Abubuwan da ke faruwa a Najeriya da sauran sassan duniya, Litinin 29/09/2025

Rahoto kai-tsaye

Haruna Ibrahim Kakangi da Abdullahi Bello Diginza da Aisha Babangida

1. 29 Satumba 2025Taliban ta rufe hanyoyin sadarwa a ƙasar

   

   Asalin hoton, EPA

   Mahukuntan Taliban a Afghanistan sun sanar da rufe dukkanin hanyoyin sadarwa a fadin kasar, makonni bayan da suka fara katse intanet, domin hana abin da suka bayyana a matsayin tabarbarewar tarbiyya.

   Wata kungiya mai sa ido kan harkokin yanar gizo ta ce yanzu baki ɗaya ana fama da rashin intanet a kasar. Wani jami’in Taliban ya ce rufewar za ta ci gaba har sai an bayar da wata sanarwa a nan gaba.

   Shugaban Taliban, Hibatullah Akhund-zada, ya bayar da umarnin fara cire wayoyin sadawar dake ƙarkashin kasa na intanet tun a farkon wannan wata.

   Wakilin BBC ya ce kamfanin dillancin labarai na AFP ya ce ya rasa ji ta hanyoyin sadarwa daga ofishinsa na Kabul, ciki har da ta wayar salula.

2. 29 Satumba 2025Hamas ta karɓi daftarin tsare-tsaren tsagaita wuta a Gaza

   Wata majiya a Falasɗinu ta shaida wa BBC cewa jami'an Hamas sun karɓi daftarin tsare-tsaren Amurka kan tsagaita wuta a Gaza.

   Majiyar ta ce wasu wakilai masu shiga tsakani ne suka isar da saƙon daftarin zuwa ga Hamas.

   "Jami'ai daga Qatar da Masar ne suka miƙa daftarin na gwamnatin Amurka zuwa ga Hamas a Doha," in ji majiyar.

3. 29 Satumba 2025Har yanzu ba mu ga tsare-tsaren Amurka na tsagaita wuta a Gaza ba - Hamas

   

   Asalin hoton, Getty Images

   Wani babban jami'in ƙungiyar Hamas ya ce har yanzu ba su yi ido biyu da tsare-tsaren da Amurka ta yi ba kan tsagaita wuta a Gaza.

   Jami'in ya bayyana haka ne a zantawarsa a BBC, inda ya ce sun ji labarin tsare-tsaren na Shugaban Amurka Donald Trump, amma har yanzu ba a tura musu ba, sannan ya ƙara da cewa suna sa ran za a tura musu ne ta hannun masu shiga tsakani.

   Jami'in ya ce Hamas a shirye take ta nazarci daftarin, amma ya nanata cewa dole a kula da buƙatun ɓangaren Falasɗinu, sannan a tabbatar Isra'ila ta janye sojojinta daga Gaza domin kawo ƙarshen yaƙin.

   A game da ajiye makaman ƙungiyar, ya ce za a tattauna batun makamai ne bayan an tattauna tsare-tsaren, "Wanda ya kamata ya ƙunshi samar da ƴantancciyar ƙasar Falasɗinu."

4. 29 Satumba 2025Netanyahu ya amice da tsare-tsaren Amurka na tsagaita wuta a Gaza - Trump

   

   Asalin hoton, Reuters

   Shugaban Amurka Donald Trump ya ce Benjamin Netanyahu ya amince da tsare-tsarensa na tsagaita wuta a Gaza.

   Trump ya ce sun samu nasarar tsara yarjejeniyar ne bayan tattaunawa tsakanin Amurka da ƙawayenta na Gabas ta Tsakiya.

   Ya ce idan an ɗabbaƙa yarjejeniyar, Isra'ila za ta janye sojojinta a hankali daga Gaza, sannan ita ma Hamas za ta saki waɗanda take garkuwa da su.

   Netanyahu ya bayyana tsare-tsaren na Trump a matsayin hanya mai kyau ta kawo ƙarshen yaƙin da ake yi a Gaza.

   Ya ce babban burin yaƙin shi ne raba Hamas da makami da ceto waɗanda ke hannun ƙungiyar daga Gaza.

   Hamas dai ta ce har yanzu ba ta samu damar ganin tsare-tsaren ba.

5. 29 Satumba 2025Amurka na so ta sulhunta tsakanin Isra'ila da Iran

   

   Asalin hoton, Reuters

   Shugaban Amurka Donald Trump ya yaba da yarjejeniyar Abraham Accord ta samar da zaman lafiya tsakanin ƙasashen Larabawa da Isra'ila.

   Ya ce yarjejeniyar za ta taka rawa wajen samar da zaman lafiya a Gaza ta hanyar tsagaita wutar yaƙin da Isra'ila ke yi.

   Sai dai ya ce zai yi kyau idan Iran ta shiga ciki, inda ya ce, "ina tunanin wataƙila Iran za ta shiga tsarin domin ina tunanin suna son shiga tsare-tsaren domin samar da zaman lafiya."

   Ya ce Iran za ta shiga yarjejeniyar ta Abraham, sannan ya ƙara da cewa hakan zai taimaka mata wajen haɓɓaka tattalin arzikin ƙasarta.

   Asali dai an tsara yarjejeniyar Abraham ne a shekarar 2020 domin sulhunta tsakanin ƙasashen Larabawa da Isra'ila.

6. 29 Satumba 2025Netanyahu ya nemi afuwar Qatar kan hare-haren da ya kai ƙasar

   

   Asalin hoton, Reuters

   Shugaban Amurka Donald Trump ya ce yana da yaƙinin samar da yarjejeniyar tsagaita wuta a Gaza a ganawarsa ta yau da Firaministan Isra'ila Benjamin Netanyahu.

   Masu shiga tsakani sun ce a lokacin ganawar ne Netanyahu ya kira Firaministan Qatar Mohammed bin Abdulrahman bin Jassim Al Thani daga fadar White House na gwamnatin Amurka, inda ya nemi afuwa kan hare-haren da ya ƙaddamar a ƙasar kan masu shiga tsakani na Hamas.

   Ana ganin dai wannan na cikin tsare-tsare guda 21 da Amurka ta tsara, waɗanda Netanyahu ya ce suna dubawa.

   Ana tunanin daga ciki akwai janye sojojin Isra'ila daga yankunan da ta mamaye, sannan Isra'ila ta amince da ƙasar Falasɗinu, ita kuma Hamas ta sako waɗanda take garukwa da su a cikin kwana biyu ba tare da illa ba.

7. 29 Satumba 2025Shin rage wa Afirka ta Kudu maki zai ba Najeriya damar zuwa World Cup?

   

   Asalin hoton, Getty Images

   Kwamitin ladabtarwa na Hukumar Ƙwallon Ƙafa FIFA ya sanar matakin da ta ɗauka a kan tawagar ƙwallon Afirka ta Kudu, inda ta rage mata maki, sannan ta ci ta tarar kuɗi.

   Kwamitin ya gano ƙasar ta yi laifi ne wajen amfani da ɗanwasan da bai kamata ya buga wasan ba, wanda tawagar da fafata da ƙasar Lesotho wato Teboho Mokoena da aka buga a ranar 21 ga watan Maris na shekarar 2025.

   FIFA ta ce amfani da ɗanwasan ya saɓa da sashe na 19 da kundin laifuka na hukumar, sannan ya kuma saɓa da sashe na 14 na kundin shirye-shiryen farko-farko na gasar cin kofin duniya na shekarar 2026.

   FIFA ta ce bayan nazarin binciken da aka gudanar, ta ƙwace nasarar da Afirka ta Kudu ta samu, sannan ta ba ƙasar Lesotho nasara a wasan.

   Haka kuma hukumar ta ci Afirka ta Kudu tarar CHF 10,000, sannan shi ma ɗanwasan, Teboho Mokoena ya samu takardar gargaɗi.

   Waɗanda aka ladabtar saboda laifukan dai suna da kwana 10 domin ɗaukaka ƙara a gaban kwamitin ɗaukaka ƙara na kwamitin ladabtarwa na Hukumar FIFA.

   A yanzu da aka rage wa Afirka ta Kudu maki uku, me hakan ke nufi ga tawagar Najeriya?

8. 29 Satumba 2025MSF ta dakatar da ayyukanta a sassan Mozambique kan matsalar tsaro

   

   Asalin hoton, Getty Images

   Kungiyar agaji ta MSF, ta dakatar da ayyukanta a Mocimbowa de Praya da ke arewacin kasar Mozambique, saboda karuwar matsalar tsaro.

   MSF ta ce tashin hankalin ya hana ta damar gudanar da muhimman ayyuka kamar na gaggawa, da kula da haihuwa a wasu sassan lardin Cabul- Delgado, inda dubban mutane ke dogaro da tallafinta.

   Sojojin Mozambique sun tura karin dakarun soji, bayan jerin hare-haren ‘yan bindiga masu ikirarin jihadi sun tilasta wa mazauna yankin barin gidajensu da gonakinsu.

   Tashe-tashen hankula na daɗa kamari tun bayan janyewar dakarun ƙawancen ƙasashen yankin a bara.

9. 29 Satumba 2025Donald Trump zai gana da Netanyahu kan sabon daftarin yarjejeniyar Gaza

   

   Asalin hoton, Getty Images

   Shugaba Trump na Amurka zai gana da Firaministan Isra’ila, Benjamin Netanyahu, a ranar Litinin a birnin Washington da misalin karfe hudu na yamma agogon birnin.

   Wannan na zuwa ne a daidai lokacin da aka fara samun ƙarin bayani kan sabon daftarin da yake yuƙurin gabatarwa domin kawo karshen yaƙin Gaza.

   Mista Netanyahu ya ce daftarin bai kammala ba tukuna, duk da cewa Shugaba Trump ya ce shugabannin ƙasashen Larabawa sun riga sun amince da shi.

   Wakiliyar BBC ta ce shirin bai tanadi tursasawa Falasɗinawa barin Gaza ba, amma ya buƙaci a gaggauta sakin fursunonin Isra’ila ta hanyar musaya da na Falasɗinu.

   A ranar Juma’a da ta gabata ne, Mr Netanyahu ya shaida wa zauren babban taron Majalisar Dinkin Duniya cewa, Isra’ila za ta ci gaba da yaƙar Hamas.

10. 29 Satumba 2025Maldova na samun nasara a ƙoƙarinta na shiga Tarayyar Turai - Maya

    

    Asalin hoton, Getty Images

    Shugabar Moldova, Maya Sandu, ta ce nasarar da jam’iyyarta mai goyon bayan shiga Tarayyar Turai ta samu a zaben majalisar dokokin ƙasar, na nuna cewa ‘yan ƙasar sun san yadda za su haɗa kansu idan makomar ƙasar ta shiga cikin haɗari.

    Ms Sandu ta bayyana wannan nasara a matsayin babban cigaba ga burin Moldova na shiga Tarayyar Turai.

    Shugabannin Turai sun taya ƙasar murnar sakamakon, suna masu cewa hakan hujja ce ta jajircewar Moldova ga dimokradiyya.

    Shugaban Ukrain Volodmire Zalensky ya ce dole su daƙile ƙarfin Ikon Rasha wajen hana ƴaduwa zuwa yankin Turai, kuma dole ne mu hada kai tare da taimawaka Moldova.

11. 29 Satumba 2025An tura sojoji don ƙashe wutar daji a Namibiya

    

    Asalin hoton, Getty Images

    Gwamnatin ƙasar Namibia ta tura sojoji 500 domin taimakawa wajen yaƙi da gobarar da ta ƙona kashi ɗaya bisa uku na babban Gandun Daji na Etosha, daya daga cikin manyan wuraren ajiyar dabbobi a Afirka, in ji jami’ai.

    Wannan gandun daji da ke arewacin ƙasar, wadda mafi yawan ta hamada ce, na ɗauke da nau’ikan dabbobi 114 kuma yana ɗaya daga cikin manyan wuraren yawon buɗe ido.

    Gobarar ta fara ne a ranar 22 ga Satumba kuma ta yaɗu cikin sauri saboda iska mai karfi da kuma busassun ciyayi.

    Lamarin ya haifar da babbar illa ga muhalli, in ji ma’aikatar muhalli da fadar shugaban kasar.

12. 29 Satumba 2025'Sojojin Myanmar sun mayar da ƙauyukan Musulmin Rohingya sansaninsu'

    

    Asalin hoton, Getty Images

    Wani bincike da ya samu goyon bayan Majalisar Ɗinkin Duniya ya ce an samu ƙwararan hujjoji da ke nuna cewa sojojin ƙasar Myanmar sun maida kauyukan musulmi yan kabilar Rohingya da gidajensu da suka lalata a jihar Rakhine wuraren gudanar da ayukan soji

    Musulmi ƴan ƙabilar Rohinja waɗanda ba su da rinjaye fiye da miliyan ɗaya ne suka tsere daga harin da aka kai a shekarar 2017 kuma har yanzu suna zaune a sansanoni masu fama da cunkuso a makwabciya Bangladesh.Rahoton ya ce an gina sansanin soji a wuraren da suka rage a kauyukan jihar Rakhine,bayan abin da Majalisar Dinkin Duniya ta bayyana matakin daki-daki kan share wata kabila daga ban kasa.

    An gina sabbin hanyoyi da gine-gine an kuma yi filin tashi da saukar jirgi mai sauka ungulu a inda aka rusa gidaje,da rusa wuraren tarihi.

    Rahoton ya kuma ce ya tattara bayanai daga shaidu, da hotunan tauraron dan adam, da bidiyo da kuma bayanan da jami'ai suka bayyana.

    Kawo yanzu gwamnatin sojin Myanmar ba ta maida martani kan wannan rahoton ba.

13. 29 Satumba 2025Me ya sa ake zargin cewa ana yin kisan-ƙare dangi a Najeriya?

    

    Asalin hoton, Fadar shugaban Najeriya

    Gwamnatin Najeriya ta yi kakkausan Allah wadai da nesanta kanta da wasu rahotonnin da ke cewa ƴanbindiga na aikata kisan ƙare-dangi a ƙasar.

    Wasu kafofin yaɗa labaran intanet na ƙasashen waje da fitattun masu amfani da shafukan sada zumunta ne suka yi ta yaɗa zargin cewa ƴanbinga a ƙasar na yin wani tsari da suke aikata kisan ƙare-dangi kan mabiya addinin Kirista a ƙasar.

    Cikin wata sanarwa da gwamnatin ta fitar, ma'aikatar yaɗa labaran ƙasar, ta ce, zarge-zargen ba su da tushe balle makama, kuma an ƙirƙire su ne domin raba kan al'ummar ƙasar.

    Karanta cikakken labarin - https://bbc.com.im/hausa/articles/cwyrv8d3j51o%3C/a%3E%3C/p%3E%3C/div%3E%3C/div%3E%3C/article%3E%3C/li%3E%3Cli class="css-xxlek1">

    29 Satumba 2025'Dole ɗaliban Najeriya su gabatar da aikin binciken kammala jami'a kafin yin NYSC'

    

    Asalin hoton, Getty Images

    Shugaban Najeriya Bola Tinubu ya amince da sabon tsari da ya danganci rajistar masu bautar ƙasa (NYSC) da manufofin hukumar da ke tattara bayanai kan ilimi wato NERD.

    A bisa wannan doka, babu wani ɗalibi da ya kammala jami’a a Najeriya ko a ƙasashen waje da za a yi wa rajistar ɓautar ƙasa ba tare da miƙa aikin bincikensu na kammala jami'a da sauran takardun bincike ba a matsayin wani ɓangare na ƙoƙarin gwamnati wajen daƙile amfani da takardun bogi da kuma kare martabar ayyukan ƴan Najeriya.

    Wannan ne tsarin NERD kuma ta ce zai fara aiki daga ranar 6 ga watan Oktoba.

    Ministan Ilimi, Dr. Tunji Alausa, ya bayyana tun a watan Maris 2025 cewa wajibi ne dalibai su miƙa ayyukan bincikensu na kammala jami’a domin tabbatar da inganci da sahihancin ilimi a ƙasar.

    Mai magana da yawun NERD, Haula Galadima, ta ce kowanne aiki zai ƙunshi cikakken sunan ɗalibi da na malamin da ya kula da aikin da shugaban sashen karatu da sunan makaranta.

    Ta ce hakan zai ƙarfafa malamai su kula sosai da dalibai, domin sunayensu za su bayyana a wani dandalin dijital na duniya.

14. 29 Satumba 2025Ma'aikatan PENGASSAN sun rufe wasu manyan ma'aikatun mai na gwamnati

    

    Asalin hoton, Dangote Refinery/Pengassan

    Ma’aikatan PENGASSAN sun taru a wasu manyan ma’aikatun mai a faɗin Najeriya, ciki har da NNPC, yayin da rikicin ƙungiyar da Matatar Dangote ke ci gaba.

    Wannan lamari na zuwa ne bayan sallamar ma’aikata sama da 800 da matatar Dangote ta yi saboda shiga ƙungiyar PENGASSAN, a sakamakon haka, ƙungiyar ta sanar da cewa za ta soma yajin aiki a faɗin ƙasar daga yau, matakin da ake ganin zai iya kawo tsaiko ga samar da mai a ƙasar.

    An ga ma’aikatan suna rufe ofisoshin hukumar kula da harkokin sarrafawa da tacewa da sufurin man fetur a Najeriya (NMDPRA) da hukumar makamashi ta Najeriya (ECN), da kuma hukumar kula da haƙo man fetur ta NUPRC.

    Hakan na nuna yadda rikicin ya fara shafar sauran sassan masana’antar mai a kasar.

    Wannan yajin aiki da aka fara a yau na zuwa ne a daidai lokacin da gwamnatin tarayya ke ƙoƙarin shiga tsakani domin daƙile rikicin, wanda zai iya jawo hasarar kuɗaɗen shiga ga ƙasa da kuma wahala ga ‘yan Najeriya.

    A halin yanzu, masana’antu da hukumomin mai na fuskantar matsin lamba saboda rufe wuraren aiki, yayin da jama’a ke bayyana damuwa kan yiwuwar tasirin wannan rikici ga farashin mai da samun man fetur a ƙasar.

15. 29 Satumba 2025Mahara suka kashe ƴan bijilanti 10 a Kwara

    

    Asalin hoton, Getty Images

    Ƴan bindiga sun kai hari a wani gari da ake kira Oke-Ode, a ƙaramar hukumar Ifelodun ta jihar Kwara, a safiyar Lahadi, inda suka kashe ƴa bijilanti10 yayin da wasu suka ji rauni mai tsanani.

    Wani shaida da bai bayyana sunansa ba ya bayyana cewa yan bindigan sun buɗe wuta ne a garin lamarin da ya yi sanadiyyar mutuwar mutane. Ya ce, “‘Yan bijilatin da aka kashe sun yi ƙoƙarin yaƙar yan bindigan ne, amma suka fi ƙarfinsu”

    Haka kuma an ruwaito cewa ƴan bidigan sun yi awon gaba da wasu mutum biyar.

    Wani memba na ƴan bijilanti ɗin mai suna Ajetunmobi ya bayyana cewa tun daren Asabar suka ji labarin yan bindigan a unguwarsu.

    Wani jami’in ‘yan sanda a garin ya ce an fara ɗaukar gawarwakin waɗanda aka kashe, yayin da waɗanda suka ji rauni an kai su asibitin tarayya na Saare.

    Gwamnan jihar Kwara, Abdulrahman Abdulrazaq, yayin nuna ta’aziyya, ya yi kira ga al’umma da su guji daukar fansa da tashin hankali a tsakaninsu.

16. 29 Satumba 2025Amurka na son Hamas ta miƙa wuya domin a tsagaita wuta a Gaza

    

    Asalin hoton, Getty Images

    Ana ci gaba da samun cikakkun bayanai kan kan wani sabon shirin tsagaita wuta a Gaza da Amurka ke jagoranta. Kafafen watsa labaran Amurka da na kasashen larabawa na cewa akwai alamun kwarin guiwa daga kowanne bangare kan sabon daftarin.

    BBC ta fahimci cewa daftarin zai fi yi wa Isra'ila dadi kan Hamas, domin yana neman Hamas ta mika wuya sannan ta saki dukkan fursunonin da take rike da su cikin kwana biyu kafin kai wa ga duk wani mataki da aka tsara.

    Ragowar matakan sun hada da aniyar karfafawa al'ummar Gaza guiwar ci gaba da zama a zirin, da kuma fara shirin mika yankin ga hukumar kula da yankunan Falasdinawa ta PA, da kuma yin ahuwa ga mayakan Hamas, bisa sharadin za su tattara yanasu ya nasu su fice daga yankin har abada.

    Firaiministan Isra'ila Benjamin Netanyahu, wanda zai gana da Mista Trump nan gaba a yau ya ce har yanzu ba a daddabe batun ba tukuna.

    Wani kakakin Hamas ya kira yarjejeniyar a matsayin wani kokari na janye hankalin duniya daga kisan kiyashin da Isra'ila ke aiwatarwa a Gaza.

    Abubuwan da yarjejeniyar ta ƙunsa:

    Kafar yaɗa labarai ta Axios da ke Amurka ta ce abubuwa 21 ne ke ƙunshe a cikin yarjejeniyar, wasu daga cikinsu su ne:

    • Sakin duk sauran Isra'ilawa da Hamas ke riƙe da su cikin sa'o'i 48 bayan tsagaita wuta.
    • Tsagaita wuta na dindindin da janyewar sojojin Isra’ila daga dukkan yankin Gaza.
    • Sakin kusan fursunoni Falasɗinawa 250 da ake yiwa hukuncin rai da rai, da sauran fursunoni 2,000 tun daga 7 ga Oktoba.
    • Kafa gwamnatin riƙon ƙwarya wanda babu yayan ƙungiyar Hamas a cikinta, wanda zai ƙunshi majalisar ƙasa da ƙasa da Larabawa tare da wakilin Hukumar Falasɗinu, da gwamnatin ƙwararru ta gida.
    • Kafa rundunar tsaro ta haɗin gwiwa wacce ta haɗa Falasɗinu da sojojin ƙasashen Larabawa da Musulmi.
    • Tallafin Larabawa don sabon tsarin mulki da sake gina Gaza.
    • Rushe ƙungiyar Hamas da duk wasu hanyoyin ƙarƙashin ƙasa manyan makama.
    • Yafewa mambobin ƙungiyar da suka daina haddasa tashin hankali.
    • Isra'ila ta yi alƙawarin ba za ta mamaye gaɓar Yamma da Kogin Jordan ko wani ɓangare na Gaza ba, da kuma alkawarin buɗe hanya mai ma’ana don kafa ƙasar Falasɗinu bayan gyara Hukumar Falasɗinu.
    • Is'raila ta yi alƙawarin ba za ta sake kai hari kan Qatar a nan gaba ba.

17. 29 Satumba 2025Gwamnatin Najeriya ta shiga tsakani a rikici Dangote da PENGASSAN

    

    Asalin hoton, Getty Images, @nnpclimited/X

    Gwamnatin Tarayya ta gayyaci hukumomin matatar mai ta Dangote da ƙungiyar ma'aikatan man fetur da iskar gas ta PENGASSAN domin zama a teburin sulhu da nufin dakatar da yajin aikin da ƙungiyar ta fara.

    Ministan kuɗin ƙasar, Wale Edun ne zai jagoranci taron, wanda zai samu halartar ministan ƙwadago da ayyuka na ƙasar, Muhammad Dingyadi.

    Matatar Dangote, wadda ke kan gaba a sarrafa ɗanyen mai a Najeriya, na fuskantar rashin jituwa da ƙungiyoyin ma’aikatar ɓangaren mai na ƙasar.

    Ƙungiyar PENGASSAN ta nuna rashin amincewa da matakin Dangote na sallamar ma’aikata fiye da 800 daga cikin membobinta da suka shiga PENGASSAN.

    PENGASSAN, wadda ke wakiltar manya da ƙananan ma’aikata a ɓangaren mai, ta umurci mambobinta da su rufe dukkan bututun isar da mai zuwa Matatar Dangote kuma su dakatar da lodin jiragen da za su kai mai masana’antar.

    Ƙungiyar ta zargi Dangote da maye gurbin ma’aikatan da aka sallama da ‘yan Indiya.

    A martanin da ta mayar, Matatar Dangote ya bayyana matakin PENGASSAN a matsayin “abin mamaki da rashin bin doka”, yana mai cewa babu doka da ta bai wa ƙungiyar damar katse isar da gas da danyen mai.

18. 29 Satumba 2025Ana taron nema wa Arewacin Najeriya 'mafita' a Abuja

    

    Asalin hoton, Getty Images

    Ƙungiyar Dattawan Arewa (NEF) ta fara gudanar da wani taron kwanaki biyu a Abuja domin neman mafita ga matsalar talauci da kuma ci gaban tattalin arziƙin yankin arewa.

    Taron zai kuma kasance dandalin bajakolin ma’adanan asa da ke jibge a yankin, da nufin jan hankalin masu zuba jari.

    Mai magana da yawun ƙungiyar, Farfesa Abubakar Jiddare, ya bayyana wa BBC cewa manufar taron ita ce "kawo haske kan damarmaki da albarkatun da ake da su a arewa".

    Ya ce, “Kowa ya sani yadda tattalin arziƙin arewa ya koma baya", inda ya ce yankin na fama da ɗimbin matasa marasa aikin yi.

    Farfesa Jiddare ya ce taron zai ba da dama ga masu zuba jari su ga ainihin damarmaki.

    A cewarsa, “Mun tsara namu taron ta yadda idan ka zo, za ka san inda ma’adinai suke, a wace jiha suke, da yadda za a iya zuba jari, da kafa masana’antu da kuma sarrafa su.”

    Ya ƙara da cewa an gayyaci gwamnonin arewa 14 da kuma na babban birnin tarayya Abuja, domin su kasance cikin taron da shirin.

    Taron, a cewar ƙungiyar, zai kasance wata hanya ta mayar da hankali kan abin da arewa take da shi, domin fitar da yankin daga kangin talauci da rashin cigaba.

19. 29 Satumba 2025Mummunan tasirin da rikicin matatar Dangote da PENGASSAN zai yi a Najeriya

    

    Asalin hoton, Dangote Refinary

    Rikici ya rincabe tsakanin matatar man fetur ta Dangote da ƙungiyar manyan ma'aikatan kamfanonin iskar gas da fetur, inda lamarin ke ƙara daukar sabon salon da tasirinsa zai iya shafar gwamnati da dukkan 'yan Najeriya kai-tsaye.

    Ƙungiyar Petroleum and Natural Gas Senior Staff Association of Nigeria (PENGASSAN) ta sanar da fara yajin aiki na sai baba ta gani saboda matakin matatar Dangote na korar wasu ma'aikatanta kusan kimanin 800.

    A cewar sakataren ƙungiyar, Lumumba Okugbawa, yajin aikin ya ƙunshi katse duk wata hanya da matatar ke samun ɗanyen mai da kuma iskar gas domin tacewa.

    A nata bangaren, matatar Dangote cikin wani bayani da ta fitar a ranar Lahadi ta bayyana matakin a matsayin “matakin rashin aikinda doka da kuma zagon-kasa ga Najeriya da al’ummarta.”

    Matatar ta bukaci al’umma da gwamnatin Najeriya su bijire wa umarnin PENGASSAN

    Karanta cikakken labarin - https://bbc.com.im/hausa/articles/c4gz5x5p0y8o%3C/a%3E%3C/p%3E%3C/div%3E%3C/div%3E%3C/article%3E%3C/li%3E%3C/ol%3E%3C/div%3E%3Cdiv class="css-1s4wzbg">