Potter ya fara da nasara a wasan farko a Stamford Bridge a Premier

Chelsea ta doke Wolverhampton 3-0 a gasar Premier League da suka fafata ranar Asabar a Stamford Bridge.

Wadanda suka ci wa Chelsea kwallayen sun hada da Kai Havertz da Christian Pulisic da kuma Armando Broja.

Kenan Havertz ya ci kwallo na 50 a tarihin sana'arsa ta murza leda, mai 36 a Bundesliga da 14 a Premier League.

Wannan shi ne wasan farko da Graham Potter ya ja ragamar Chelsea a Stamford Bridge a Premier League.

Tsohon kociyan Brighton ya maye gurbin Thmosa Thucel, wanda Chelsea ta kora a bana, bayan da ya kasa taka rawar gani.

Kawo yanzu Potter ya ja ragamar wasa hudu da cin uku da canjaras daya, har da cin Milan 3-0 a Champions League.

Wolves ta buga wasan a karon farko, bayan da ta sallami kociyanta Bruno Lage.

Haka kuma Diego Costa ya buga wa Wolves wasan, inda ya fuskanci tsohuwar kungiyarsa.

Costa ya ci kwallo 52 a wasa 89 da ya yi wa kungiyar Stamford Bridge daga 2014 zuwa 2019.