Labarin wasanni daga 23 zuwa 29 ga watan Agustan 2025

Rahoto kai-tsaye

Mohammed Abdu da Umar Mikail

1. 25 Agusta 2025Saka zai yi jinyar mako huɗu

   

   Asalin hoton, Getty Images

   Ɗanwasan Arsenal, Bukayo Saka ya ji raunin da ake sa ran zai yi jinyar mako huɗu, inda ake tunanin ba zai samu buga wasan Arsenal da Liverpool na ranar Lahadi ba, da kuma wasannin neman gurbin shiga kofin duniya da Ingila za ta fafata da Andorra da Serbia a watan gobe.

   An cire ɗanwasan mai shekara 23 ne ana tsaka da wasan Arsenal da Leed United a ranar Asabar da ta gabata.

   Kyaftin ɗin Arsenal Martin Odegaard shi ma ya ji rauni a wasan na Leeds, ina aka cire shi kafin a kammala wasan wanda ƙungiyar ta lallasa Leeds da ci biyar da nema.

   Har yanzu ba a fayyace yanayin raunin Odegard ba, amma ana sa ran zai buga wasan ƙungiyar da Liverpool.

   Da farko magoya bayan Arsenal sun shiga fargaba ne ganin ɗanwasan ya yi kusan wata uku yana jinya a kakar bara.

   Sai dai ana ganin ƙungiyar na da zaratan ƴanƙwallo, kasancewar a kakar bana ta ɗauko manyan ƴanwasa irin su Viktor Gyokeres da Noni Madueke da Eberechi Eze.

2. 24 Agusta 2025Son da Muller sun zura ƙwallo a wasansu na farko a Amurka

   

   Asalin hoton, Getty Images

   Tsohon kyaftin ɗin ƙungiyar Tottenham ta Ingila, Son Heung-min da da tsohon kyatfin ɗin ƙungiyar Bayern Munich ta Jamus Thomas Muller sun fara taka leda da ƙafar dama a gasar Amurka ta Major League Soccer, inda suka fara da zura ƙwallo a wasannin da suka buga a ranar Asabar.

   Son ɗan asalin ƙasar Koriya ta Kudu mai shekara 33 ya jefa ƙwallo ne a bugun tazara a minti shida da shigarsa filin wasa domin fara taka leda a ƙungiyar Los Angeles FC a gasar MLS, inda aka tashi wasan 1-1 da ƙungiyar FC Dallas.

   Ƙungiyar ta kafa tarihin cinikayya mai tsada wajen ɗauko shi a kan fam miliyan 20 daga Tottenham inda ya yi sama da shekara 10 yana murza leda.

   "Na yi farin cikin zura ƙwallo a wasana na farko a MLS, amma na fi murna da samun maki ɗaya da muka yi."

   A ɗaya ɓangaren kuma, Muller mai shekara 35 ya zura ƙwallo ne a bugun fanareti, inda ƙungiyarsa ta Vancouver Whitecaps ta doke St Louis City da ci uku da biyu.

3. 23 Agusta 2025Labarai da dumi-dumi, Arsenal ta kammala ɗaukar Eze daga Crystal Palace

   

   Asalin hoton, Reuters

   Arsenal ta kammala sayen ɗan wasan tawagar Ingila, Eberechi Eze daga Crystal Palace.

   Gunners ta amince da biyan fam miliyan 60 ciki har da fam miliyan takwas na tsarabe - tsarabe ga mai shekara 27, wanda shi ne na bakwai da ta ɗauka a kakar nan.

   Tun farko Tottenham ce ke cinikin Eze, har sun kai ga matsaya kan kuɗin da Tottenham za ta biya, bayan amincewa da Palace da ɗan wasan suka yi.

   Tuni Gunners ta gabatar da Eze gaban ƴan kallo a Emirates tun kan fara wasan Premier League da Leeds United.

   Eze, wanda ya yi kuruciya a Grenwich, ya fara taka leda a QPR, bayan da ya bar Arsenal daga nan Palace ta saye shi kan fam miliyan 19.5 a 2020.

   Ya fara buga wa Ingila tamaula a watan Yunin 2023, kuma wata biyar tsakani ya saka hannu kan yarjejeniyar ci gaba da taka leda a Selhurst Park zuwa karshen kakar 2027.

   Eze ya ci ƙwallo 40 a wasa 169 a Palace, wanda ya ci ƙwallo 14 ya kuma bayar da 11 aka zura a raga a kakar da ta wuce a dukkan fafatawa hae da wadda ya ci Manchester City da suka lashe FA Cup.

   Ya fara buga wa Palace tamaula a bana a wasan Premier League da Chelsea a makon farko, amma bai yi karawar cike gurbin shiga Conference League ba, saboda cinikinsa da Gunners ke yi.

4. 23 Agusta 2025

   

   Asalin hoton, Getty Images

   Manchester City na ci gaba da zawarcin ɗan wasa mai kai hari dan kasar Brazil mai shekara 24, wanda Real Madrid ta yi kiyasin darajarsa ta kai yuro miliyan 80. (ESPN), external

   Ita ma Arsenal na sha'awar Rodrygo, kuma Liverpool na son daukarsa domin maye gurbin ɗan wasan Colombia Luis Diaz,mai shekara 28,wanda ya koma taka leda a Bayern Munich a farkon bazara . (Teamtalk), external

   Ange Postecoglou da Jose Mourinho na cikin wadanda suke neman aiki a Nottingham Forest idan an kori Nuno Espirito Santo. (Sun), external

   Real Madrid na zawarcin dan wasan tsakiya na Crystal Palace da Ingila Adam Wharton mai shekara 21. (AS - in Spanish), external

5. 23 Agusta 2025

   

   Asalin hoton, Getty Images

   Ana sa ran dan wasan Kamaru Andre Onana, mai shekara 29, zai ci gaba da zama a Manchester United, duk da rashin tabbas kan makomarsa da kuma rade-radin da ake yi cewa kungiyar na iya daukar golan Royal Antwerp dan kasar Belgium Senne Lammens, mai shekara 23.(Mail), external

   Antwerpna son a biya ta kusan fan miliyan 17 domin cefanar da Lammens, wanda kawo yanzu ya kasa yi wa kasarsa ta Belguim wasa . (Sun), external

   Tottenham ta shirya tsaf don yin tayin sama da fan miliya 60 ga dan wasa mai kai hari na Machester City da Brazil Savinho mai shekara 21 . (Fabrizio Romano), external

   West Ham ta mika tayin neman dan wasan Monaco Soungoutou Magassa, mai shekara 21, kuma tana kokarin kammala cinikin dan wasan tsakiyar Faransa na kasa da 'yan shekara 21.(Guardian), external

   Amma Monaco ta ki amincewa da tayin farko, wanda ya kai kusan fam miliyan 14 da kuma karin fam miliyan 2.6 , kodayake suna tsammanin Hammers za ta dawo da wani sabon tayi.

   Everton ta tuntubi Villarreal kan yiwuwar kulla yarjejeniya da dan wasan gaban Kamaru Etta Eyong mai shekaru 21. (El Chiringuito - in Spanish)

6. 23 Agusta 2025Frank ya zama na uku da ya doke Guardiola a gida da ƙungiya biyu, Manchester City 0 - 2 Tottenham

   Thomas Frank ya yi nasara a kan City a Nuwambar 2022, kenan ya zama na uku da ya doke Pep Guardiola a ƙungiya a Etihad a Premier League, bayan Jose Mourinho a Real Madrid da Manchester United da kuma Antonio Conte a Chelsea da Tottenham.

   

   Asalin hoton, Getty Images

7. 23 Agusta 2025Karo na biyu a jere Tottenham tana cin City a Etihad, Manchester City 0 - 2 Tottenham

   

   Asalin hoton, Getty Images

   Tottenham Hotspur ta zama ta biyu da ta doke Pep Guardiola a Etihad karo na biyu a jere a kakar tamaula, wadda ta fara wannan ƙwazon ita ce Manchester United a 2019/20 da kuma a 2020/21.

   Wasanni huɗu da Guardila zai fuskanta a Premier:

   • Brighton a waje
   • Manchester United a gida
   • Arsenal a waje
   • Burnley a gida

8. 23 Agusta 2025Tottenham ta haɗa maki uku a kan Man City a Premier, Manchester City 0 - 2 Tottenham

   

   Asalin hoton, Getty Images

   Manchester City ta yi rashin nasara 2-0 a wasan mako na biyu a Premier League a hannun Tottenham da suka kara ranar Asabar a Etihad.

   Tottenham ta ci ƙwallon biyun tun kan hutu ta hannun Brennan Johnson da kuma Joao Palhinha.

   Kenan Tottenham ta haɗa maki shiga daga wasa biyu, bayan da ta fara da doke Brentford 3-0 a makon farko a babbar gasar tamaula ta Ingila

   Ita kuwa City, wadda ta fara da doke Wolverhampton 4-0 a Molineux a karawar farko tana da maki uku daga fafatawa biyu.

9. 23 Agusta 2025

   Jama'a barkanmu da shiga shirin sharhi da bayanan wasanni kai tsaye tare da ni Mohammed Abdu Mamman Skipper Tw.

   Za ku iya tafka muhawara a shirin ko bayar da gudunmuwa a BBCHausa Facebook.