Wannan shafi ne da ke kawo muku labaran abubuwan da ke faruwa a Najeriya da sauran sassan duniya
Ahmad Bawage da Abdullahi Bello Diginza
Asalin hoton, Getty Images
Yayin da ake gudanar da jana'izar Fafaroma Francis a yau Asabar, shin ko kun san me ya yi ajalinsa?
Fafaroma dai ya rasu ne a safiyar Litinin, 21 ga watan Afrilun 2025 - yana da shekara 88 a duniya.
Ku danna nan don karanta wasiyyar da ya bari da kuma abin da ya yi ajalinsa.
Asalin hoton, Reuters
Yanzu an isa da gawar Fafaroma Francis zuwa dandalin St Peter's.
An saka gawar Fafaroman cikin wani akwati guda wanda ba shi da wani kayan alatu, maimakon saka shi cikin akwatuna guda uku kamar yadda aka saba yi idan ana binne Fafaroma - saboda ya bar wasiyyar cewa a saka shi cikin akwati guda.
A tsawon rayuwarsa ta jagorancin mabiya ɗarikar Katolika a duniya, ya sha nuna damuwa kan halin da ƴan gudun hijira ke ciki a Gaza, inda ya buƙaci a samar da zaman lafiya don mutane su koma gidajensu.
Asalin hoton, Getty Images
Shugaban Ukraine Volodymyr Zelensky ya haɗu da Donald Trump, kafin fara jana'izar Fafaroma Francis a dandalin St Peter's, a cewar mai magana da yawun Zelensky, Serhiy Nikiforov.
Duka shugabannin na wajen dandalin St Peter's don jin addu'o'i kafin binne Fafaroma.
Asalin hoton, Getty Images
Bayan Donald Trump, Yariman Wales shi ma ya yi wa gawar Fafaroma Francis gaisuwar ban-girma.
Yarima William na halartar jana'izar ce a madadin mahaifinsa, Sarki Charles.
Donald Trump ya yi wa gawar Fafaroma Francis gaisuwa ban-girma a dandalin St Peter's.
Daga nan ne shugaban Amurkar ya je ya nemi wuri ya zauna tare da sauran shugabannin duniya.
Asalin hoton, Getty Images
Shugabannin duniya da dama da kuma sarakuna ne ke za su halarci jana'izar Fafaroma Francis a yau Asabar, sun kunshi Yarima William da shugaban Faransa Emmanuel Macron da Sarkin Sifaniya Felipe VI da Sarauniya Letizia da kuma shugaban Brazil Luiz Inácio Lula da Silva.
Akwai kuma wasu manyan shugabannin duniya da za su kasance a wurin jana'izar a dandalin St Peter's, sun haɗa da:
Asalin hoton, Reuters
A yau ne Amurka da Iran za su haɗu a Oman, domin ci gaba da tattaunawa kan shirin makamin nukiliyar Tehran.
Ɓangarorin biyu za su fara aiki a kan batun da taƙaita samar da makamin nukiliya, yayin da ita kuma Iran za a janye takunkuman karya tattalin arzikin da aka kakaba mata.
Wakilin BBC ya ce wannan ne karo na huɗu da ƙasashen biyu za su tattauna kan shirinta na makamin nukiliya.
Sai dai shi ne karon farko da kwararru kan makamin nukiliya na ɓangarorin biyu za su gana.
A ranar Laraba sakataren harkokin wajen Amurka, Marco Rubio, ya ce cikin yarjejeniyar za a buƙaci Iran ta dakatar da bunƙasa makamashin uranium.
Asalin hoton, Getty Images
Sama da mabiya darikar Katolika dubu 200 ne ake sa ran za su halarci addu'oi ga Fafaroma Francis da za a yi a dandalin St Peters.
Dandazon mutane sun kwashe daren jiya, suna jiran layi ya zo kan su domin tantancewa a shingayen jami'an tsaro.
Wata da ta halarci jana'izar ta ce "hakika babbar dama ce gare ni da na samu zuwa nan, zuciyata na cike da alhini.
Jana'izar za ta kasance sassauka ba irin yadda aka saba gani ba, kamar yadda marigayi Fafaroma Francis ya bar wasiyya.
Masu bibiyar mu a wannan shafi barkan mu da safiyar Asabar.
Ku kasance da mu domin sanin halin da duniya take ciki - har ma da Najeriya da maƙwabtanta.
Ahmad Bawage ne zai jagoranci kawo muku labaran.
