Yaya Birtaniya ke zaman makokin sarakunanta?

Kamar duk wani abu da ya shafi iyalan masarautar Burtaniya, mutuwar basarakiyar ma ya kunshi wasu abubuwan al'adu da kuma taruka da za a yi.

Bayan mutuwar sarauniya Elizebeth ta biyu a ranar 8 ga watan Satumba, an ayyana iya lokacin da za a yi zaman makoki in da za a shafe kwanaki bakwai bayan jana'izarta.

Ga tarihin yadda ake gabatar da wasu al'adu na jimamin mutuwar sarauniyar wadda ta fi kowa dadewa a tarihin masarautar Burtaniya, wadansu daga cikin al'adun sun shahara a duniya.

Ana yin ƙasa-ƙasa da tutoci

Hanya ta farko da ake fara nuna ana zaman makokin a hukumance ita ce yin ƙasa-ƙasa da tutoci a duk wasu gine-ginen gwamnati da kuma gidajen sarauta a fadin Burtaniya.

Yayin da ake amfani da kalmar cewa an rage tsawon tuta da rabi, ainihin abin da ake yi shi ne ana dan sassauta ne a jikin karfen da ke rike da ita.

Hakan dadadiyar al'ada ce da aka yi tun karni na 17 na tsawon tuta.

An fara yin wannan al'ada ce a matsayin nuna girmamawa da jimami na mutuwar wani babban jami'i a jirgin ruwa.

Sauran ma'aikatan jirgin sai suka yi kasa kasa da tutar da ke jikin jirgin don nuna alhininsu a kan mutuwar jami'in na su.

Duk da cewa wancan matakin bai shafi amfani da mayafin alamar Royal Standard na masarautar Burtaniya, kadawar tuta na alamta tabbatuwar 'yanci.

Za a yi ƙasa da ƙasa da sauran tutocin da ke Burtaniya har zuwa karfe 8 na safiyar wayewar garin da aka yi jana'izar sarauniya in ban da ranar 10 ga watan Satumba da majalisar masu nadin sarki ta ayyana Charles a matsayin sabon sarki.

A wannan rana an daga tutoci sama a kasar na tsawon sa'oi, kafin daga bisani a sake yin kasa kasa da su.

Harba bindiga

Wata al'ada da ake yi a yayin zaman makokin gidan sarautar Burtaniya ita ce harba bindigar ban girma.

A cewar masana tarihin rundunar sojin Burtaniya, an fara wannan al'ada ce a karni na 15 a lokacin da jiragen ruwa na yaki suka riƙa kai bindigogi gabar tekun kasashen waje abin da ke nuna cewa suna zuwa ne da kyakkyawar niyya domin babu komai a cikin makaman nasu.

A 1730, sai sojojin ruwan masarauta suka fara amfani da harba bindiga don murna ko jimamin wani muhimmin abu, ko da yake bai zamo wajibi ba ga iyalan masarautar kasar d ama sauran shugabannin kasa har sai zuwa 1808.

Akwai dokoki a kan adadin harbi nawa za a yi, domin ya danganta ne daga in da za a harba ta da kuma dalilin da ya sa za a harba ta.

A 1827, aka bayar da umarnin cewa harba bindiga sau 41 ya yi dai dai da nuna ban girma ga masu sarauta.

To amma a wasu lokuta ko kuma a wasu wuraren an kara yawan adadin harbin da za ayi zuwa 62.

An harba bindiga don nuna jimamin mutuwar mutuwar sarauniya Elizebeth da kuma lokacin da aka ayyana sarki Charles a matsayin wanda ya gaji sarauniya.

A washe garin rasuwar sarauniya wato ranar 9 ga watan Satumba, an harba bindigar ban girma sau 96 a wajen shakatawa na Hyde, in da duk harbi guda a matsayin shekararta guda.

Kaɗa ƙararrawa

Ana amfani da wata takaitacciyar sanarwa da ake rubutawa a takarda a jikin wani dan karamanin allo don sanar da abubuwan da suka shafi ranakun haihuwa da kuma mutuwa a fadar ta Buckingham.

Ana makale allon ne a jikin karafan da ke kofar shiga fadar.

An sanar da mutuwar George na VI a 1952 da kuma George na V a 1936, ta wannan hanya.