Wasa biyar kacal Chelsea za ta buga a cikin watan Janairu

Wasa biyar Chelsea za ta buga a watan Janairun 2025 da ya haɗa da huɗu a Premier League da FA Cup.

Ranar Litinin Chelsea ta yi rashin nasara 2-0 a gidan Ipswich Town a babbar gasar tamaula ta Ingila karawar mako na 19, wasan karshe da ta yi a 2024 kenan.

Hakan ya sa Chelsea mai maki 35 ta yi kasa zuwa ta huɗu a teburin Premier League, bayan cin wasa 10 da canjaras biyar da rashin nasara huɗu.

Ƙungiyar Stamford Bridge za ta fara wasa ranar 4 ga watan Janairu da zuwa Crystal Palace a Selhurst Park, wasan hamayya na ƙungiyoyin Landan.

Ranar 11 ga watan Janairu, Chelsea za ta karɓi bakuncin Morecambe a FA Cup, kwana uku tsakani ta yi wa Bournemouth masauki a Premier a Stamford Bridge.

Ranar 20 ga watan sabuwar shekara, Chelsea za ta fafata da Wolverhampton a gida daga nan ta yi wasan karshe a Janairun 2024.

Shi ne wanda za ta je Etihad ranar 25 ga watan Janairu, domin karawa da Manchester City mai rike da Premier na bara na huɗu a jere.

Ranar 18 ga watan Agusta, City ta doke Chelsea 2-0 a makon farko a Premier League a Stamford Bridge, kuma Erling Haaland da Mateo Kovacic ne suka ci ƙwallayen.

Wasannin da Chelsea za ta kara a 2025:

Premier League Asabar 4 ga watan Janairu

English FA Cup Asabar 11 ga watan Janairu

Premier League Talata 14 ga watan Janairu

Premier League Litinin 20 ga watan Janairu

Premier League Asabar 25 ga watan Janairu