Neymar zai ci gaba da taka leda a Santos

Rahoto kai-tsaye

Mohammed Abdu da Abdulrazzaq Kumo

1. 24 Yuni 2025Man United ta kara farashin Mbeumo zuwa £60m

   Manchester United ta mika karin farashin £60m domin sayen ɗan wasan Brentford, Bryan Mbeumo.

   A watan nan United ta taya ɗan wasan mai shekara 25 kan £45m da karin tsarabe-tsaraben da ya kai £10m.

   Ana sa ran United za ta ci gaba da tattaunawa kan cinikin ɗan wasan da zai zama na biyu da za ta saya.

   Tuni United ta sayi Matheus Cunha kan £66.5m daga Wolverhampton.

   United za ta fara karɓar horo daga ranar 7 ga watan Yulin 2025.

   To sai dai sabon kociyan Tottenham, Thomas Frank na son ɗaukar Mbeumo, harma yana ƙwaɗaita masa cewar za su buga Champions League a kaka mai zuwa.

   Frank ya bar aikin horar da Brentford ya koma Tottenham, wanda ya maye gurbin Ange Postecoglou.

2. 24 Yuni 2025Messi zai fuskanci PSG a zagaye na biyu a Club World Cup

   Lionel Messi zai fuskanci tsohuwar ƙungiyarsa, Paris St Germain a wasan zagaye na biyu, bayan da Inter Milan ta tashi 2-2 da Palmeiras a wasan karshe a cikin rukunin farko.

   Makin da suka samu a wasan ya kai ƙungiyon biyu zagayen ƴan 16.

   Tadeo Allende da Luis Suarez suka fara ci wa Inter ƙwallao a gaban ƴan kallo 60,914 a filin wasa na Hard Rock.

   Daga baya ne ƙungiyar Brazil ta farke biyun sauran minti 10 a tashi wasan ta hannun Paulinho da kuma Mauricio.

   Inter ce ta yi ta biyu a rukunin farko, inda Messi zai fuskanci PSG, wadda ya bugawa wasa daga 2021 zuwa 2023.

3. 23 Yuni 2025Gundogan ya ce har yanzu yana da rawar da zai taka a City

   Ilkay Gundagan ya ce zai ci gaba da farincikin ci gaba da taka leda a Manchester City zuwa kaka masu zuwa, domin gwabzawa a kololuwar gasar tamaula.

   Dan wasan tawagar Jamus, mai shekara 34 ya sake komawa Etihad a bara, bayan kaka daya a Barcelona, wanda ake alakanta shi da zai koma taka leda a Galatasaray.

   Sai dai Gundogan ya ce bai yanke tsammanin zai bar City ba nan gaba, amma yanzu haka yana da rawar da zai taka a kungiyar da Pep Guardiola ke jan ragama.

   Tuni dai City ta kai zagayen gaba a Club World Cup tare da Juventus a rukuni na bakwai.

4. 23 Yuni 2025Wasannin Club World Cup ranar Talata

   FIFA Club World Cup rukunin farko

   • FC Porto da Al Ahly a filin wasa na MetLife
   • Inter Miami da Palmeiras a filin wasa na Hard Rock

   FIFA Club World Cup rukuni na uku

   • Auckland City da Boca Juniors a filin wasa na GEODIS Park
   • Benfica da Bayern Munich a filin wasa na Bank of America

5. 23 Yuni 2025Rudiger ya yi korafin an ci zarafinsa a Club World Cup

   Antonio Rudiger ya yi zargin an ci zarafinsa a lokacin wasan da Real Madrid ta doke kungiyar Mexico, Pachuca ranar Lahadi, in ji Xabi Alonso.

   Alonso ya tabbatar da cewar sun shigar da korafi ga Fifa, bayan faruwar lamarin kusan tashi daga karawar da kungiyar Sifaniya ta ci 3-1 a Charlotte.

   Rudiger da kyaftin din Pachuca, Gustavo Cabral sun yi cacar baki daf a tashi daga wasan, amma ba a fayyace ko an ci zarafinsa daga wajen dan wasa ko kuma daga wajen yan kallo.

   Real Madrid, wadda take rukuni na takwas a Club World Cup ta hada maki hudu daga wasa biyu

6. 23 Yuni 2025

   Arsenal na tunanin janye tayin fam miliyan 70 da ta gabatar kan ɗan wasan RB Leipzig Benjamin Sesko, mai shekara 22, sakamakon albashin da ɗan wasan na Slovenia ke buƙata, yayin da za ta iya karkata akalarta zuwa kan ɗan wasan Sporting da Sweden Viktor Gyokeres, mai shekara 27. (Mirror)

   Manchester United na nuna sha'awarsta kan ɗan wasan Fiorentina da Italiya Moise Kean mai shekara 25, wanda ke da farashin fam 44.5m a ƙunshe a cikin kwantiraginsa. (La Gazzetta dello Sport)

   Bayern Munich ta shiga jerin ƙungiyoyin da ke zawarcin ɗan wasan Chelsea Jamie Gittens, mai shekara 20. Zakarun na Jamus na da niyyar bai wa Borussia Dortmund fam miliyan 55 kan ɗan wasan. (Kicker)

   Yunƙurin Juventus na sayen ɗan wasan gaban Manchester United Jadon Sancho mai shekaru 25 ya dogara ne kan ko ƙungiyar ta Italiya za ta ɗauki Francisco Conceicao daga Porto. (Corriere dello Sport)

7. 23 Yuni 2025Ko Jeremie Frimpong zai maye gurbin Alexander-Arnold a Liverpool?

   Tun bayan da Trent Alexander-Arnold ya bar Liverpool zuwa Real Madrid a watan jiya, ya bar wagegen gurbi a kungiyar, sai dai kuma dan wasan da aka saya madadinsa Jeremie Frimpong ya ce a shirye yake ya share hawayen magoya bayan kungiyar Anfield.

   Frimpong ya koma Liverpool daga Bayern Leverkusen ƴan awanni tsakani da Alexander-Arnold ya koma Real Madrid - shi ne na farko da Arne Slot ya dauka tun bayan da kungiyar ta lashe Premier League a kakar da ta wuce.

   Dan kasar Netherland zai yi takarar gurbin Alexander-Arnold tare da Conor Bradley a gurbin mai tsare baya daga bangaren gefen hagu.

   Frimpong ya yi kaka tara a Manchester City a matakin matashin dan kwallo, sai ya fara taka leda a matsayin kwararre a 2019 a Celtic da lashe babban kofin tamaula na Scotland.

   Mai shekara 24 ya koma Leverkusen a 2021 da yin wasa 34 da daukar Bundesliga a 2023/24.

8. 23 Yuni 2025Fifa ta ƙirƙiro ƙyautar 'Superior Player of the Match'

   Ana bayar da ƙyautar The Superior Award ga ɗan wasan da yafi taka leda a duk karawa - kuma ƴan kallo ne ke zaɓar wanda ake karramawa.

   Ana fara gudanar da kaɗa ƙuri'a daga minti na 60 zuwa na 88 a shafin Fifa a Intanet.

   Waɗanda suka lashe ƙyautar Superior Player Award a Club World Cup a Amurka sun haɗa da Michael Olise na (Bayern Munich) da Vitinha na (Paris St-Germain) da Pedro Neto daga (Chelsea) da kuma Phil Foden na (Manchester City).

   An sauya sunan ƙyautar daga 'Man of the Match' zuwa 'Player of the Match' a gasar cin kofin duniya a 2022.

   Bayan da aka tashi ba ci tsakanin Inter Miami da Al Ahly a wasan farko a Club World a Amurka, mai tsare ragar Inter Miami, Oscar Ustari shi ne na farko da ya lashe ƙyautar Superior Player of the Match.

9. 23 Yuni 2025Har yanzu ba a ci Real Madrid ba a Club World Cup

   Har yanzu ba a doke Real Madrid ba a Club World ba, idan ka cire rashin nasarar da ta yi a bugun fenariti a 2000 a hannun ƙungiyar Mexico, Necaxa.

10. 23 Yuni 2025Yadda rukuni na takwas yake a Club World Cup

    Duk wadda ta yi nasara a wasan Salzburg da Real Madrid za ta ja ragamar rukuni na takwas a Club World Cup, kuma wadda ta yi rashin nasara za ta yi ban kwana da gasar da zarar Al-Hilal ta doke Pachuca, wadda ta fice daga wasannin.

    Idan aka yi canjaras tsakanin Salzburg da Real Madrid, sannan Al-Hilal ta yi nasara ta doke Pachuca, kenan su ukun za su kasance da maki iri ɗaya.

    Kenan za a yi amfani da dokar head to head kenan.

11. 23 Yuni 2025

    Liverpool ta amince ta sayar da ɗan wasan baya Jarell Quansah, mai shekara 22, ga Bayer Leverkusen kan farashin fam miliyan 35. (Fabrizio Romano)

    Wrexham da Stockport County suna sha'awar tsohon ɗan wasan Wales da Rangers Tom Lawrence, mai shekara 31. (Sky Sports)

    Ana sa ran ɗan wasan bayan Denmark Andreas Christensen, mai shekara 29, zai bar Barcelona a bazarar nan. (Fabrizio Romano)

12. 23 Yuni 2025Yadda teburin rukuni na bakwai yake a Club World Cup

    Juventus da kuma Manchester City sun kai zagaye na biyu a rukuni na bakwai a Fifa Club World Cup, bayan da kowacce ta ci wasa biyu.

    Yanzu haka kowacce na fatan cin wasan karshe domin ta ja ragamar rukunin na bakwai.

    Duk wadda ta yi ta ɗaya a rukunin za ta fuskanci ta biyu a rukuni na takwas, wato watakila da Real Madrid.

13. 23 Yuni 2025Bellingham ya ci ƙwallo a wasan da Real Madrid ta doke Pachuca, Real Madrid 3-1 Pachuca

    Real Madrid ta haɗa maki huɗu a wasa biyu a Club World Cup, bayan da ta doke Pachuca 3-1 a wasa na biyu a rukuni na takwas ranar Lahadi.

    Sai dai Real ta yi karawar da ƴan wasa 10 a cikin fili, bayan da aka bai wa Raul Asencio jan kati, sakamakon ketar da ya yi wa Salomon Rondon.

    Real ta ci ƙwallayen ta hannun Jude Bellingham da Arda Guler da kuma Federico Valverde.

    Elias Montiel ne ya zare ɗaya da ta kai an tashi wasan 3-1.

14. 23 Yuni 2025Juventus ta caskara Wydad a Philadelphia, Juventus 4-1 Wydad

    Manchester City da Juventus suna jan ragamar teburin rukuni na bakwai a Fifa Club World Cup a Amurka, bayan da Juventus ta doke Wydad ta Morocco ranar Lahadi.

    Juventus ta yi nasarar cin 4-1.

15. 23 Yuni 2025Za a yi wa Bellingham tiyata a kafaɗa bayan Club World Cup

    Jude Bellingham ya sanar cewar za a yi masa tiyata, domin magance ciwon allon kafaɗa da yake fama da jinya.

    Ɗan wasan tawagar Ingila mai taka leda a Real Madrid yana ɗauke da raunin tun 2023, kuma haka yake taka leda da jin raɗaɗin ciwon

16. 23 Yuni 2025

    Golan Manchester United Andre Onana, mai shekara 29, yana son ya ci gaba da zama a filin wasan Old Trafford duk da cewa Monaco na zawarcin ɗan wasan na Kamaru. (Guardian)

    Zakarun Italiya Napoli sun bi sahun Inter Milan wajen zawarcin ɗan wasan gaban Manchester United Rasmus Hojlund, mai shekara 22, wanda Ruben Amorim ke shirin sanyawa a kasuwa. (Gazzetta Dello Sport)

    Dan wasan baya na Crystal Palace Marc Guehi, mai shekara 24, ya shirya tsaf don ƙasrasa shekara ta karshe ta kwantiraginsa idan har dan wasan baya bai samu tayin da ya kwanta masa a rai ba, duk da cewa Liverpool na zawarcin ɗan wasan bayan Ingila. (Guardian)

    Arsenal ta fuskanci cikas a yunƙurinta na ɗaukar ɗan wasan gaban Real Madrid Rodrygo, mai shekara 24, inda ɗan wasan na Brazil ke neman albashin fam miliyan 10.2 duk shekara. (AS)

17. 22 Yuni 2025Gallardo yana da burin doke Inter Milan a Club World Cup

    Kociyan River Plate, Marcelo Gallardo yana da tabbacin za su iya doke Inter Milan a wasa na uku a rukuni na biyar a Club World Cup, duk da cewar zai rasa wasu ƴan wasa da yawa a karawar.

    An bai wa ɗan wasan River Plate, Kevin Castano jan kati ranar Asabar a wasan da suka tashi 0-0 da Monterrey a filin Rose Bowl, an kuma bai wa Enzo Perez da kuma Giuliano Galoppo katin gargaɗi, kenan ba za su buga wasan Inter Milan ba ranar Laraba a Seattle.

    River Palate ɗaya ce daga ƙungiyar Kudancin Amurka da ta lashe Copa Libertadores huɗu da Intercontinental Cup a 1986.

    Canjaras da River Plate ta yi da Monterrey ya sa tana da maki huɗu iri ɗaya da na Inter Milkan a rukuni na biyar - kuma ƙungiyoyin za su kara a wasan karshe a cikin rukuni ranar Laraba.

18. 22 Yuni 2025

    Paris St-Germain na ci gaba da tattaunawa da ɗan wasan bayan Ukraine Illia Zabarnyi mai shekara 22 daga Bournemouth. (L'Equipe)

    Ɗan wasan Manchester United da Ingila Jadon Sancho, mai shekara 25, yana ba da fifikon komawa Napoli a madadin Juventus. (Sky Sports Italia)

    Buƙatar Arsenal na ƙara ƙarfin tsakiyarta na iya sa ƙungiyar ta arewacin Landan ta yi zawarcin ɗan wasan Brentford ɗan ƙasar Denmark Christian Norgaard mai shekara 31. (Mirror)

19. 22 Yuni 2025Alcaraz ya lashe gasar ƙwallon tennis ta Queens Club

    Wanda yake na biyu a jerin masu buga ƙwallon tennis a duniya, Carlos Alcaraz ya lashe gasar Queens Club kuma karo na biyu ranar Lahadi.

    Ɗan kasar Sifaniya, ya yi nasarar doke Jiri Lehecka da cin 7-5 6-7 (5-7) 6-2 amma fa da ƙyar da gumin goshi.

    Alcaraz ya ɗauki kofi na 21 jimilla ciki har da Grand Slam biyar, amma ya fuskanci kalubale a wajen Lehecka, ɗaya daga ƴan wasa biyar da suka yi nasara a kan ɗan kasar Sifaniya a kakar nan.

    Alcaraz ya ci wasa na 18 a jere, kuma kofi na biyar a shekarar nan - zai shiga gasar Wimbledon da kafar dama kenan, wadda za a fara 30 ga watan Yuni.

20. 22 Yuni 2025Everton ta kusan kammala cinikin Tete daga Fulham

    Everton ta kusan kulla yarjejeniyar sayen mai tsaron bayan Fulham, Kenny Tete.

    David Moyes zai ɗauki ɗan wasan ne, domin maye gurbin Ashley Young, mai shekara 39, wanda ba a tsawaita ƙwantiraginsa ba a Everton.

    Tete mai shekara 29, yarjejeniyarsa za ta kare a karshen watan nan na Yuni.