọ sekọndịrị ụmụ nwaanyị dị na Kebbi steeti, dịka ndị uweojii siri kwuo.

    Ndị ekperima ahụ wakporo ụlọakwụkwọ 'Government Girls Comprehensive Secondary School' dị nan Maga, Kebbi Steeti n' ebe Elekere anọ ụtụtụ Monde.

    Ndị omekome ahụ na ndi uweojii nọ ọrụ kwarịtara mgbọ tupu ndị ekperima ahụ wụọ aja ngwuru ụlọakwụkwọ ahụ nwụchie ụmụakwụkwọ nọ n'ebe obibi ụmụakwụkwọ, dịke ozi ndị uweojii siri kwuo.

    Ndị obodo ahụ gwara BBC na ndị ekperima ahụ kpọr ọụmụakwụkwọ ụmụnwaanyị ahụ baa ọhịa.

    Gụkwọ ya ebe a.

  2. A maala onye bụbu Praịm Mịnịsta mba Bangladesh ikpe ọnwụ

    Ụlọikpe pụrụ iche amaala Sheikh Hasina bụbu Praịm mịnịsta mba Bangladesh ikpe ọnwụ maka mpụ megidere mmadụ.

    E kwuru na Hasina nyere iwu maka mwakpo na ogbugbu ụmụakwụkwọ na-eme ngagharịiwe n’afọ 2024 nke otu UN kwuru na ndịagha gbagburu ụmụakwụkwọ ruru 1,400.

    Hasina kọwara mkpebi ụlọikpe ahụ dịka nke na-akwụghị ọtọ.

    A mara ya ikpe a na-agbagheghị na ọ gbara ọsọ ndụ gbaga mba Ịndia ngwa ngwa e wepụrụ ya n’ọchịchị n’ike.

    Ka ọ dị ugbua, a na-ekwu na a maghị ma mba Ịndia aga-ekwe nyefee Hasina n’aka mba Bangladesh.

    Ndị ọrụ nchekwa amalitela itinye ọnọdụ nchekwa dị iche iche dịka a na-ekwu na ndị nkwado Hasina nwere ike ime ngagharịiwe.

    Cheta na ọ bụ Sheikh Hasina hiwere ụlọikpe ahụ mara ya ikpe n’afọ 2010.

    O hiwere ụlọikpe ahụ ka ha lebanye anya na mpụ so agha 'Liberation' e mere n’afọ 1971.

    Ihe I kwesiri maka Hasina

    A mụrụ Hasina n’afọ 1947.

    Nna ya bụ Sheikh Mujibur Rahman, bụ onye duru mba Bangladesh oge ha nwetara nnwereonwe ha n’aka mba Pakistan n’afọ 1971 ma bụrụkwa onyeisiala mbụ mba Bangladesh.

    A họpụtara ya dịka Praịm mịnịsta n’afọ 1996.

    E boro ọchịchị ya ebubo mpụ na nrụrụaka dị iche iche.

    Begum Khaleda Zia nke pati Bangladesh Nationalist Party napụrụ ya ọchịchị n’afọ 2001.

    Ọ gara n’ihu nweta mmeri na ntuliaka ọkwa Prịam mịnịsta e mere n’afọ 2009.

  3. UK eyiela egwu ịkwụsị inye ụmụafọ Angola, Namibịa na DR Kongo akwụkwọ njem visa

    Odeakwụkwọ mba United Kingdom eyiela egwu na mba ha ga-akwụsị inye ụmụafọ Angola, Namibịa na Democratic Republic of Congo akwụkwọ njem visa ma ọ bụrụ na gọọmenti ha akwaliteghị mmekọrịta maka mwezuga ndị mbịarambịa iwu na-akwadoghị.

    A na-atụ anya na Shabana Mahmood ga-ekwupụta ọtụtụ mmegharị nke ga-agụnye iji ọsọ na ije kpọlaa ndị mbịarambịa iwu na-akwadoghị, imegharị iwu na-ahụ maka ikike nke mmadụ nakwa atụmatụ ndị ga-akwụsị ọtụtụ ikpe mkpegharị megidere mwezuga ahụ.

    Ụlọọrụ Home Office kwuru na a ga-amachibido inye akwụkwọ njem visa "ọ gwụla ma ha a nabatara nlọghachi ndị mba ha bụ ndị omekome na ndị kwabatara n'ụzọ iwu na-akwadoghị".

    "Ọtụtụ puku ndị kwabatara n'ụzọ iwu na-akwadoghị na ndị omekome si mba ndị a nọ na mba UK ugbua", ka ụlọọrụ ahụ kwuru.

    Minista nke ụlọọrụ ime obodo bụ Alex Norris kwuru na mgbanwe ndị a ga-eme ka "usoro na njikwa" dịghachi mma n'okeala mba UK.

  4. Trump akpọọla oku ka ndị ụlọomeiwu Republican tụọ vootu ka ewepụta faịlụ Epstein

    Onyeisiala mba Amerịka bụ Donald Trump akpọọla oku ka ndị ụlọomeiwu Republican tụọ vootu ka ewepụta akwụkwọ Epstein na mgbanwe ọnọdụ o nwere na mbụ.

    "Ndị otu Republican kwesịrị ịtụ vootu iji wepụta faịlụ Epstein, n'ihi na anyị enweghị ihe anyị ga-ezo," ka Trump dere n’akara Truth Social n'abalị Sọnde 16 Nọvamba 2025.

    Mgbanwe dị ukwuu n'ọnọdụ Onyeisiala Trump na-abịa dịka ọtụtụ ndị Republican gosiri na ha dị njikere imebi ọkwa, ma tụọ vootu maka mwepụta akwụkwọ ndị ahụ.

    A na-atụ anya na ụlọ ndị omeiwu ga-eme ntuliaka n'izu a maka iwu ga-amanye ngalaba ikpe ziri ezi ka ha wepụta faịlụ ndị ahụ n'ihu ọha.

    Ndị na-akwado iwu ahụ dịka ha nwere vootu zuru oke iji mee ka ụlọ ndị omeiwu ahụ gafee, mana o doro anya ma ọ ga-agafe Sineti.

    Iwu a maara dịka Epstein File Transparency Act bụ nke ebumnuche ya bụ ime ka ngalaba ikpe wepụta ihe ndekọ, akwụkwọ, nkwukọrịta, na ihe nnyocha niile jikọtara Jeffrey Epstein.

  5. Igbo ndị ọma, ụtụtụ ọma ụnụ

    Nnọọ n'ọgbakọ BBC News Igbo taa bụ Mọnde, Nọvemba 17, 2025.

    Anyị na-asị ka izu ọhụrụ a mịtara anyị niile mkpụrụ ọma.

    Biko, sonyere anyị dịka anyị na-ewetere unu akụkọ ihe na-eme Naịjirịa nakwa ụwa niile.

    Sonyekwara anyị n'akara soshal midịa anyị dị iche iche nke gụnyere WhatsApp Chanelụ, Facebook na Instagram maka akụkọ ndị ọzọ dị n'ụdị onyonyoo na foto.

    Udo dịrị gị!

  6. Ndị gbatara ọsọ ndụ n’UK ga-anọ afọ 20 tupu ha enweta ikike ịnọ

    Mgbanwe ọhụrụ gọọmenti United Kingdom chọrọ ịnweta maka ndị gbatara ọsọ ndụ na mba ahụ ga-eme ndị gbatara ọsọ ndụ nọrọ ihe ruru afọ iri abụọ tupu e nye ha ikike ịnọrọ.

    A na-atụanya n’odeakwụkwọ Shabana Mahmood ga-ekwupụta mgbanwe ọhụrụ ha kpebiri nke gọọmenti mba ahụ kwuru na ọ ga-enyereaka beleta ọnụ ọgụgụ ndị na-esoro obere ụgbọmmiri agbabata na mba ahụ.

    Usoro ọhụrụ a bido, ndị wetagoro ikike ịnọ n’UK ga-anọ nkenke oge tupu a bịa mee nnyocha maka ọnọdụ ha ma gwa ndị nke mba ha digoro mma ka ha laa.

    Ugbua ndị gbatara ọsọ ndụ na-anọ afọ ise tupu ha entinye akkwụkwọ ga-eme ka ha nọrọ mana gọọmenti chọrọ ime ya ka a na-eme nnyocha akwụkwọ ndị mbịarambịara kwa afọ abụọ ọbụla.

    Ndị gbatara ọsọ ndụ na-anọbu naanị afọ ise tupu ha etinye akwụkwọ ịnọrọ n’UK ga-anọzị afọ iri abụọ tupu ha etinye akwụkwọ ahụ.

  7. NDLEA ejidela otu onye a maama na ndị ọzọ maka ebubo ịtụ mgbere ọgwụike

    Ụlọọrụ na-ebu agha megide ọgwụike bụ National Drug Law Enforcement Agency (NDLEA) ekwuola na ha ejidela otu onye a maama maka ebubo ịtụ mgbere ọgwụike na ọtụtụ ndị ọzọ na steeti dị icheiche na Naịjirịa.

    Femi Babafemi bụ ọnụ na-ekwuru ụlọọrụ NDLEA mere ka a mata nke a n’akwụkwọ ozi ọ gbasara na soshal mịdịa n’abalị nke iri na otu nke ọnwa Nọvemba, 2025.

    Dịka akwụkwọ ozi ahụ si kwuo, aha onye ahụ na-ere ọgwụike bụ Frank Chijioke Ibemesi, e jiri ‘Chisco Bee’ mara.

    Chijioke na-edobe ahụ na ya bụ onye ji ego na-achụ nta ego nakwa onye nwere ụlọ oriri na nkwari mana ọ na-azụ ahịa ọgwụike.

    Ọ dị afọ iri anọ na abụọ ma nwe ụlọọrụ a na-akpọ Franc CJ Ibemesi Nig Ltd mana e jidere ya n’ụlọ oriri na nkwari ya bụ ‘Daisy Garden Hotel’ dị na 66-68 Agbeke street, Ago palace way, Isolo Lagos.

    N’Adamawa steeti, NDLEA jidekwara Ahmed Isyaku Nda, dị afọ iri ise, n’Aliyu Mustapha International Airport Yola,

    NDLEA jidekwara Jamiu Kunle Kardoso na Oriyomi Waliu na mpaghara Surulere dị n’Legos maka ọgwụike ‘loud’.

  8. Mmadụ anọ anwụọla mgbe ụgbọmmiri ndị mbịarambịa kpuru n'ime mmiri Mediterranean

    Ndị ọrụ nnapụta ekwuola na opekatampe mmadụ anọ anwụọla dịka ụgbọmmiri abụọ bu ndị mbịarambịa ruru otu narị kpuru n'ụsọ oke osimiri Libya na Satọde 15 Nọvamba 2025.

    Ndị e kwuru na ha nwụrụ n'ụgbọmmiri Libyan Red Crescent bụ ndị njem nọ n'ụgbọmmiri bu mmadụ iri abụọ na isii si Bangladesh.

    Ndị otu ọrụ enyemaka ekwughị ma e nwere ndị nwụrụ anwụ ọzọ n'ime ndị njem nọ n'ụgbọmmiri nke abụọ nke kpuru mgbe ọ bu ihe dịka mmadụ iri asaa bụ ndị Sudan.

    Ụgbọmmiri ndị ahụ ji ụzọ Mediterenian dị n'etiti Ugwu Afrịka na Ịtali, nke bụ "ụzọ njem kacha egbu egbu n'ụwa" dịka otu mba ụwa na-ahụ maka nkwagharị International Organization for Migration (IOM), siri kwuo.

  9. Ọtụtụ puku mmadụ na-eme ngagharịiwe megide gọọmenti Meziko nke mere ka mmadụ 120 merụọ ahụ

    Ndị uweojii kwuru na opekatampe mmadụ otu narị na iri abụọ - otu narị n'ime ha bụ ndị uweojii - emerụọla ahụ n'ọgbaaghara ndị a na-enwe n'oge ndị mmadụ na-eme ngagharịiwe megide gọọmentị na Meziko City.

    Puku kwuru puku mmadụ mere ngagharịiwe n'isi obodo Meziko na Satọde iji megide mpụ ime ihe ike na ọchịchị Onyeisiala Claudia Sheinbaum.

    Sheinbaum kwuru na ngagharịiwe ndị a, nke mere n'obodo ndị ọzọ, bụ ndị ndọrọ ndọrọ ọchịchị aka nri na-emegide ọchịchị ya, kwadoro ya.

    Otu ndị ntoroọbịa nke Gen Z haziri ngagharịiwe a, ha nwetara nkwado site n'aka ndị obodo na-eme ngagharịiwe megide ogbugbu ndị a ma ama, gụnyere ogbugbu e gburu Meyọ Uruapan Carlos Manzo izu ole na ole gara aga - onye kpọrọ oku ka e mee ihe siri ike megide ndị otu ọjọọ.

  10. DR Kongo na ndịagha nnupụisi M23 ebinyeela aka n’usoro udo na Qatar

    Ndịagha nnupụisi M23 nke Rụwanda na-akwado na gọọmentị Democratic Republic of Kongo ebinyeela aka n'akwụkwọ maka udo ịlọghachite n'ọwụwa anyanwụ mba ahụ.

    Emere emume a na Qatar, nke ya na mba Amerịka na otu mba Afrịka na-agbalị ime ka ewete nsogbu ahụ ruru ọtụtụ iri afọ n'ogbe ahụ bara ọgaranya n'ihe gbasara akụnaụba, na njedebe.

    Na mbido afọ a, ndị otu M23 weghaara obodo ukwu ndị dị na mpaghara ọwụwa anyanwụ bụ Goma na Bukavu. Mana mgbalị ndị gara aga iji nweta udo na mba ahụ akụọla afọ n'ala.

    Onye nnọchi anya mba Amerịka n'ihe gbasara Afrịka bụ Massad Boulos kwuru na akwụkwọ a metụtara usoro asatọ, ọtụtụ n'ime ha ka chọrọ ọrụ.

    O kwetakwara na mgbanwe ndị mkpọrọ na nlekota nkwụsị agha akwụsịtụla karịa ka a tụrụ anya ya na mbụ.

    Kinshasa na-arịọ ka a wepụ ndịagha Rụwanda n'okeala ha mana Kigali kwuru na nke a nwereike ime ozugbo ewepụrụ ndịagha nnupụisi FDLR nke dị na Kongo.

  11. Ndị be anyị, ụtụtụ ọma

    Nnọọ n'ọgbakọ BBC News Igbo taa bụ Sọnde, Nọvemba 16, 2025.

    Anyị na-asị ka Chineke zaa ekpere anyị niile n’ụbọchị taa.

    Biko, sonyere anyị dịka anyị na-ewetere unu akụkọ ihe na-eme Naịjirịa nakwa ụwa niile.

    Sonyekwara anyị n'akara soshal midịa anyị dị iche iche nke gụnyere WhatsApp Chanelụ, Facebook na Instagram maka akụkọ ndị ọzọ dị n'ụdị onyonyoo na foto.

    Ndewo!

  12. PDP enyela Wike, Fayose, Anyanwu na ndị ọzọ ọsọ

    Otu Peoples Democratic Party (PDP) achụpụla Mịnịsta isiobodo Naịjirịa bụ Nyesom Wike na ndị ọzọ site na pati ha maka ịkpa agwa megidere otu ndọrọ ndọrọ ọchịchị ahụ.

    Ndị ndu PDP sị na ha mere nke a iji weghachite udo, nrubeisi ma mee ka pati ahụ lekwasị any ana ntuliaka afọ 2027.

    N’ozi ha wepụtara n’oge ọgbakọ ha na-aga n’ihu n’Ibadan nke Oyo Steeti, ha kwuru na ndị ọzọ e nyere ọsọ na pati ahụ gụnyere Samuel Anyanwu, Kamalden Ajibade, Ayo Fayose bụbu Gọvanọ Ekiti Steeti, Austin Nwachukwu na ọtụtụ ndị ọzọ.

    Mkpebi ahụ bụ nke ha sị na ọtụtụ ndị na-atụ vootu ịhọpụta ndịisi pati ahụ a kpọrọ ‘Delegates’ kwadoro ya.

  13. PDP gara n'ihu mee ọgbakọ 'National Convention' ha n'Oyo Steeti

    Pati na-anọghị n’ọchịchị na Naịjirịa bụ Peoples Democratic Party (PDP) gara n’ihu mee ọgbakọ ha zuru ụwa ọnụ a kpọrọ ‘National Convention’ n’ama egwuregwu Lekan Salami dị n’Oyo Steeti.

    Nke a na-abịa na-agbanyeghi iwu nke Ụlọikpe Ukwu dị n’Abuja nyere nke sị ka ha ghara ime ọgbakọ ahụ.

    Mana Ụlọikpe Ukwu ọzọ dị n’Oyo Steeti nyere iwu ọzọ ma sị ka ọgbakọ ahụ gaa n’ihu ma sị na ụlọọrụ Independent National Electoral Commission (Inec) nyochaa etu ọgbakọ ahụ si aga.

    Foto na ihe onyonyo pati PDP kesara na soshal midia ha gosiri na ọgbakọ ahụ na-aga n’ihu ebe ndị nkwado ha si na steeti dị iche iche bịara.

    A ga-ejikwa ohere ahụ họpụta ndị ndu ọhụrụ ga-ewere ọchịchị na pati ahụ.

    Ndị ọkachamara kwuru na ọgbakọ a ga-abụ ohere PDP ga-eji emezi ụlọ ha bụ nke nọ n’ọgbaghara kamgbe ka ha chịchara Naịjirịa afọ iri na isii.

    Kamgbe afọ 2023 e mechara ntuliaka ọkwa Onyeisiala, pati PDP kewara ụzọ abụọ, ụfọdụ bụ ndị na-eso ụzọ Nyesom Wike bụbu Gọvanọ Rivas Steeti ma bụrụ Mịnịsta isiobodo Naịjirịa ugbua, ebe ndị ọzọ na-akwado Seyi Makinde bụ Gọvanọ Oyo Steeti.

  14. T. A Orji bụbu Gọvanọ Abia Steeti agbaala arụkwaghịm na pati PDP

    Gọvanọ chiburu Abia Steeti bụ Sịnetọ Theodore Ahamefule Orji esila n’otu ndọrọ ndọrọ ọchịchị Peoples Democratic Party (PDP) pụọ.

    Nke a dị n’akwụkwọ ozi ịgba arụkwaghịm o degaara Onyeisioche wọọdụ 1 nke PDP n’okpuruọchịchị Umuahia North.

    Sịnetọ Orji kwuru na ọ na-agba arụkwaghịm iso n’otu PDP site na mkparịtaụka ya na ndị otu ya na ezinaụlọ ya nwere mana o kwughi kpọmkwem ihe mere o jiri pụọ.

    Ọ gara n’ihu kelee PDP maka ohere ọma na ihe niile ọ mụtara ma ritekwa site n’ịbụ onye otu ha.

    Dịka ọ dị ugbua, Orji bụ onye eji aha otutu ‘Ochendo’ maara ekwubeghi ma ọ ga-abanye na pati ọzọ.

    Cheta T.A Orji chịrị Abia Steeti afọ asatọ, malite n’afọ 2007 ruo afọ 2015.

  15. Mmadụ itoolu anwụọla ebe ọtụtụ meruru ahụ n'ogbunigwe gbara na mba India

    Mmadụ itoolu anwụọla dịka ihe ruru iri atọ na abụọ merụrụ ahụ ka ogbunigwe gbara n’ụlọọrụ ndị uweojii dị na mpaghara Kashmir nke mba India.

    Akụkọ kwuru n’ogbunigwe ahụ gbara n’ụbọchị Fraịde n'ụlọọrụ ndị uweojji a kpọrọ ‘Nowgam’. Ogbunigwe ahụ bụ nke ha nakọtara ndị Faridabad na mpaghara Haryana na mbido izuụka a.

    Onyeisi ndị uweojji na mpaghara ahụ ogbunigwe a gbara bụ Nalin Prabhat sị na ndị uweojji ji ogbunigwe ahụ na-aga ime nyocha tupu ọ gbaa.

    O mere ka o doo anya mgbe ọ na-agwa ndị ntaakụkọ okwu na ọ bụ mmejọ kpatara ihe mere, na ọ bụghị mwakpo ndị na-eyi ọha egwu.

    Prabhat kwuru na ụlọọrụ ndị uweojii mebiri nke ukwuu n'ihi ogbunigwe ahụ dịka o metụtakwara ụlọ ndị dị nso n'ebe ahụ.

    Manoj Sinha, onye ndu mpaghara ebe ahụ ihe mere gosipụtara mwute ya ma kwuo na o nyere iwu ka e mee nyocha.

  16. Onyeisiala mba Tanzania ekweela nkwa inyocha ihe kpatara ngagharịiwe oge e mere ntuliaka onyeisiala

    Onyeisiala mba Tanzania bụ Samia Suluhu Hassan enyeela iwu ka a malite ime nyocha ngagharịiwe e mere mgbe a na-eme ntuliaka ọkwa onyeisiala.

    Cheta na e boro gọọmenti Samia ebubo iji akaike eso ndị mere ngagharịiwe.

    Ụlọọrụ na-ahazi ntuliaka kpọpụtara Samia dịka onye meriri na ntuliaka ọkwa Onyeisiala nke e mere n'Ọktoba 2025 nke sị na mmadụ pasentị iri itoolu na asatọ tụrụ ya vootu mana ọtụtụ ndị mmadụ katọrọ mpụtara ntuliaka ahụ.

    Onyeisiala Samia gwara ndị ọkaiwu ka ha “gosi obiebere” nye ndị a nwuchiri n'ebubo ime ọgbaghara n'oge ngagharịiwe ahụ.

    Okwu ya na-abịa dịka kọmishọna otu United Nation na-ahụ maka ikike dịịrị onye bụ Volker Türk kwuru ka gọọmenti Tanzania mee nyocha maka ogbugbu e gburu ndị mmadụ tupu mmalite nakwa n'oge e mechara ntuliaka n'Ọktoba.

    Ndị otu chọrọ iweghara ọchịchị sị na ọtụtụ ndị mmadụ nwụrụ na ngagharịiwe ahụ mana gọọmenti ewepụtabeghị ọnụọgụgụ mmadụ ole nwụrụ.

  17. Ụmụ Igbo, unu abọọla chi?

    Nnọọ n'ọgbakọ BBC News Igbo taa bụ Satọde, Nọvemba 15, 2025.

    Biko, sonyere anyị dịka anyị na-ewetere unu akụkọ ihe na-eme Naịjirịa nakwa ụwa niile.

    Cheta sonyekwara anyị n'akara soshal midịa anyị dị iche iche nke gụnyere WhatsApp Chanelụ, Facebook na Instagram maka akụkọ ndị ọzọ dị n'ụdị onyonyoo na foto.

    Udo dịrị ụnụ!

  18. Ụlọikpe enyela iwu ikpeazụ ka PDP kwụsị ịhazi nnukwu ọgbakọ ha

    Ọkaikpe Peter Lifu nke Ụlọikpe Ukwu Etiti dị n'Abuja enyela iwu ikpeazụ ka otu Peoples Democratic Party (PDP) kwụsị ịga n'ihu na nnukwu ọgbakọ ha na-achọ ịhazi n'isi obodo Ọyọ steeti bụ Ịbadan.

    Ọgbakọ ahụ PDP chọrọ ịhazi n'ụbọchị 15 na 16 nke ọnwa Nọvemba 2025, bụ nke ebumnobi ya bụ iji họpụta ndị isi ọhụrụ nke otu ahụ.

    Oge ọ na-ekpebi ikpe n'akwụkwọ aka chịburu Jigawa steeti bụ Sule Lamido gbara, Ọkaikpe Lifu machiri PDP ịga n'ihu n'ọgbakọ ahụ, ruo mgbe ha rubere isi n'iwu nakwa usoro nke ọgbakọ ahụ.

    Lifu nyere iwu ka a kwụsị nkwado niile a na-eme maka nnukwu ọgbakọ ahụ ruo mgbe e kwere ka Lamido zụta akwụkwọ nhọpụta onwe nke ọ ga-eji nweeike zọọ ọkwa Onyeisi PDP.

    Ọkaiwu ahụ gakwara n'ihu gbochie ụlọọrụ INEC ịlekọta, ịchịkọta maọbụ inye aka n'ọgbakọ ahụ ruo mgbe PDP nyere Lamido ikike isonye n'ọgbakọ ahụ.

  19. Ụfọdụ ndị ọnụ na-eru n'okwu akpọọla oku ka e kepụta Aba steeti

    Ụfọdụ ndị ndọrọndọrọ ọchịchị ọnụ na-eru n'okwu na mpaghara Aba Ochie akpọkuola ndị omeiwu si Abịa steeti nakwa steeti ndị ọzọ e nwere na southeast ka ha kwado oku a na-akpọ maka ikepụta Aba steeti.

    Ndị otu ahụ kelekwara Onyeisiala Bola Tinubu maka iji obi ya kwado usoro ikepụta steeti ọhụrụ na mpaghara southeast, bụ nke ha kwuru na ọchịchị ndị pụrụ apụ enweghị ike ime.

    Ọ bụ n'Aba ka ndị otu ahụ nọọrọ kpọọ oku a n'ụbọchị Tọzde 13 Nọvemba 2025, oge ha na ndị ntaakụkọ nwere mkparịtaụka.

    Ọnụ na-ekwuchitere otu ahụ bụ Theo Nkire kwara arịrị na ọ karịala afọ iri asaa e jiri malite ịkpọ ọkụ maka nkepụta Aba steeti.

    O kwuru na ụfọdụ mpaghara Naịjirịa ha na ndị Aba malitere ịgba mbọ maka steeti nke onwe ha otu mgbe enwetazuola ebumnobi ha.

    Ha dị okpuru ọchịchị itoolu mejupụtara mpaghara Aba n'Abịa steeti. Ha gụnyere Aba North, Aba South, Isiala Ngwa North, Isiala Ngwa South, Obingwa, Osisioma Ngwa, Ugwunagbo, Ukwa East na Ukwa West.

  20. Amerịka chọrọ ka a kwụsị ibunye ndịagha nnupuisi Sudan ngwaagha

    Mba Amerika akpọkuola mbaụwa ka ha belata ibunye ndịagha nnuopuisi Sudan ngwa agha.

    Nnukwu odeakwụkwọ mba ahụ bụ Marco Rubio kpọrọ oku a n'ọgbakọ ndị mịnịsta na-ahụ maka mmekọrịta mba na mba nke otu G7 mere na Kanada dịka a na-ebo otu agha nnupuịsis 'Rapid Support Forces' (RSF), ebubo igbu ọtụtụ ndị mmadụ n'El-Fasher.

    Rubio tụrụ arịrị na RSF akpaala mkpamkpa ọjọọ dị iche iche gụnyere igbu ọchụ na idina ndị nkịtị n'ike.

    Ndịagha Sudan boro mba 'United Arab Emirates' ebubo iji ngwa agha na ndịagha e goro ego akwado ndị RSF mana UAE na RSF agọọla n'ebubo ahụ.