Champions League:Man City da Real Madrid sun kai zagayen dab da na kusa da karshe

Manchester City za ta sami ƙwarin gwiwa yayin da ta ke shirin fafatawa da Liverpool a gasar premier league a ƙarshen mako bayan ta yi nasarar tsallakawa zuwa zagayen daf da na kusa da ƙarshe a gasar Zakarun Turai (Champions League) a karo na bakwai a jere.

City ta doke FC Copenhagen da ci 3-1 a wasan da aka buga a filin Etihad.

Bayan ta ci wasan farko a gidan Copenhagen da ci 3-1, City ta jefa ƙwallo biyu a raga a minti tara na farkon wasa ta hannun Manuel Akanji da Julian Alvarez.

Erling Haaland ya ƙara ƙwallo ta uku a ƙarshen rabin lokaci na farko bayan Elyounoussi ya farke wa Copenhagen ƙwallo ɗaya a minti na 29.

A ɗaya wasan zagaye na biyu da aka buga a daren na Laraba, Real Madrid ta sha da ƙyar inda ta yi canjaras da RB Leipzig da ci 1-1, a wasan da aka buga a filin wasan Santiago Bernabeu.

Amma Madrid ta ƙetara sakamakon nasarar da ta yi a wasan farko a gidan Leipzig da ci ɗaya mai ban haushi.

Vinícius Júnior ya fara jefa ƙwallo a raga a minti na 65 kafin Willi Orbán ya farke wa Leipzig a minti na 68.

A halin yanzu ƙungiyoyi hudu ne suka ketara zuwa zagaye na gaba a gasar bana, bayan Bayern Munich da PSG sun yi nasara a wasannin da aka buga a daren ranar Talata da ta gabata.

Za a kammala wasannin zagaye na biyu a mako mai zuwa inda za a tabbatar da ƙungiyoyin da za su kasance a zagayen ƴan takwas na ƙarshe.