Real Madrid ta lashe Champions League na 14, bayan doke Liverpool

Real Madrid ta dauki Champions League na bana, bayan doke Liverpool 1-0 a karawar da suka yi a filin Stade de France da ke birnin Paris din Faransa ranar Asabar.

Vinicius Junior ne ya ci kwallon da ya bai wa Real Madrid damar lashe Champions League na 14 jumulla kenan.

Vinícius Júnior ya ci kwallo hudu kenan ya kuma bayar da shida aka zura a babbar gasar Zakarun Turai ta bana.

Wannan bajintar ta sa ya zama na farko daga Kudancin Amurka da yake da hannu a cin kwallo 10 a matakinsa mai shekara 21 da haihuwa a kaka daya a UEFA Champions League.

Wanda keda wannan tarihin shi ne Lionel Messi, mai shekara 21 a kakar 2008-09, wanda keda hannun a cin kwallo 14, ya zura tara ya kuma bayar da biyar aka jefa a raga.

Wannan si ne wasa na tara da suka fuskanci juna a Champions League, inda Real Madrid ta yi nasara a biyar, Liverpool ta ci uku da canjaras daya.

Real Madrid ta dauki kofi na 13 a kan Liverpool, bayan da ta doke ta 3-1 ranar 26 Mayun kakar 2017/18.

Real Madrid ita ce ta lashe La Liga na kakar nan, kuma na 35 jumulla, ta kuma dauki Champions League 14 jumulla - 1955-56, 1956-57, 1957-58, 1958-59, 1959-60, 1965-66, 1997-98, 1999-2000, 2001-02, 2013-14, 2015-16, 2016-17, 2017-18 da kuma 2021/22..

Ita kuwa Liverpool tana da babban kofin gasar Zakarun Turai guda shida - 1976-77, 1977-78, 1980-81, 1983-84, 2004-05, 2018-19.

Tun farko Liverpool ta sa ran daukar kofi hudu a kakar nan, ta kuma lashe Carabao Cup da FA Cup a bana, amma Premier League ya gagare ta, bayan da Manchester City ta dauki na shida jumulla ranar Lahadi.

City ta yi nasarar lashe Premier League da tazarar maki daya tsakaninta da Liverpool, wadda ta kasa daukar Champions League na 2021/22 a hannun Real Madrid ranar Asabar.

Ga tarihin jerin haduwa tara tsakanin kungiyoyin:

Kakakr 2021/22

Champions League wasan karshe Asabar 28 ga watan Mayu

Kakar 2020/2021

Champions League Laraba 14 ga watan Afirilu

Champions League Talata 6 ga watan Afirilu

Kakar 2017/2018

Champions League wasan karshe Asabar 26 ga watan Mayu

Kakar 2014/2015

Champions League Talata 4 ga watan Nuwamba

Champions League Laraba 22 ga watan Oktoba

Kakar 2008/2009

Champions League Talata 10 ga watan Mayu

Champions League Laraba 25 ga watan Fabrairu

Kakar 1980/1981

European Cup Laraba 27 ga watan Mayu

Wadanda suka buga wa Real Madrid wasan:

Masu tsaron raga: Courtois, Lunin, Fuidias.

Masu tsaron baya: Carvajal, E. Militão, Alaba, Vallejo, Nacho, Marcelo, F. Mendy.

Masu buga tsakiya: Kroos, Modrić, Casemiro, Valverde, Lucas V., D. Ceballos, Isco, Camavinga.

Masu cin kwallaye: Hazard, Benzema, Asensio, Jović, Bale, Vini Jr., Rodrygo, Mariano.