Gasar kofin duniya 2026: Me kuke son sani kan wasan Ingila da Ghana?

Ingila da Ghana za su kece raini a wasa na bibiyu a cikin rukuni na 12 a gasar cin kofin duniya da za su kara ranar Talata a Boston a Amurka.

Tawagar Ingila ta samu maki uku a kan Croatia a wasan farko, haka itama Ghana ta yi nasara a kan Panama, amma daf da za a tashi daga fafatawar ta ci ƙwallon.

Kenan kasashen biyu sun kwan da sanin cewar duk wadda ta yi nasara a tsakaninsu a ranar ta Talata, za ta samu tikitin kaiwa zagaye na biyu a gasar cin kofin duniya 2026.

Ingila karkashin Thomas Tuchel tana kan ganiya, wadda ta nuna hakan a wasan farko, inda ta caskara, Croatia da ci 4-2, kuma Harry Kane ya ci biyu daga ciki.

Ita kuwa Ghana ta samu damar cin Panama 1-0, inda ta yi nasara a lokacin da aka yi karin lokaci, kenan ana daf da tashi.

Karin batutuwa kan fafatawar:

Wasa: Ingila da Ghana

rana: Talata 23 ga watan Yuni

lokaci: Karfe 9:00 agogon Najeriya da Niger

Gasa: Gasar cin kofin duniya 2026

Nahiya: Turai da Afirka

Wuri: Filin wasa na Boston da ke Amurka

Kociyan tawagar Ingila, Thomas Tuchel ya ce babu wani ɗan wasansa mai ɗauke da rauni a lokacin da yake shirin fuskantar Ghana a gasar cin kofin duniya.

Ya kuma ce fitatcen ɗan wasan Arsenal, wanda ya lashe kofin Premier League a karon farko a kakar da ta wuce, Bukayo Saka ya murmure, ya daina jin radaɗi a kafarsa.

''Kowanne ɗan wasanmu yana cikin koshin lafiya kuma sun halarci atisaye'' kamar yadda Tuchel ya sanar da manema labarai.''

''Saka ya samu sauki, yana iya gudu ba tare da jin wani raɗaɗi ba a kafarsa. Ya kuma halarci dukkan atisaye biyu da muka yi, saboda haka a shirye yake, ba tare da sanar da ku ko zai fara daga benci ba.''

Saka, wanda koda yaushe Ingila ke fara wasa da shi, ya shiga canjin ɗan wasa a karawar da Ingila ta doke Croatia 4-2 a wasan farko a cikin rukuni a makon jiya.

Saurin kai hare-hare

Nasarar da Ingila ta yi a wasan farko ta nuna yadda tawagar ke iya kai hare-hare da sauri kuma masu haɗari, duk da cewa ƙwallaye biyu da Croatia ta ci ya nuna akwai ɓaraka a gurbin masu tsaron bayan Ingila.

Tuchel ɗan kasar Jamus, ya fayyace yadda haɗin kan ƴan wasan Ingila yake, inda ya ce hamayya ta son buga wasa tsakanin Saka da abokin wasansa na Arsenal, Noni Madueke daga gefen dama daga gaba, "abu ne mai kyau ƙwarai". Ingila tana da zaɓi.

Haka kuma, Anthony Gordon shi ne na farko daga cikin ƴan benci da ya ruga a guje ya taya Marcus Rashford murna cin ƙwallon da ya yi — inda ɗan wasan Manchester United ne ya maye gurbin Gordon a wasan Crotia.

Ya kuma yaba da ƙwazo da kuma halayen da Jude Bellingham ya nuna na gari, wanda shi ma ya ci kwallo a wasan Croatia, duk da cewa a baya wasu magoya baya sun soki halayen nasa.

Tawagaogin biyu sun yi nasara a wasanninsu na farko a rukunin na 12 — Ghana ta doke Panama 1-0 da cin kwallo daf a tashi — don haka samun maki uku a wannan karawar da za a yi a filin wasa na ƙungiyar New England Patriots a Boston a ranar Talata zai tabbatar da tsallakawa zuwa zagayen ƴan 32.

Abin da Tuchel ya ce da mai tsaron bayan Ghana, Mensah

"Ba za mu iya kwatanta irin shirin da muka yi na wasan Panama da wanda muke yi yanzu domin fuskantar Ingila ba. Wannan zai fi wanda muka yi a kan Panama.

Tawaga na zuwa irin wannan gasa ta duniya da sanin cewar za ta fuskanci manyan kasashe masu fitattun ƴan ƙwallo a faɗin duniya. Ba wani abu ba ne da zai ba mu mamaki, Abin da ya kamata mu yi shi ne tashi tsaye mu kare martabar ƙasarmu."

— Gideon Mensah, ɗan bayan Ghana

"Ghana tana wasa da ƙarfi sosai, tana ƙwallon gudu, kuma tana da ƴan wasa da suka kware suka goge. Ba sa damuwa sai sun rike ƙwallo sosai, domin sun kware wajen kai hare-hare dama da hagu.

Wannan salon wasan ya bambanta da na wasanmu da ya gabata, amma wannan shi ne abin da zai sa karawar ta zama mai kayatarwa. A gasar kofin duniya za muke fuskantar kasashe masu al'adu da salon taka leda daban-daban.

Ya rage daga garemu kan yadda za mu fuskanci kowanne wasan, sannan mu yi kokarin sa kwazo da taka rawar da za ta kai mu ga mataki na gaba, domin wannan ne abin da ake bukata."

— Thomas Tuchel, kocin Ingila

Ƴan wasan da ake sa ran za a fara karawar da su

Ƴan wasan Ingila 11:

Pickford; James, Konsa, Stones, O'Reilly; Rice, Anderson, Bellingham; Madueke, Kane, Rashford

Ƴan wasan Ghana 11:

Asare; Adjetey, Mensah, Opoku, Senaya; Yirenkyi, Semenyo, Owusu; Ayew, Sulemana, Nuamah

Katafaren filin wasa na Boston a Amurka

Filin wasan Boston, wanda shi ne gidan ga ƙungiyar MLS ta New England Revolution da kuma ƙungiyar New England Patriots ke amfani da shi, an yi masa manyan gyare-gyare domin ya kai matakin da ake bukata don buga gasar kofin duniya ta 2026.

Yanzu filin yana da babban allon bidiyo mai faɗin kafa murabba'i 22,000 da kuma hasumiya mai tsayin hawa 22, kuma yana cikin yanayi mai kyau ƙwarai da gaske, wanda aka tsara yin wasa bakwai a cikinsa.