Neymar zai ci gaba da taka leda a Santos

Rahoto kai-tsaye

Mohammed Abdu da Abdulrazzaq Kumo

1. 21 Yuni 2025Nuno Santo zai ci gaba da horar da Forest zuwa 2028

   Nuno Espirito Santo ya saka hannu kan yarjejeniyar ci gaba da horar da Nottingham Forest har zuwa karshen kakar 2028, sakamakon da ya kai ƙungiyar zuwa gasar zakarun Turai a karon farko tun bayan 1995-96, kamar yadda ungiyar dake buga Premier League ta sanar ranar Asabar.

   Nuno, ɗan kasar Portugal ya horar da Wolverhampton Wanderers da kuma Tottenham Hotspur, ya koma aikin kociyan Forest a Disambar 2023, wanda ya hana ƙungiyar faɗuwa daga Premier League.

   Sai kuma Forest ta kare a mataki na bakwai a teburi a 2024/25 - mataki mafi ƙyau tun bayan shekara 30.

   Forest za ta wakilci Ingila a Conference League a kaka mai zuwa ta zakarun Turai.

2. 21 Yuni 2025Jackson ya bai wa magoya bayan Chelsea hakuri

   Nicolas Jackson ya nemi afuwa ga magoya baya, sakamakon jan katin da aka yi masa da ta kai Chelsea ta yi rashin nasara a hannun Flamengo a wasa na biyu a rukuni na huɗu a Club World Cup.

   Ɗan wasan tawagar Senegal ya karɓi jan kati a minti huɗu da shigarsa wasa a zagaye na biyu, sakamakon ketar da ya yiwa Ayrton Lucas ranar Juma'a a wasan da ta yi rashin nasara 3-1 a Philadelphia.

   Karo na biyu da aka bai wa Jackson jan kati, bayan a karawa da Newcastle United a Premier League a watan jiya.

3. 21 Yuni 2025Jan katin da aka yiwa Jackson ya sa an ci Chelsea a Club World Cup

   An bai wa Nicolas Jackson jan kati a wasan da Chelsea ta yi rashin nasara 3-1 a hannun Flamengo a Club World Cup.

   Pedro Neto ne ya fara ciwa Chelsea ƙwallo daga baya aka farke aka kara mata na biyu, sai kuma aka kori Jackson a minti shida a zagaye na biyu da shigarsa wasan, sannan aka kara na uku a ragar ƙungiyar Stamford Bridge.

   An buga wasan ne a gaban ƴan kallo 54,019 a Lincoln Financial Field - hakan ya sa an bar Chelsea da cin wasa ɗaya da rashin nasara ɗaya a karawa biyu a rukuni na huɗu.

4. 21 Yuni 2025

   Tottenham ta tuntuɓi Bournemouth kan ko akwai sararin sayen ɗanwasan gaban Ghana Antoine Semenyo mai shekara 25 sai dai ba su kai ga batun kwantiragi ba zuwa yanzu. (The Athletic - subscription required)

   Fulham na nazarin zaɓin dawo da Joao Palhinha, mai shekara 29, shekara guda bayan cefanar da ɗanwasan tsakiyar na Portugal ga Bayern Munich kan fam miliyan 48. (Mail, external)

   Sunderland ce ta fi yin nisa a zawarcin ɗanwasan Dynamo Kyiv, Vladyslav Vanat, daidai lokacin da rahotanni ke cewa ƙungiyar ta Ukraine na neman fam miliyan 21 kan ɗanwasan mai shekara 23. (Express, external)

5. 21 Yuni 2025Bayern Munich ta kai zagayen gaba a Club World Cup a Amurka

   Bayern Munich ta zama ta farko da ta kai zagaye na biyu a Fifa Club World Cup, bayan da ta doke Boca Junior 2-1.

   Ƙungiyar da Vincent Kompany ke jan ragama na bukatr maki ɗaya a wasan karshe a cikin rukuni da za ta yi da Benfica, domin ta ja ragamar rukunin.

   Idan kuma Bayern ta zama ta farko a rukunin za ta fafata da Chelsea a karawar zagayen ƴan 16, idan ƙungiyar dake buga Premier League ta yi ta biyu a rukuninta.

   Chelsea tana mataki na biyu a rukuni a yanzu haka, sakamakon rashin nasara 3-1 a hannun Flamengo ranar Juma'a.

   An kawo karshen wasa tara a jere da Boca ta yi ba tare da rashin nasara ba, kuma ƙungiyar ta Argentina tana da damar kai wa zagayen gaba da ɗura ƙwallaye da yawa a raga da zarar Bayern ta ci Benfica.

6. 21 Yuni 2025

   Jama'a barkan mu da kasancewa a shirin sharhi da bayanan labarin wasannin a faɗin duniya daga Asabar 21 ga watan Yuni zuwa 28 ga watan Yunin 2025.

   Sunana Mohammed Abdu Mamman Skeeper Tw zan gabatar muku da shirin.