Manchester United ta hakura da Anthony Martial

Manchester United ta tabbatar da cewar Anthony Martial zai bar ƙungiyar bayan da ƙwantiraginsa zai kare a bana.

Ƙungiyar Old Trafford ba ta amince ta tsawaita yarjejeniyar ɗan Faransa ba, wanda tun farko aka ce za a iya kara masa kaka daya idan ya taka rawar gani.

Martial, mai shekara 28, ya yi kaka tara a United tun bayan da ya koma Old Trafford da taka leda daga Monaco a 2015 da cin ƙwallo 90 a wasa 317.

A kaka uku da ta gabata Martial ya buga wa United wasa 59, daga baya aka bayar da aronsa a rabin kaka a Sevilla, wanda ya zura ƙwallo 12 a raga a Sifaniya.

Rabonda ya buga cikakken wasa a United tun cikin watan Maris ɗin 2021 a FA Cup zagaye na shida da ta yi nasara a kan Leicester City.

Bai buga wasa ba a bana tun bayan da Bournemouth ta doke United 3-0 a Premier League cikin watan Disamba.

Ɗan wasan ya sha fama da jinya, hakan ya sa baya buga wasa da yawa a United da ta kai ta bayar da shi aro ga ƙungiyar dake buga babbar gasar tamaula ta Sifaniya.

Cikin kwallo 90 da Martial ya ci a United, 63 a Premier League ya zura a raga.

Martial ya lashe FA Cup da Carabao Cup da kuma Europa League.

Sai dai bai buga wasa ko ɗaya ba a gasar FA Cup na bana da United ta lashe ba, bayan da ta doke Manchester City 2-1 a Wembley ranar Asabar.

United, wadda ta yi ta takwas a teburin Premier League za ta buga Europa League kai tsaye a badi, sakamakon daukar FA Cup da ta yi.