Man City za ta fara Premier League da Chelsea a 2024/25

Manchester City za ta fara da ziyartar Chelsea a wasan makon farko a Premier League kakar 2024/25.

Ita kuwa Ipswich Town daya daga cikin sabbi ukun da za su buga babbar gasar tamaula ta Ingila a bana, za ta fara da karbar bakuncin Liverpool.

Wannan shi ne karon farko da Ipswich za ta kara a Premier League tun bayan shekara 22, wadda za ta yi wasan farko ranar 17 ga watan Agustan 2024.

To sai dai za a fara da bude labulen gasar da wasa tsakanin Manchester United da Fulham a Old Trafford ranar Juma'a 16 ga watan Agusta.

Arsenal, wadda ta yi ta biyu a gasar da aka kammala za ta karbi bakuncin Wolverhampton a Emirates ranar Asabar, yayin da Aston Villa za ta je West Ham.

Southampton wadda ta koma buga Premier League, bayan kaka daya a Championship za ta fafata da Newcastle a St James' Park.

Everton za ta karbi bakuncin Brighton da fafatawa tsakanin Nottingham Forest da Bournemouth a gumurzun ranar Asabar.

Wasannin da za a buga ranar Lahadi a makon farko sun hada da na Brentford da Crystal Palace da wadda ta lashe kofin Championship, Leicester City da za ta karbi bakuncin Tottenham ranar Litinin 19 ga watan Agusta.

Wasan karshe da Ipswich ta kara a Premier League shi ne 5-0 da Liverpool ta doke ta a Anfield ranar rufe kakar 2001/02.

Cikin watan Mayun bana ne City ta lashe Premier League na hudu a jere, bayan da ta kammala kakar da ta wuce da tazarar maki biyu tsakani da Arsenal.

Wasannin Premier League makon farko

Ranar Juma'a 16 ga watan Agusta

Ranar Asabar 17 ga watan Agusta

Ranar Lahadi 18 ga watan Agusta

Ranar Litinin 19 ga watan Agusta

Wasu mahimman batuwan da suka shafi Premier League 2024/25

Manchester City za ta buga wasa biyu daga bakwai kafin Champions League, wadda za ta yi uku a Etihad da Aston Villa da Arsenal da kuma Liverpool.

Wasa mai nisa da za a buga shi ne mil 200 ranar 26 ga watan Disamba da Arsenal za ta ziyarci Newcastle United a St James Par.

Makon karshe da za a fafata don lashe FA Cup, shi ne Asabar 17 ga watan Mayu, ranar ba za a kara a Premier League ba.

A mako na uku a kakar da za a fara Aston Villa za ta je gidan Tottenham, yayin da Liverpool za ta karbi bakuncin Chelsea a Anfield.

A wasan mako na hudu kuwa Manchester City za ta je gidan Tottenham daga nan ta kece raini da Liverpool.

Manchester United za ta karbi bakuncin Liverpool ikafin hutun kalandar Fifa a Satumba, Arsenal ta ziyarci Tottenham ana kammala hutun.

Everton za ta buga wasan karshe a Goodison Park - daga nan ta koma Bramley-Moore Dock - za ta fara karawa da Southampton ranar Lahadi 18 ga watan Mayu a makon da za a buga wasan karshe a FA Cup.

Yaushe za a fara wasannin Premier League 2024/25?

Za a fara Premier League kakar 2024-25 ranar Juma'a 16 ga watan Agusta a karkare ranar Lahadi 25 ga watan Mayun 2025 da yin wasa 10 rana daya a lokaci tare.

Za a yi mako 33 da yin karawa a tsakiyar mako karo hudu da daya a lokacin Kirsimeti, wato ranar 26 ga watan Disamba.

Za a yi hutun Fifa da ta kan bayar cikin watan Satumba da Nuwamba da kuma watan Maris, yayin da za a buga wasan zagaye na uku a FA Cup a makon nin Janairu.

Domin samun buga karawar tsakiyar makon Agusta, babu hutu a lokacin hunturu, yayin da ba za a maimaita wasa ba kwana daya kafin Kirsimeti da aka yi tsakanin Wolves da Chelsea ba a kakar da ta wuce, karon farko tun 1995.

An sanar da kungiyoyin da za su buga Premier League cewar ba wadda za ta buga wasa biyu a jere kasa da awa 60 a tsakanin Kirsimerti da sabuwar shekara.

Ukun da suka samu shiga Premier League da wadanda suka yi ban kwana

Kungiyoyin ukun da suka hauro zuwa Premier League, sun hada da Leicester City, wadda ta lashe Championship da kuma Ipswich ta biyu.

Ta ukun ita ce Southampton, wadda ta yi nasara a kan Leeds United a karawar cike gurbi.

Wadanda suka yi ban kwana da wasannin da aka kammala sun hada da Luton Town da Burnley da kuma Sheffield United.