Sergio Aguero ya yi atisaye a Barcelona ranar Laraba
Asalin hoton, Barcelona FC
Kwanan nan Barcelona za ta fara cin moriyar Sergio Aguero, bayan da ya fara atisaye ranar Laraba.
Aguero ya koma Barcelona da taka leda a bana, bayan da kwantiraginsa ya kare a Manchester City a karshen kakar bara.
Mai shekara 33, wanda ya bayar da gudunmuwar da Argentina ta lashe Copa America a bana, ya ji rauni tun kan fara wasannin kakar bana.
Barcelona wadda ke fuskantar kalubale a bana za ta yi murna da zarar dan kwallon ya fara buga mata tamaula.
Kungiyar Camp Nou tana ta shida a teburin La Liga, bayan da abokiyar hamayyarta, Atletico Madrid ta doke ta 2-0 - ta kuma sha kashi a wasa biyu na cikin rukuni a Champions League a bana.
Aguero ya murmure wanda a ranar Laraba ya buga atisaye a karawar sada zumunta da UE Cornella.
Yanzu dai ba a fayyace ko dan kwallon tawagar Argentina zai buga wa Barcelona gasar La Liga da za ta fafata da Valencia ranar Lahadi ba.
Daga nan ta fuuskanci Dynamo Kiev a Champions League, sai karawar hamayya ta El Clasico da Real Madrid za ta ziyarci Camp Nou ranar 24 ga watan Oktoba.
