Mmadụ abụọ anwụọla dịka ndị oji egbe wakporo ụlọọrụ ndị uweojii n'Ebonyi steeti

Mkpuchi Na Eme Ozugbo

1. 17 Mee 2021Anyị anwụchiela otu onye ọzọ so wakpoo ụlọmkpọrọ Owere - Ndị Uweojii Imo steeti

   

   Ebe foto si, Imo State Police

   Ndị uweojii Imo steeti anwụchiela otu nwoke ha kwuru na ọ bụ onye ekperima ma bụrụkwa onye a na-enyo enyo maka iso wakpoo ụlọ mkpọrọ Owere.

   Orlando Ikeokwu, bụ ọnụ na-ekwuru ndị uweojii Imo steeti, kwuru nke a n'akwụkwọ ozi o zipụtara na mgbede Sọnde.

   Ikeokwu kwuru sị: "Nwoke a bụ Michael Osundu bụ onye Owere mana ọ na-ekwu na o bi na London, United Kingdom."

   "Anyị nwuchiri ya n'ihi okwu gbasara ihe ndị ekperima na-eme na steeti a, anyị na-arọkwa ya anya dịka otu n'ime ndị ekperima wakporo ụlọ mkpọrọ Owere nakwa isi ụlọọrụ ndị uweojii n'ụbọchị ise nke ọnwa Eprel."

   "Oge a nwuchiri ya, anyị hụrụ otu egbe 'pump action' n'aka ya, nakwa mgbọ egbe iri abụọ na isii."

   "Anyị hụkwara akwa ndị uweojii bụ nke o zoro n'ụgbọala ya."

   "Oge a gbara ya ajụjụ ọnụ, o kwuru na ọ bụ onye uweojii nwetara ọzụzụ n'ụlọ akwụkwọ ndị uweojii dị n'Ikeja."

   "Onyeisi ndị uweojii Imo steeti enyela iwu ka a malite nnyocha miri emi iji chọpụtachaa kpọmkwem ndị ha na nwa amadị ahụ na-arụkọ ọrụ."

2. 17 Mee 2021Ụnụ abọọla chi

   Igbo ndị ọ ga-adịrị mma, ụtụtụ ọma nụ.

   Ka izu ụka ọhụrụ a mịtara gị mkpụrụ ọma.

   Ngwa ka anyị gbapụ ya ọsọ na mgbasaozi nke taa.

   Daalụ dịka ị na-esonyere anyị.