Mane ba zai buga wa Senegal gasar Kofin Duniya ba

Ɗan wasan gaba na tawagar ƙwallon ƙafa ta Senegal Sadio Mane ba zai buga mata gasar Kofin Duniya ba a Qatar sakamakon raunin da ya ji a gwiwarsa.

A ranar Talata ne hukumar ƙwallon Senegal ta bayyana cewa Mane mai shekara 30 ba zai buga wasannin farko na gasar ba bayan ta saka sunansa a jerin 'yan wasanta duk da raunin da ya ji.

Sai dai hoton gwiwar da aka ɗauka a ranar Alhamis ya nuna cewa akwai buƙatar a yi wa tauraron ɗan wasan tiyata.

Mane ya fita daga wasan da ƙungiyarsa ta Bayern Munich ke fafatwa da Werder Bremen a ranar 8 ga watan Nuwamba sakamakon raunin.

Senegal za ta fara karawa da Netherlands a ranar Litinin a Rukunin A kafin daga bisani ta gwabza da masu masaukin baƙi Qatar ranar 25 ga wata da kuma Ecuador a ranar 29.