Ana ci gaba da gudanar da jana'izar Ali Khamenei a Tehran
Asalin hoton, Getty Images
Kafafen yaɗa labaran Iran sun bayyana cewa ana ci gaba da gudanar da jana'izar tsohon jagoran addinin ƙasar, Ali Khamenei, a babban birnin ƙasar, Tehran.
Rahotannin sun nuna cewa miliyoyin mutane ne suka fito domin halartar taron jana'izar, yayin da aka wallafa hotuna da ke nuna dimbin mahalarta taron.
Masu shirya jana'izar sun ce za a yi tattaki da gawar ta amfani da wata mota ta musamman da aka tanada domin ɗaukar gawar marigayin, kuma ana sa ran tattakin zai ɗauki tsakanin sa'o'i 10 zuwa 12.
Saboda yawan mahalarta da kuma buƙatar tabbatar da tsaro, hukumomin Iran sun sanar da sabbin matakan zirga-zirga a biranen Tehran da Qom, inda aka yi gyare-gyare na musamman domin sauƙaƙa gudanar da bukukuwan jana'izar.
A ranar Lahadi, sabon jagoran Jamhuriyar Musulunci ta Iran, Mojtaba Khamenei, bai halarci sallar jana'izar mahaifinsa ba. Sai dai daga baya an fitar da wata sanarwa da aka danganta da shi, wadda ta sake tabbatar da naɗin Gholamhossein Mohseni Ejei a matsayin shugaban ɓangaren shari'ar ƙasar.
Ana sa ran bukukuwan jana'izar za su ci gaba cikin kwanaki masu zuwa, kafin daga bisani a kai gawar Ali Khamenei zuwa birnin Mashhad domin yi masa jana'iza ta ƙarshe da kuma binne shi.