Arteta ya tsawaita kwantiraginsa da Arsenal

Kocin Arsenal Mikel Arteta ya amince da sabon kwantiragin shekara uku da ƙungiyar ta arewacin Landan.

Kwantiragin ɗan ƙasar Sifaniyan dai na shirin ƙarewa ne a ƙarshen kakar wasa ta bana amma yanzu ana sa ran zai ci gaba da zama har zuwa shekarar 2027.

Gunners ta naɗa Arteta, wanda ya kasance koci a ƙarƙashin Pep Guardiola a Manchester City a lokacin, don maye gurbin Unai Emery a matsayin koci a watan Disamban 2019.

Ya jagoranci Arsenal ta samu nasara a wasan ƙarshe na cin kofin FA a ƙarshen kakar wasa ta 2019-2020 inda ya lashe kofinsa na farko a matsayin koci.

Ana sa ran za a tabbatar da sabuwar yarjejeniyar Arteta kafin wasan hamayyar arewacin London da za a yi ranar Lahadi mai zuwa a filin wasan Tottenham.

Bayan wasanni uku a bana Arsenal ce ta huɗu a teburin gasar Premier, inda ta yi nasara a wasanni biyun farko da Wolves da Aston Villa kafin ta yi kunnen doki da Brighton.

Tsohon ɗan wasan tsakiya, Arteta ya buga wa Gunners wasanni 150 a lokacin da yake buga wasa har ya kai ga ya zama kyaftin ɗin ƙungiyar.