Messi ya ci wa Argentina kwallo sama da 100
Asalin hoton, Getty Images
Kyaftin Lionel Messi ya ci wa Argentina kwallo sama da 100, bayan da Argentina ta doke Curacao 7-0.
Mai shekara 35 shine ya fara zura kwallo a raga a minti na 20 da fara wasan, kuma na 100 da ya ci Argentina kenan a karawar da suka yi Santiago del Estero.
Messi ya kara cin biyu tun kafin hutu, kenan kwallo uku rigis ya zura a raga, karo na bakwai da ya yi wannan bajintar a Argentina.
Dan wasan Chelsea, Enzo Fernandez shima ya zura kwallo a wasan da Argentina ta gabatar da kofin duniya da ta lashe a gaban 'yan kallo sama da 42,000
Wannan shine wasa na biyu da Argentina ta buga tun bayan da ta lashe kofin duniya a Qatar a 2022, bayan doke Faransa a bugun fenariti.
A makon jiya Messi ya ci kwallo na 800 a sana'arsa ta murza leda - ya kuma zura na 99 a Argentina a karawar da ta ci Panama 2-0 a Buenos Aires a wasan sada zumunta.
Asalin hoton, Getty Images
Mai taka leda a Paris St-Germain ya ci wa Argentina na 100, bayan da ya samu kwallo daga dan wasan Villarreal, mai taka leda aro a Tottenham, Giovani lo Celso.
Minti uku tsakani Nicolas Gonzalez ya ci kwallo, sannan ya bai wa Messi ya zura a raga na uku a karawar.
Fernandez ne ya zura na hudu, sannan Lo Celso ya kara bai wa Messi shi kuma ya ci na biyar a minti na 37, sannan na uku rigis da ya ci.
Angel di Maria da Gonzalo Montiel ne suka zura sauran biyu a raga, an kuma taya Messi ci gaba da kafa tarihin yawan cin kwallaye a tawagar Argentina.
Gabriel Batistuta shine na biyu mai kwallo 56 a Argentina, Messi yana da 102 kenan.
Kyfatin din Argentina shine na uku a yawan ci wa tawaga kwallaye a duniya, bayan dan wasan Portugal, Cristiano Ronaldo mai 122 da na Iran Ali Daei mai 109.
