Arsenal ta sha kashi a gidan Bournemouth da ci 2-0

Bournemouth ta caskara Arsenal da ci 2-0 a wasan Pemeir League mako na takwas a filin wasa na Vitality, inda Arsenal ta ƙare wasan da 'yan wasa 10 a cikin fili, bayan da alƙalin wasa ya bai wa William Saliba jan kati

An kori ɗan wasan na tawagar Faransa tun kafin a je hutun rabin lokaci.

Sai a wajen minti na 70 ne ɗan wasan Bournemouth, Ryan Christie ya jefa ƙwallo ta farko a ragar Arsenal bayan da aka ɗauko kwana.

Saura minti tara a tashi wasan ne kuma Kluivert ya ƙara ta biyu a bugun fenareti bayan golan Arsenal, David Raya ya yi wa Evanilson ƙeta a yadi na 18.

Da wannan sakamako Arsenal ta yi rashin nasararta ta farko a kakar wasa ta bana, yayin da ita kuma Bournemouth ta kawo ƙarshen rashin nasara huɗu da ta yi a jere, inda ta koma matsayi na 10 a kan teburi da maki 11.

Wannan sakamako babban koma baya ne ga Arsenal wadda ta rasa damar ɗarewa kan tebur kafin Liverpool ta karɓi bauƙuncin Chelase a gobe Lahadi.