AC Milan ta kammala ɗaukar aron Felix daga Chelsea

Ɗan ƙwallon Chelsea, Joao Felix ya kammala komawa AC Milan, kan yarjejeniyar zuwa karshen kakar bana.

Ƙungiyar ta Italiya ta biya £5m kuɗin ɗaukar aron Felix, amma ba tare da kulla yarjejeniyar sayar da ɗan wasan ba mai shekara 25.

Koda yake ranar Talata aka kammala ƙulla yarjejeniya, amma tun a ranar Litinin aka cike takardu tsakanin Milan da Chelsea, kafin wa'adin rufe kasuwar ciniki ya cika.

Mai shekara 25 ɗan wasan tawagar Portugal ya buga karawa uku a Premier League a bana, amma yana yin wasanni sosai a sauran gasar kofunan Ingila.

Ya zura ƙwallo bakwai a 2024/25 - ɗaya a wasa da Wolves da biyu a karawa da Panathinaikos da Noah da kuma biyu a FA Cup a wasa da Morecambe.

Felix ya fara tamaula a Benfica daga nan ya koma Atletico Madrid a Yulin 2019 kan £113m a mataki na biyar a tsada a tarihin ƙungiyar.

Ya buga wasannin aro a Chelsea da Barcelona daga baya ƙungiyar Stamford Bridge ta saye shi kan £45m a cikin watan Agusta.

Chelsea tana ta shida a teburin Premier League, amma za ta iya komawa ta huɗu idan ta doke West Ham ranar Litinin a wasan mako na 24 da za su kara.

Milan, wadda take ta takwas a teburin Serie A, za ta kara da Roma a zagayen kwata fainals a Coppa Italia ranar Laraba.

Haka kuma Milan za ta fafata da Feyenoord gida da waje a wasan cike gurbi a Champions League a cikin watan Fabrairu.