Abin da ya kamata ku sani kan wasan Man United da Newcastle

Manchester United da Newcastle United za su kara a wasan karshe a Carabao Cup ranar Lahadi a Wembley.

Newcastle da United sun tashi 0-0 ranar 16 ga watan Oktoban 2022 a wasan farko a Premier League a Old Trafford a bana.

United ta kawo wannan matakin, bayan da ta doke Nottingham Forest 5-0 gida da waje a wasan daf da karshe, ita kuwa Newcastle cin Southampton 3-1 ta yi.

Wannan shi ne karon farko da kowacce kungiya ke fatan daga kofi a bana, karon farko da Newcastle ta kai karawar karshe bayan 1999.

Rabon da United ta dauki kofi tun kakar 2016/17 lokacin da ta lashe League Cup da Europa League karkashin Jose Mourinho.

Sai dai kungiyar Old Trafford ita ce kadai a Ingila da ke takarar lashe kofi hudu a kakar nan, bayan Carabao Cup da ta kai wasan karshe tana buga FA Cup.

Haka kuma tana ta uku a teburin Premier League, sannan ta kai zagayen 'yan 16 a Europa League, wadda za ta fafata da Real Betis gida da waje nan gaba.

Ranar Alhamis United ta yi waje da Barcelona da ci 2-1 a Old Trafford a karawar cike gurbin 'yan 16 a Europa League, wadda ta kai zagayen gaba 4-3 gida da waje.

Newcastle United ta yi rashin nasara a wasan karshe a hannun Manchester United a 1999 a FA Cup a Wembley.

Kofi na karshe da Newcastle ta dauka shine a 1969, wadda ta lashe Inter-Cities Fairs Cup, kusan shekara 54 da ta wuce kenan.

Newcastle tana ta biyar a teburin Premier da tazarar maki daya tsakaninta da Tottenham ta hudu, wadda za ta karbi bakuncin Chelsea ranar Lahadi a Premier.

Sai dai kungiyar ta Eddie Howe za ta yi wasan karshen ba tare da mai tsaron raga ba, Nick Pope, wanda aka yi wa jan kati a karawa da Liverpool.

To sai dai Bruno Guimaraes ya kammala hutun dakatar da shi da aka yi.

Newcastle za ta yi amfani da Loris Karius a raga, bayan da ta bayar da aron Karl Darlow.