Ihe ọchịchị m mepụtarala n'ime ụbọchị 100 gara aga - Gọvanọ Soludo

Mgbe e biputara ya 25 Juun 2022

O meela ụbọchị otu narị kamgbe Chukwuma Soludo na Onyeka Ibezim malitere ọrụ dịka Gọvanọ na Osote gọvanọ n'Anambra Steeti.

Ọ bụ n'ụbọchị iri na asaa nke ọnwa Maachị afọ 2022, ka e duru Soludo na Ibezim n'iyi ọrụ.

"Anyị rụrụ ihe karịrị awa asatọ n'ụbọchị ahụ e duru anyị n'iyi ọrụ, nke gosiri na anyị dị njikere maka ọrụ a," Soludo kwuru.

O kwuru nke a taa bụ Satọde, Jun 25, dịka ọ na-akọwara ndị Anambra ihe ọchịchị ya meputarala, nakwa ihe ndị cheere ha aka mgba.

Skip content and continue reading

Chukwuma Charles Soludo: Ihe ndị cheere Soludo aka mgba dịka Gọvanọ ọhụrụ Anambra Steeti11 Nọvemba 2021
Ihe anyị na-atụ anya n'aka Charles Soludo ka ọ ga-amaburu oche gọvanọ - Ndị Anambra16 Maachị 2022
Soludo Vs Willie Obiano: 'Anambra steeti ji ụgwọ ruru N100bn'22 Maachị 2022

End of content

Lee ụfọdụ ihe Soludo mepụtarala

Imeghari atụmatụ mkpata na mmefu ego nke afọ 2022 bụ nke Gọvanọ Willie Obiano meburu tupu ọ pụọ n'ọchịchị
Ịgbaso usoro ghe anya oghe n'ịhọpụta ndị Kọmishọna ya, nke ọtụtụ n'ime ha bụ ndị ntorobịa
Ihazi ọgbakọ ọzụzụ pụrụ iche maka ndị Kọmishọna na ndị isi ọrụ gọọmentị dị icheiche iji mee ka onye ọbụla n'ime ha mara ihe ọ na-eme

Ikpocha ahịhịa ma mepee nnukwu ọwa mmiri dị na Fegge nakwa Okpoko, na mpaghara Ọnịcha, iji gbochie ọdachi ide mmiri.

Ịkwụsị ọrụ ndị agboro na ndị mpịawa azụ n'ahịa nakwa okporoụzọ dị icheiche n'Anambra Steeti
Ịtọ ntọala nke ụlọahịa ọgbara ọhụrụ ebe a ga na-ere ọgwụ dịka iwu si kwado, n'Oba

Ịrụ okporoụzọ si Amasea gawa Ugwuoba
Ịmalite atụmatụ pụrụ iche iji wulite ọrụ ubi na nkọpụta ihe oriri n'Anambra steeti
Ihibe atụmatụ ịkụ osisi akị oyibo ruru otu nde kwa afọ, iji wulite ohere Anambra steeti nwere isi ịmụba akụnụba ya site n'ọrụ ubi
Ihibe atụmatụ ọ kpọrọ "adopt a school initiative", bụ nke o ji akpọ ndị ọgaranya Anambra ka ha họrọ ụlọakwụkwọ ọbụla dị ha mma, mezie ya ma wulite ya, n'ụzọ iji nyere gọọmentị aka n'ọrụ mwulite agụmakwụkwọ.

Atụmatụ Soludo tinyere iji belata enweghị nchekwa n'Anambra

Inye mgbaghara pụrụ iche (bekee na-akpọ 'amnesty') maka onye ekperima ọbụla ga-apụta rịọ mgbaghara ma kwụsị iyi ndụ egwu
Iwepụta akara ekwentị pụrụ iche nke ndị mmadụ ga-akpọ maka enyemaka - Akara ekwentị abụọ a bụ: 07039896429 na 09017280990
Iwepụta atụmatụ ịkwụ ụgwọ maka ndị ga-agbara gọọmentị ama iji nwuchie maọbụ gbochie ndị ekperima
Ịga leta Nnamdi Kanu na mkpọrọ iji mee ka iwe dajụọ n'obi ndị nkwado ya
Ihi kọmiti udo nke gụnyere ndị eze ọdịnala, ndị isi ụka, ndị ọchịchị obodo, na ọtụtụ ndị ọzọ ọnụ na-eru n'okwu na steeti ahụ
Ịhazi ekpere pụrụ iche n'ụlọụka dị icheiche ka udo wee chịa
Ịnabata otu jikọrọ ndị okpukperechi Islam bi n'Anambra ebe ha nọrọ nwee ọgbakọ maka mwulite nchekwa nakwa ịdịkọnotu

Ihe ndị cherela Soludo aka mgba kamgbe ọ malitere ọchịchị

Chukwuma Soludo — Nkọwa foto, Ndị ekperima emebiela ọtụtụ ụlọ gọọmentị kamgbe Soludo malitere ọchịchị

N'okwu Soludo kwuru iji cheta ụbọchị otu narị ọ rụrụla ọrụ dịka gọvanọ, o kwuru na ihe abụọ bụụrụ ya nnukwu ọgbatauhie bụ:

Ọnọdụ akụnụba Anambra oge o weere ọchịchị; na
Ọnọdụ nchekwa ọjọọ

Soludo kwuru na akpa Anambra steeti tọgbọ chakoo oge ọ batara, dịka o si sụọ ya na bekee, ọ kpọrọ ya "red treasury".

O kwukwara na ụgwọ 'gratuity' gọọmentị Anambra ji ndị lara ezumike nka tupu ọ bata n'ọkwa ruru nde naịra iri abụọ, n'ihi na akwụbeghị ha ụgwọ kamgbe afọ 2018.

N'aka nke ọzọ, ọnọdụ enweghị nchekwa gbagoro nnọọ elu dịka Soludo malitechara ọchịchị.

Skip Akachasị Gụọ and continue reading

Akachasị Gụọ