Dan wasan Man United Telles na daf da komawa Sevilla

Dan wasan Manchester United dan kasar Brazil, mai tsaron baya, Alex Telles na daf da komawa buga wasannin aro a Sevilla zuwa karshen kakar nan.

Telles bai da makoma a Old Trafford karkashin sabon koci Erik ten Hag a bana, wanda ya dauko Tyrell Malacia, saboda haka dole a bayar da aronsa ko yayi zaman benci.

Bayan da Luke Shaw ke tsare bayan United daga hagu, an yi amfani da Telles a wasannin sada zumunta a gurbin mai tsaron baya daga tsakiya.

To sai dai ba zai samu buga gurbin daga tsakita ba a Premier League ta kakar nan, bayan da United ta dauko Lisandro Martinez daga Ajax.

Zaman Telles a benci zai sa Brazil kenan ta kasa kirsansa buga mata gasar kofin duniya a Qatar a bana, saboda haka buga La Liga zai kara fito da kwazonsa.

Tawagar Brazil ta gayyaci dan kwallon mai shekara 29 a watan Janairu, bayan wata 14 rabon da ta bukace shi ya yi mata tamaula.

Telles ya koma United a 2020 daga FC Porto kan fam miliyan 13.6.