Arsenal ta dauki Nicolas Pepe

Arsenal ta kammala daukar dan wasan tawagar kwallon kafar Ivory Coast, Nicolas Pepe daga Lille ta Faransa.

Gunners din ta dauki dan wasan a matsayin mafi tsada a tarihi kan fam miliyan 72.

Mai shekara 24, ya saka hannu kan yarjejeniyar shekara biyar a Emirates, bayan da likitoci suka duba lafiyarsa ranar Talata.

Pepe mai buga gefe daga gaba ya ci kwallo 35 a wasa 74 da ya yi a Lille, wadda ta dauko shi daga Angers a 2017.

Dan kwallon ya zama na hudu mafi tsada da aka saya a Premier bayan 'yan wasan Manchester United, Paul Pogba kan fam miliyan 89 da Romelu Lukaku kan fam miliyan 75 da kuma Virgil van Dijk na Liverpool kan fam miliyan 75.

A kakar da aka kammala ta 2018-19 a Ligue 1, dan kwallon Paris St Germain, Kylian Mbappe ne ya dara Pepe cin kwallo da taimakawa a zura a raga.

Arsenal ta bai wa dan wasan riga mai lamba 19.