Mba Venezuela akatọọla egwu Trump yiri maka imechi ụzọ ụgbọelu n’ikuku mba ahụ

Mkpuchi Na Eme Ozugbo

Uzoamaka Ewuzie, Ikechukwu Kalu, Michael Ngene, Chinonso Ugorji, Michael Ilediagu, Adline Okere, Marvelous Obomanu

1. 23 Nọvemba 2025Etu mmemme “Christ The King” si aga n’Enugwu

   Ndị ụka katọliki n’ụwa nille na-eme emume ncheta “Christ The King” ụbọchi Jeso bụ eze.

   Mmemme ahụ bụ oge ndị ụkọchukwu, ndị echiri echichi na ndị ụka na-eburu ahụ Jeso kwuọ n’ahịrị n’ahịrị iji gosi na ha kwetara na Jeso bụ eze.

   N’Enugwu steeti, parish nille nọ n’okpuru Enugwu katọlik dayọsis nke gụnyere Holyghost cathedral, Christ The King GRA, ST. Mulumba New Haven, St Michael Asata, Blessed sacrament Parish Indp. Layout, Holy Trinity parish Indpendence Layout na imirikiti ndị ọzọ gbakọrọ n'Ogige Okpara Square n’ekpere na ịgba egwu.

   Bishop Callistus Onaga gwara ndị mmadụ gbakọrọ ka ha na-ekwuputa na Jesus bụ eze ụbọchi niile nke ndụ ha.

2. 23 Nọvemba 2025Vidiyo sị na a ga-amanye ụmụntorobịa niile ibanye n’ọrụ ndịagha Naịjirịa bụ okwu ụgha - Uba

   Ndịagha Naịjirịa ejirila ọnụ ha kọwaa nke bụ eziokwu maka vidiyo na-efegharị n’ịntanet nke kwuru na “nwaokorobịa ọbụla ruru afọ iri na asatọ kwesiri isonye n’ọrụ ndịagha”.

   Kamgbe onyonyo ahụ pụtara, ọtụtụ ndị mmadụ nọ na soshal mịdịa na-akatọ ya ma na-agbado ụkwụ n’ikike dịrị ha na ihe ndị ọzọ nke gunyere ọnọdụ nchekwa na Naịjirịa.

   Mana ụlọọrụ na-ahụ maka nchekwa Naịjirịa nke ọnụ na-ekwuru ha bụ Samaila Uba kọwara na ọ bụ okwu ụgha na a chọrọ ịmanye ụmụntorobịa Naịjirịa ka ha banye n’ọrụ ndịagha.

   Samaila Uba n’ozi o kesara n’akara soshal mịdịa ya kọwara na “ọ bụ okwu asị ka ndị mmadụ na-ekesasị”.

   “Ha foto Onyeisi ọrụ nchekwa bụ Ọchịagha OO Oluyede nakwa akụrụngwa Ai nwere rụpụta vidoyo ahụ”.

   Ha sị na ndị rụpụtara vidiyo ahụ mere ka ha metọọ aha Onyeisi ọrụ nchekwa nakwa ndịagha Naịjirịa.

   Ha dọrọ ohanaeze aka na ntị ka ha hara iso na ndị na-agbasa okwu ụgha, maọbụ rụpụta udiri okwu ahụ ma rịọ ka ihe ọbụla ha ga-ekwu maọbụ kesaa bụrụ nke bụ eziokwu.

3. 23 Nọvemba 2025Idemmiri Vietnam egbuola ihe dịka mmadụ 90 ebe mmadụ 12 na-efu efu

   Opekatampe mmadụ iri itoolu anwụọla ebe mmadụ iri na abụọ ọzọ na-efu mgbe mmiriozuzo nke mere ọtụtụ ụbọchị na Vietnam butere idemmiri na mbuze.

   Gọọmenti Vietnam kwuru na ụlọ dị puku narị na iri asatọ na isii emebiela n'ofe mba ahụ, ebe ihe karịrị nde ụlọ anụmanụ atọ ekpochapụla.

   Ndị ọrụ gọọmentị ekwuola na e mebiwo ihe ruru ọtụtụ narị nde pound.

   Dịka ụlọọrụ mgbasa ozi AFP si kwuo, o metụtara mpaghara ugwu Dak Lak nke ukwuu, nke gburu ihe karịrị mmadụ iri isii kemgbe ụbọchị iri na isii nke ọnwa Nọvemba.

   Idemmiri a bụ ihe kacha njọ mere n'oge na-adịbeghị anya n'ihi oke ihu igwe nke mere na Vietnam n'ime ọnwa ole na ole gara aga, mgbe ajọ ifufe Kalmaegi na Bualoi kpara mba ahụ aka ọjọọ n'ime izu ole na ole ha abụọ mechara.

4. 23 Nọvemba 2025Mba Amerịka kwuru na ọ bụ ya dere atụmatụ udo Yukren nke e kwuru na ọ ga-amasị ndị Rọshịa

   Odeakwụkwọ mba Amerịka bụ Marco Rubio na-esi ọnwụ na atụmatụ iri abụọ na asatọ e wepụtara iji kwụsị agha Yukren, nke ọtụtụ mmadụ na-ele anya dịka ihe dị mma nye Rọshịa, bụ "ndị Amerịka dere ya".

   Nke a bịara mgbe ụfọdụ ndị omeiwu kwuru na Rubio gwara ha banyere atụmatụ ahụ - nke o kwuru na ọ kpọrọ "ndepụta ihe ndị Rọshịa chọrọ" - egosipụtaghị echiche Washington.

   Rubio mechara kewapụ onwe ya na ebubo ndị ahụ ma kwuo na atụmatụ ahụ sitere na mba Amerịka, ma sitekwa n’aka Rọshịa Yukren.

   Ntinye aka ya bịara mgbe ọ gara Geneva dị na Swizaland maka mkparịtaụka ya na ndị ọrụ nchekwa Yukren na Yurop gbasara atụmatụ ahụ, nke Onyeisiala mba Amerịka Donald Trump kpọrọ oku ka Kyiv kweta ngwa ngwa.

   Ka ọ dị ugbua, mba ndị hụrụ Yukren n’anya na Yurop ajụla ụfọdụ ihe dị na nkwekọrịta ahụ, nke a na-egosighi n'ihu ọha mana nkọwa ya agbasaala nke ukwuu.

5. 23 Nọvemba 2025Ndị be anyị, ụnụ abọọla chi?

   Nnọọ n'ọgbakọ BBC News Igbo taa bụ Sọnde, Nọvemba 23, 2025.

   Ka Chineke zaa ekpere anyị niile taa.

   Biko, sonyere anyị dịka anyị na-ewetere unu akụkọ ihe na-eme Naịjirịa nakwa ụwa niile.

   Sonyekwara anyị n'akara soshal midịa anyị dị iche iche nke gụnyere WhatsApp Chanelụ, Facebook na Instagram maka akụkọ ndị ọzọ dị n'ụdị onyonyoo na foto.

   Udo dịrị gị!

6. 22 Nọvemba 2025Ndị ndụ mbaụwa ga-enyocha atụmatụ ịkwụsi agha n’etiti Rọshịa na Yukren

   A na-atụ anya na mba ndị nọnyere mba Yukren ga-enwe nzukọ ma tụlee atụmatụ inweta udo nakwa ịkwụsị agha dị n’etiti Yukren na Rọshịa nke onyeisala Amerịka wepụtara ma ha zụkọ n'ọgbakọ ‘G20’

   Praịm Minista mba Briten bụ Keir Starmer sị na ndị ndu mbaụwa ga-agba atụmatụ ahụ ihu n’elụ tebụlụ ma nyochaa ụzọ ha ga-esi kwalite ya iji gaa n’ihu.

   Nke a na-abịa dịka Onyeisala mba Yukren bụ Volodymyr Zelensky dọọrọ aka na ntị ma kwuo na obodo ya na-agabiga ihe isiike n’ihi nrụgide ị nabata atụmatụ udo ahụ.

7. 22 Nọvemba 2025Igbo ndị ọma, ụtụtụ ọma ụnụ

   Nnọọ n'ọgbakọ BBC News Igbo taa bụ Satọde, Nọvemba 22, 2025.

   Anyị na-asị ka ụbọchị taa mara anyị niile mma nke ukwuu.

   Biko, sonyere anyị dịka anyị na-ewetere unu akụkọ ihe na-eme Naịjirịa nakwa ụwa niile.

   Sonyekwara anyị n'akara soshal midịa anyị dị iche iche nke gụnyere WhatsApp Chanelụ, Facebook na Instagram maka akụkọ ndị ọzọ dị n'ụdị onyonyoo na foto.

   Ndewo!

8. 21 Nọvemba 2025Ndị uweojii anwuchiela onye otu ndị bu egbe akpọ oku nkewa n’Ihiala, Anambra steeti

   Ndị uweojii Anambra steeti anwụchiela onye a na-enyo enyo na ọ bụ onye otu na-akpọ oku nkewa a mapụrụ n’iwu.

   N’ozi o wepụtara n’ụbọchị Fraịde 21 Nọvemba 2025, ọnụ na-ekwuru ndị uweojii Anambra steeti bụ Tochukwu Ikenga kwuru na ọ bụ n’ụbọchị Tọzde 20 Nọvemba ka ha nwuchiri onye ahụ a na-enyo enyo.

   Ikenga kwuru na ndị uweojii nke ngalaba Rapid Response Squad Awkuzu nwuchiri Friday Anyikame dị afọ iri abụọ na ise n’Ihiala, ma napụta ya egbe ‘pump-action’ abụọ na mgbọegbe iri abụọ na itoolu.

   “Oge anyị na-agba ya ajụjụ, o kwupụtara na ya bụ onye otu ndị na-ebu egbe, ma kpughee na ogige ha dị n’okpuru ọchịchị Ogbaru,” ka Ikenga kwuru.

   Ikenga gara n’ihu kwuo na Kọmịshọna ndị uweojii n’Anambra steeti bụ Ikioye Orutugu toro ndị ọrụ ya maka ike ahụ ha kpara, ma nye iwu ka a kwalikwuo nchekwa gburugburu steeti ahụ.

9. 21 Nọvemba 2025Zelensky ekwuola na ọ gaghị agharịpụ Yukren dịka Amerịka na-akwanye Kyiv ka ha na Rọshịa nwee nkwekọrịta udo

   Onyeisiala Yukren bụ Volodymyr Zelensky ekwuola na ya agaghị agharịpụ mba ya dịka mba Amerịka gara n’ihu na-akpọ oku maka nkwekọrịta udo n’etiti ha na Rọshịa.

   N’ozi ọ gbasaara mba ahụ, Zelensky kwuru na ya sara anya ya mmiri dịka ọ na-elebara atụmatụ mba Amerịka anya.

   Mana ọ dọrọ aka na ntị, na Kyiv nwereike ịnọ n’ọnọdụ ị họrọ ma ha ga-agbahapụ “ndị mgbakọaka ha gbara ọkpụrụkpụ” maọbụ ugwu ha.

   Rọshịa enwetabeghị ihe ọbụla si n’aka gọọmenti gbasara atụmatụ ahụ, ka Kremlin kwuru.

   Atụmatụ mba Amerịka ahụ a gbara n’anwụ gụnyere atụmatụ ndị Kyiv gụpụrụ n’oge gara aga, dịka inyepụ ụfọdụ mpaghara Donetsk nke ha ka na-elekọta, ibelata ọnụọgụ ndịagha ha nakwa ịṅụ iyi na ha agaghị esonyere Nato.

   Ka o sina dị, ndị Yurop esiela ọnwụ na ha ga-esonyerịrị na mkparịtaụka udo ahụ.

10. 21 Nọvemba 2025Nwaada Meziko abụrụla nwaanyị kacha maa mma n'ụwa

    Nwaada Meziko aha ya bụ Fatima Bosch eturula ugo dịka nwaanyị kacha mma na mba ụwa (Miss universe) n'asọmpi e mere na Bangkok, mba Thailand na nsonso a.

    Cheta na Bosch gbara afọ 25 iji iwe pụọ n'ebe ha na-eme asọmpi ahụ na mbido ọnwa Nọvemba dịka onye na-ahazi asọmpi ahụ baara ya mba n'ihu ndị ogbo ya ma yie ya egwu na ọ ga-ewepụ ya n'asọmpi ahụ nke mere na ndị ogbo ya sooro ya zọpụ ije pụọ n'ebe ha gbakọrọ.

    Ya bụ ihe dapụtara mere ka mmadụ abụọ na ndị ga-eso họpụta onye ga-emeri na asọmpi ahụ gbaa arụkwaghịm, dịka ha boro ndị na-ahazi asọmpi ahụ akwụbaghị aka ha ọtọ.

11. 21 Nọvemba 2025Ndeewonụ!

    Igbo mma mma nụọ !

    Ndewonụ ndị mụrụ nze mụọ ọzọ.

    Ndụ mmiri, ndụ azụ.

    Soro anyị n'ọwara a maka akụkọ dị mkpa n'ụwa taa.

12. 20 Nọvemba 2025Ndịagha Amerịka awụchiela na Kyiv dịka Yurop na-adọ aka na ntị megide atụmatụ udo nke mba Rọshịa

    Nnukwu ndị ọrụ na Pentagon agaruola mba Yukren iji "kpaa maka mbọ ndị a na-agba iji kwụsị agha" dị n'etiti mba ahụ na Rọshịa.

    O bụ ndịagha mba Amerịka kwupụtara nke a.

    Ndị otu ahụ, nke onyendu ha bụ odeakwụkwọ ndịagha Amerịka bụ Dan Driscoll na Praịm Minista mba Yukren bụ Yulia Svyrydenko nwere mkparịtaụka n'ụtụtụ Tọzde.

    A tụrụ anya na ha ga-ezute onyeisiala mba Yukren bụ Volodymyr Zelensky n'oge abalị.

    A malitere inweta ozi n'ụbọchị Wenezde sị na mba Amerịka na Rọshịa ahaziela atụmatụ ọhụrụ iji kwụsị agha ahụ.

    Atụmatụ a bụ nke gụnyere Yukren inyepụ ụfọdụ ókèala ha ma belatakwa ọnụọgụ ndịagha ha.

    Ozi anyị nwetara kwuru na ọ bụ onye nnọchiteanya Donald Trump bụ Steve Witkoff na onye nnọchiteanya pụrụiche nke mba Rọshịa bụ Kirill Dmitriev jiri aka ha chịkọta ma hazie atụmatụ ahụ.

    Ka o sina dị, ma Washington ma Mosko enwebeghị ndị kwuru okwu gbasara atụmatụ ahụ.

13. 19 Nọvemba 2025Onyeisiala Tinubu akwụsịtụla njem o kwesịrị ime n’ihi ọnọdụ nchekwa na Naịjirịa

    Onyeisiala Naịjirịa bụ Bola Tinubu akwụsịtụla njem o kwesịrị ime na mba Saụt Afrịka na Angola n’ihi ọnọdụ nchekwa na Naịjirịa dịka ọ na-eche ka ozi zuruoke banyere ụmụakwụkwọ a tọọrọ na Kebbi Steeti nakwa ụlọụka Christ Apostolic ndị ojiegbe wakporo n’Eruku Kwara Steeti.

    Onyeisiala Tinubu nyere iwu ma ziga ndịagha n’obodo Eruku nakwa ebe ndị ọzọ dị n’okpuruọchịchị Ekiti nke steeti ahụ ma nye ndị uweojii iwu ka ha chọpụta ndị wakporo ụlọuka ahụ.

    Onyeisiala Tinubu kwesiburu ịhapụ Abuja taa ma gawa ọgbakọ ndị ndu mbaụwa a kpọro G20 a ga-eme na Saụt Afrịka ma si ebe ahụ gawa mba Angola maka ọgbakọ otu Africa Union na European Union (AU-EU Summit).

    Mana n’ihi ihe mwakpo ndị a mere na Kebbi nakwa Kwara Steeti, o kpebiri ịkwụsịtụ ime njem ahụ dịka Bayo Onanuga bụ onye ndụmọdụ ya si kwuo n’akwụkwọ o depụtara.

    Ọ na-eche ozi si n’aka Osote Onyeisiala bụ Kashim Shettima bụ onye gara mgbaru na Kebbi Steeti n’aha ya, nakwa ozi si n’aka ndị ọrụ nchekwa banyere mwakpo mere na Kwara steeti.

    Onyeisiala Tinubu nyere ndị ọrụ nchekwa iwu ka ha sie imi n’ala ma chọpụta ebe ndị omekaome tọọrọ ma zoo ụmụakwụkwọ ụmụnwaanyị mmadụ iri abụọ na anọ ha tọọrọ ma zọpụta ha.

14. 19 Nọvemba 2025Ndị omeiwu akwadola iwu iwepụta akwụkwọ maka Epstein nke ga-aga na tebụl Trump

    Ụlọomeiwu abụọ kwekọrịtara inye ngalaba ikpe ziri ezi nke mba Amerịka iwu ka ha wepụta akwụkwọ ha gbasara onye na-ahụ maka ego maka ndị na-eme mpụ mmekọahụ bụ Jeffrey Epstein.

    Ụlọ ndị nnọchiteanya kwadoro atụmatụ a nke ukwuu site na-ịtụ vootu ruru narị anọ na iri abụọ na asaa ya na otu vootu nkịtị(427-1), ebe ndị Sineti ji otu olu kwado ya n'enweghị vootu nkịtị.

    Ihe a mere ụbọchị ole na ole ka Onyeisiala Donald Trump gbanwere echiche ya ma gbaa ndị omeiwu ume ka ha mee ntuliaka iji kpughee ihe ndekọ ahụ dịka ọtụtụ ndị na-agba ya ụkwụ.

    N'izu gara aga, Onyeisiala Trump na njikọ ya na Epstein laghachiri n'akụkọ mgbe ewepụtara ihe karịrị peeji 20,000 nke akwụkwọ - ụfọdụ na-akpọ aha onyeisiala.

    Mana obi ọchịchị mba Amerịka bụ White House gọrọ agọ na ọ dịghị ihe ọjọọ ọ bụla.

15. 19 Nọvemba 2025Igbo ndị ọma, ụtụtụ ọma ụnụ

    Nnọọ n'ọgbakọ BBC News Igbo taa bụ Wenezde, Nọvemba 19, 2025.

    Anyị na-asị ka ụbọchị taa mara anyị niile mma nke ukwuu.

    Biko, sonyere anyị dịka anyị na-ewetere unu akụkọ ihe na-eme Naịjirịa nakwa ụwa niile.

    Sonyekwara anyị n'akara soshal midịa anyị dị iche iche nke gụnyere WhatsApp Chanelụ, Facebook na Instagram maka akụkọ ndị ọzọ dị n'ụdị onyonyoo na foto.

    Ndewo!

16. 18 Nọvemba 2025Ụlọomeiwu Sineti agwala Onyeisiala Tinubu ka o were ndịagha 100,000 ọhụrụ ọrụ

    Ụlọomeiwu Sineti Naịjirịa agwala Onyeisiala Bola Tinubu ka o were ndịagha ọhụrụ 100,000 ọrụ iji kwalite mbọ gọọmenti na-agba iji chụọ ajọ ọnọdụ nchekwa ọsọ ụkwụ eru ala na Naịjirịa.

    Sinetọ Yahaya Abdullahi si Kebbi Steeti bụ onye kpọrọ oku a dịka ọ katọrọ ntọrị ụmụakwụkwọ 25 ndị omekome tọọrọ na Kebbi steeti.

    Sinetọ Abdullahi kwuru na ọ bụ ihe jọgburu onwe ya na ndị omekome na-aga n’ụlọakwụkwọ atọrọ ụmụakwụkwọ ma kwuo na nke a nwere ike ime ka ụmụaka kwụsị ịga ụlọakwụkwọ ọkachasị ụmụnwaanyị.

    N’okwu ya, onyeisi ụlọomeiwu Naịjirịa bụ Sinetọ Godswill Akpabio katọrọ ma kwuputa mwute ya etu ọnọdụ nchekwa si akawanye njọ na Naịjirịa.

    Ụlọomeiwu Sineti ahụ gara n’ihu hiwe otu kọmitti ga-eme nnyocha banyere etu e si emefu ego gọọmenti mapụtara maka nchekwa ụlọakwụkwọ na Naịjirịa.

17. 18 Nọvemba 2025Onyeisiala Trump ekwuola na Amerịka ga-eresi Saudi Arabia ụgbọelu agha F-35

    Onyeisiala Donald Trump na-achị mba Amerịka agwala ndị ntaakụkọ na Amerịka ga-eresi mba Saudi Arabịa ụfọdụ ụgbọelu F-35.

    Nke na-abịa dịka Onyeisiala Trump na Nwaeze Saudi Arabịa bụ Mohammed Bin Salman ga-enwe nzukọ n’ụbọchị Tuzde 18 Nọvemba, 2025.

    Trump kwuru na Amerịka ga-eresi Saudi Arabịa ụgbọelu ahụ n’ihi na ha na ha na-enwe ezi mmekọ.

    E kwuru na nzukọ ha ga-agbado ụkwụ n’isiokwu nchekwa nakwa akụrụngwa agha nuklịa. Nke a bụ oge mbụ Mohammed Bin Salman na-eme njem mba Amerịka kemgbe e gburu onye ntaakụkọ Jamal Khashoggi n’afọ asaa gara aga.

    Cheta na nchọpụta nnyocha Amerịka mere kwuru na ọ bụ Mohammed Bin Salman kwuru ka e gbuo onye ntaakụkọ ahụ mana ọ gọnarịrị ebubo ahụ.

18. 18 Nọvemba 2025Ndị ntọrị atọrọla Fada ụka Katọlik na ọtụtụ ndị ọzọ na Kaduna steeti

    Akwa na-ada ugbua na dayọsis ụka Katọlik nke Kadụna n’ihi na ndị oji egbe awakpola otu ụlọ ụka, gbagbuo otu onye, ma tọrọ Fada na-elekọta parishi ahụ bụ Fada Bobbo Pascal na ọtụtụ ndị ọzọ.

    Ozi Archdayọsis ụka Katọlik nke Kaduna wepụtara kwuru na mkpamkpa ahụ kpara n’isi ụtụtụ Mọnde 17 Nọvemba 2025 n’ụlọuka St Steven parish dị na Kushe Gudu n’okpuru ọchịchị Kagoro nke Kaduna steeti.

    Chancellor nke dayọsis ahụ bụ Fada Christian Okewu Emmanuel dere: “Anyị na-agwa unu na ndị omekome wakporo otu parish anyị bụ St. Steven parish di na Kushe Gudu ebe ha nọ tọrọ ụkọchukwu na-elekọta parish ahụ bụ Fada Bobbo Pascal”.

    “Ka ndị ọjọọ ahụ na-akpa ike ahụ, ha gburu nwanne ụkọchukwu ọzọ bụ Fada Anthony Yero".

    “Anyi na-arịọ ndị ụka niile ka ha sonye anyị n’ekpere ka ndị ntọrị tọhapụ Fada Pascal, nakwa ka mkpụrụobi onye nke nwụrụ anwụ zuru ike na ndokwa.”

    Ka ọ dị ugbua, ndị ntọrị ahụ ezitebeghị ozi ọbụla gbasara ihe bụ iwe ha maọbụ ihe ha chọrọ.

19. 18 Nọvemba 2025Otu nchekwa nke ụlọọrụ UN akwadola atụmatụ Onyeisiala Trump nwere maka Gaza

    Ndị otu nchekwa mbaụwa nke ụlọọrụ UN atụọla vootu maka ịkwado mkpebi nke ndị Amerịka mere banyere atụmatụ isi ihe iri abụọ nke onyeisiala mba Amerịka bụ Donald Trump wepụtara maka Gaza.

    Ihe dị n'ime atụmatụ ahụ gụnyere inwe ntọala ga-ehibe otu mbaụwa bụ International Stabilisation Force (ISF), nke mba Amerịka kwuru na ọtụtụ mba ndị a na-akpọghị aha enyeela aka na ya.

    Mba iri na atọ - gụnyere UK, Fransị na Somalia - kwadoro mkpebi a, mana ọ dịghị onye akwadoghị ya dịka mba Rọshịa na Chaịna jụrụ ịtụ vootu.

    Onye na-ekwuchitere odeakwụkwọ ukwu nke ụlọọrụ UN bụ Antonio Guterres kwuru na “ịnabata ya bụ "nzọụkwụ dị mkpa n'ịkwado nkwekọrịta ịkwụsị agha ahụ."

    Cheta na ndị Hamas jụrụ mkpebi ahụ, na-ekwu na ọ naghị emezu ihe ndị Palestine chọrọ banyere ikike ha.

    N'okpuru mkpebi ahụ, ISF na Izrel nakwa Ijipt ga-arụkọ ọrụ, yana ndị uweojii Palestine a zụrụ azụ ma nyochaa ọhụrụ, iji nyereaka chekwaa mpaghara okeala ma hụ na e nwere usoro inapụ ndịagha na-abụghị nke steeti ngwaagha nke gụnyere Hamas.

20. 18 Nọvemba 2025Ụtụtụ ọma, ndị be anyị

    Nnọọ n'ọgbakọ BBC News Igbo taa bụ Tuzde, Nọvemba 18, 2025.

    Ekpere anyị taa bụ ka ọ dịrị onye ukwu mma ma dịkwara onye nta mma.

    Biko, sonyere anyị dịka anyị na-ewetere unu akụkọ ihe na-eme Naịjirịa nakwa ụwa niile.

    Sonyekwara anyị n'akara soshal midịa anyị dị iche iche nke gụnyere WhatsApp Chanelụ, Facebook na Instagram maka akụkọ ndị ọzọ dị n'ụdị onyonyoo na foto.

    Ya gazie!